Psalms 63

balinese

1Duh Ratu Sang Hyang Widi Wasa, Palungguh IRatu dados Widin titiange tur titiang tansah ngape-ape Palungguh IRatu. Dewek titiange makaukud tansah ngape-ape Palungguh IRatu, tur jiwan titiange bedak ngetel ring Palungguh IRatu, waluya sakadi tanahe sane tuh mempugan miwah kirangan toya.

2Lugrainja titiang ngeton Palungguh IRatu ring linggih Palungguh IRatune sane suci. Icenja titiang ngeton kawisesan miwah kaluihan Palungguh IRatune sane agung.

3Sih pasuecan Palungguh IRatu sane nenten rered-rered punika becikan tinimbang ring uripe puniki, duaning punika titiang jaga muji Palungguh IRatu.

4Sakantun titiange urip, titiang jaga tansah ngaturang panyuksma ring Palungguh IRatu. Titiang jaga nyakupang lima ngastawa ring Palungguh IRatu.

5Jiwan titiange jaga masuka-sukan tur kapurnayang miwah titiang jaga ngidungang kidung kaliangan muji Palungguh IRatu.

6Rikalaning titiang masare ring pedeman titiange, titiang eling ring Palungguh IRatu. Awengi mepek titiang minehin Palungguh IRatu.

7Santukan Palungguh IRatu setata dados panulung titiange. Ring sor kampid Palungguh IRatune titiang makidung maliang-liang.

8Titiang nglanting ring Palungguh IRatu, tur tangan Palungguh IRatune ngambel titiang saha rahayu.

9Jadmane sane mamanah ngamademang titiang jaga tedun ka lokan anake padem.

10Ipun jaga kapademang ring payudan, tur bangkenipune jaga kateda antuk asu alase.

11Ida sang prabu masuka rena, santukan Ida Sang Hyang Widi Wasa mapaica kamenangan ring ida. Anake sane majanji sajeroning parab Ida Sang Hyang Widi Wasa jaga muji Ida, nanging bungut jadmane bobab jaga bungkem.

← Chapter 62 Chapter 64 →