Psalms 44

balinese

1Duh Ratu Sang Hyang Widi Wasa, titiang sampun miragi antuk kuping titiange newek. Leluur-leluur titiange sampun nuturang ring titiang ngeniang paindikan sane ageng sane sampun kardi Palungguh IRatu, rikala ipun kantun pada urip duke nguni.

2Palungguh IRatu sampun ngulah bangsa-bangsa sane tan pawidi, tur ngamanggehang kaulan Palungguh IRatu ring panegaranipune. Palungguh IRatu sampun nyisipang bangsa-bangsa sane lianan tur ngawinang kaula druene muponin gemuh landuh.

3Kaulan Palungguh IRatu nentenja ngaonang tur ngaug jagate puniki malantaran pedang ipune. Ipun nentenja molih kamenangan malantaran kawisesanipune. Punika makasami malantaran kawisesan miwah kaluihan Palungguh IRatu santukan Palungguh IRatu ngiangin ipun. Indike punika makadados cihna mungguing Palungguh IRatu asih sueca ring ipun.

4Palungguh IRatu makadados Ratu miwah Widin titiange. Palungguh IRatu mapaica kamenangan ring kaulan Palungguh IRatu,

5tur malantaran kawisesan Palungguh IRatu titiang ngaonang meseh-meseh titiange.

6Titiang nenten andel ring panah titiange, wiadin ring pedang titiange buat ngrahayuang titiang.

7Nanging Palungguh IRatu sampun ngluputang titiang saking meseh-meseh titiange, tur ngaonang jadmane sane geting ring titiang.

8Titiang setata jaga muji Palungguh IRatu, tur ngaturang panyuksma ring ayun Palungguh IRatu ngantos salami-laminipun.

9Nanging sane mangkin Palungguh IRatu sampun nulak titiang tur manggayang titiang kakaonang. Palungguh IRatu nenten kantun mamargi nyarengin wadua balan titiange.

10Palungguh IRatu ngawinang titiang jerih kapilayu saking arepan meseh-meseh titiange, tur ipun pada nyarah paderben titiange.

11Palungguh IRatu manggayang titiang katampah waluya sakadi biri-birine. Palungguh IRatu nyambragang titiang ring jagat sunantarane.

12Palungguh IRatu ngadol kaulan Palungguh IRatune antuk pangarga sane murah, tur Palungguh IRatu mikayunin mungguing ipun tan paji.

13Pisaga-pisagan titiange ngeton paindikan sane sampun kardi Palungguh IRatu ring titiang, tur ipun pada ngewerin saha ngedekin titiang.

14Palungguh IRatu sampun nadosang titiang dados paindikan sane ngawinang anake pada seneb ring pantaran parabangsane sami, tur ipun pada kitak-kituk saha nemah misuh titiang.

15Titiang setata kanistayang. Titiang kakaput antuk kimud,

16malantaran miragi bebinjulan miwah pangewer meseh-meseh miwah jadmane sane geting ring titiang.

17Sakancan paindikan punika sampun nibenin titiang, yadiastun titiang sampun nenten lali ring Palungguh IRatu, wiadin lompang ring pasubaya sane sampun kardi Palungguh IRatu ring titiang.

18Subaktin titiange ring Palungguh IRatu nenten naenin rered, tur titiang nenten naenin tempal ring sapatitah Palungguh IRatu,

19yadiastuko Palungguh IRatu sampun manggayang titiang tan padaya ring pantaran sato-satone galak. Palungguh IRatu nilar titiang ring genah sane kalintang peteng dedet.

20Yening titiang wusan nyungsung Widin titiange, raris ngastawa ring widi sane tiosan,

21Palungguh IRatu sampun janten nyingak indike punika, santukan Palungguh IRatu wikan ring manah titiange sane singid.

22Nanging malantaran pakarsan Palungguh IRatu, nyabran rahina titiang rumasa kapademang waluya sakadi biri-birine sane jaga katampah.

23Duh Ratu Sang Hyang Widi Wasa, rarisangja matangi! Punapi awinannya Palungguh IRatu sirep? Rarisangja matangi! Sampunangja Palungguh IRatu nulak titiang ngantos salami-laminipun.

24Punapi awinannya Palungguh IRatu nyingidang raga marep ring titiang? Sampunangja lali ring kasangsaran miwah kamewehan titiange!

25Titiang bah kakaonang ring buke tur titiang nyag maguyang ring tanahe.

26Rarisangja rauh nulungin titiang malantaran sih pasuecan Palungguh IRatune sane nenten rered-rered.

← Chapter 43 Chapter 45 →