Psalms 4

balinese

1Duh Ratu Sang Hyang Widi Wasa, sane dados patindih titiange, saurinja titiang rikala titiang ngastawa. Rikala titiang katempuh antuk kamewehan, Palungguh IRatu mapaica pitulungan ring titiang. Sane mangkin suecaninja titiang tur pirengangja pangastawan titiange.

2Ih jero, buin makapidan makelonne jerone nganistayang tiang? Buin amunapa makelonne jerone leket teken paundukan ane tan paguna, muah ninutin paundukan ane palsu?

3Ingetangja mungguing Ida Sang Hyang Widi Wasa suba nyelik anake patut makadadi druen Idane, tur Ida mirengang pinunas tiange, dikalane tiang nunas ica teken Ida.

4Pada jejeh ngetorja jerone tur suudja ngae dosa. Melahangja minehin paundukane ene, dikalan jerone masare di pasarean jerone.

5Aturangja aturan ane patut di ayun Ida Sang Hyang Widi Wasa, tur suksrahja jerone teken Ida.

6Akeh anake sane ngastawa asapuniki: “Duh Ratu Sang Hyang Widi Wasa, icenja titiang merta langkungan ring puniki. Cingak tur suecaninja titiang!”

7Nanging kaliangan sane sampun paicayang Palungguh IRatu ring titiang, punika langkungan ring sane naenin puponin ipun rikala ipun mupu gandum miwah anggur.

8Rikala titiang masare, titiang pules saha sutrepti. Duh Ratu Sang Hyang Widi Wasa, wantah Palungguh IRatu sane ngrahayuang titiang saha sampurna.

← Chapter 3 Chapter 5 →