Psalms 145

balinese

1Titiang jaga nglumbrahang kagungan Palungguh IRatune, duh Widi miwah Ratun titiange. Titiang jaga ngaturang panyuksma ring Palungguh IRatu salami-laminipun.

2Nyabran rahina titiang jaga ngaturang panyuksma, tur titiang jaga muji Palungguh IRatu salami-laminipun.

3Ida Sang Hyang Widi Wasa punika agung tur patut sungsung puji-puji, tur kagungan Idane nglangkungin pangresepan.

4Napija sane sampun kardi Palungguh IRatu, jaga tansah kapuji-puji antuk sakancan katurunane turun-temurun. Ipun jaga nglumbrahang pamargin Palungguh IRatune sane mawisesa.

5Ipun jaga maosang indik kaluihan miwah kagungan Palungguh IRatune, tur titiang jaga mineh-minehin pakardin Palungguh IRatune sane kalintang luih.

6Rakyate jaga maosang indik pakardin Palungguh IRatune sane maha wisesa, samaliha titiang jaga nglumbrahang kagungan Palungguh IRatune.

7Ipun jaga nuturang indik sakancan kabecikan Palungguh IRatune, tur makidung ngeniang indik sih kawelas arsan Palungguh IRatune.

8Ida Sang Hyang Widi Wasa kalintang sih sueca miwah asung lugraha. Ida nenten gelis duka tur pasuecan Idane kalintang ageng saha nenten rered-rered.

9Ida kalintang becik ring anake suang-suang, tur kalintang sih kawelas arsan ring sakancan pakardin Idane.

10Duh Ratu Sang Hyang Widi Wasa, sakancan pakardin Palungguh IRatune jaga muji Palungguh IRatu samaliha sakancan kaula druene jaga ngaturang panyuksma ring Palungguh IRatu.

11Ipun jaga maosang indik kaluihan kaprabon Palungguh IRatune, tur nuturang indik kawisesan Palungguh IRatune.

12Mangda sakancan anake jaga uning ring kawisesan pakaryan Palungguh IRatune miwah kagungan kaprabon Palungguh IRatune sane luih.

13Pamrentahan Palungguh IRatune punika langgeng, tur Palungguh IRatu madeg Ratu salami-laminipun. Ida Sang Hyang Widi Wasa satia tuu ring prajanjian Idane, tur saananing sane kardi Ida punika becik.

14Ida ledang mapaica pitulungan ring anake sane keni kamewehan, tur Ida ledang ningtingang jadmane sane sampun labuh.

15Sawatek sane mangkihan makasami nulengek ngajap-ajap Palungguh IRatu, tur Palungguh IRatu ledang mapaica pangan kinum rikalaning ipun mamuatang.

16Palungguh IRatu mapaica ring ipun setegepnya, tur nyukupang kabuatanipune makasami.

17Ida Sang Hyang Widi Wasa punika adil ring saluiring pakaryan Idane. Ida kapiolasan ring sakancan pamargin Idane.

18Ida tansah nampek ring anake sane nunas Ica ring Ida, inggih punika ring anake sane mapinunas saking nekeng ati.

19Ida mapaica sategepipun ring anake sane ngluihang Ida. Ida mireng pinunasipune tur ngrahayuang ipun.

20Ida nyayubin sakancan anake sane astiti bakti ring Ida, nanging jaga nyirnayang jadmane sane dursila.

21Titiang jaga setata muji Ida Sang Hyang Widi Wasa. Ngiringja sakancan pakardin Idane muji parab Idane sane suci salami-laminipun.

← Chapter 144 Chapter 146 →