Psalms 138

balinese

1Duh Ratu Sang Hyang Widi Wasa, titiang ngaturang panyuksma ring ayun Palungguh IRatune antuk saguluking manah titiange. Titiang makidung muji Palungguh IRatu ring ajeng dewane.

2Titiang sumungkem marep ring Perhyangan Agung druen Palungguh IRatune, tur muji parab Palungguh IRatune, santukan sih pasuecan lan kasatian Palungguh IRatune sane nenten rered-rered, tur Palungguh IRatu sampun nyinahang mungguing parab miwah pituduh-pituduh Palungguh IRatune sujati maha luur.

3Palungguh IRatu nagingin pinunas titiange, rikalaning titiang nunas ica ring Palungguh IRatu, tur masrana kakuatan Palungguh IRatune, Palungguh IRatu nguatang titiang.

4Sawatek pararatune ring jagate jaga muji Palungguh IRatu, duh Ratu Sang Hyang Widi Wasa, santukan ida sampun pada mireng janjin Palungguh IRatune.

5Ida jaga makidung ngeniang indik sane sampun kardi Palungguh IRatu miwah indik kaluihan Palungguh IRatune sane ageng.

6Yadiastu Palungguh IRatu malingga kalintang tegeh ring luur, nanging Palungguh IRatu nglinguang jadmane sane nista, tur jadmane sane sumbung nenten mrasidayang makelid saking ayun Palungguh IRatune.

7Rikalaning titiang kiter antuk kamewehan, Palungguh IRatu ledang ngrahayuang titiang. Palungguh IRatu nglawan meseh-meseh titiange sane mamedih, tur ngrahayuang titiang antuk kawisesan Palungguh IRatune.

8Palungguh IRatu nglaksanayang saluiring sane sampun janjiang Palungguh IRatu. Duh Ratu Sang Hyang Widi Wasa, sih pasuecan Palungguh IRatune langgeng salami-laminipun. Puputangja pakaryan sane sampun kawitin Palungguh IRatu.

← Chapter 137 Chapter 139 →