Psalms 132

balinese

1Duh Ratu Sang Hyang Widi Wasa, sampunangja Palungguh IRatu lali ring Sang Prabu Daud miwah ring sakancan kamewehan sane sampun rasayang ida.

2Duh Ratu Sang Hyang Widi Wasa, elingangja paindikan sane sampun janjiang ida, inggih punika sesangi sane katurang ring ayun Palungguh IRatu, Widin Dane Yakub Sane Maha Wisesa, kadi asapuniki:

3“Titiang nenten jaga budal wiadin masare.

4Titiang nenten jaga mararian wiadin pules.

5Sadurung titiang nyawisang palinggih pabuat Ida Sang Hyang Widi Wasa, inggih punika Perhyangan Widin Dane Yakube Sane Maha Wisesa.”

6Ring Betlehem titiang miragi indik Peti Prajanjiane punika, tur petine punika keniang titiang ring pategalan Yearime.

7Titiang raris mabaos sapuniki: “Ngiringja iraga ngungsi Perhyangan Ida Sang Hyang Widi Wasa. Ngiringja iraga mabakti ring ajeng singasanan Idane.”

8Duh Ratu Sang Hyang Widi Wasa, ledang Palungguh IRatu rauh ring Perhyangan Agunge kadi asapunika taler Peti Prajanjiane punika, sane pinaka dados cihna kawisesan Palungguh IRatune. Ledang Palungguh IRatu malinggih irika ngantos salami-laminipun.

9Mangda parapandita druene setata nglaksanayang paindikan sane patut, tur kaula druene masuryak-suryak masuka rena.

10Palungguh IRatu ngardi prajanjian ring parekan druene Sang Prabu Daud. Duh Ratu Sang Hyang Widi Wasa, sampunangja tulaka sang prabu seselikan Palungguh IRatune.

11Palungguh IRatu sampun ngardi prajanjian sane suci ring Sang Prabu Daud, inggih punika prajanjian sane nenten jaga urungang Palungguh IRatu, sane kadi asapuniki: “Ulun lakar ngadegang pianak kitane adiri dadi ratu, tur ia lakar mrentah nylediinin kita.

12Yening pianak-pianak kitane ngamanggehang prajanjian ulune muah pituduh ane paicayang Ulun teken ia, pianak-pianaknyane masih lakar dadi ratu kanti salawas-lawasne.”

13Ida Sang Hyang Widi Wasa sampun nyelik Gunung Sion tur Ida mapakayun jaga nadosang ipun genah Perhyangan Idane. Sapuniki pangandikan Idane:

14“Ditu tongos Ulune lakar malinggih salawas-lawasne, tur ditu masih tongos Ulune lakar mrentah.

15Ulun mapakayun nyujukang sakancan ane perluanga baan Sion. Ditu Ulun lakar murnayang idep rakyate ane lacur aji dedaaran.

16Sakancan ane kalaksanayang baan parapanditannyane, lakar mertanin Ulun muah rakyate lakar makidung tur masuryak-suryak masuka rena.

17Ditu Ulun lakar ngadegang katurunan Daude adiri dadi ratu ane agung. Ditu Ulun lakar ngamanggehang pamrentahan sang prabu seselikan Ulune.

18Musuh-musuhnyane lakar tangkeb Ulun baan kimud, nanging kaprabonnyane lakar gemuh landuh muah tumbuh subur.”

← Chapter 131 Chapter 133 →