Psalms 125

balinese

1Anake sane pracaya ring Ida Sang Hyang Widi Wasa, waluya sakadi Gunung Sione, sane nenten naenin magejeran, tur nenten naenin magingsir.

2Sakadi gunung-gununge ngiter kota Yerusaleme, inggih kadi asapunika taler Ida Sang Hyang Widi Wasa nyerungin kaulan Idane sane mangkin miwah salami-laminipun.

3Jadmane sane dursila nentenja setata nguasain tanah anake patut. Pradene kadi asapunika, menawi anake sane patut punika malaksana dursila.

4Duh Ratu Sang Hyang Widi Wasa, tibakangja paindikan sane becik ring jadmane sane malaksana ayu, inggih punika ring jadmane sane ninutin pituduh-pituduh Palungguh IRatune.

5Nanging rikalaning Palungguh IRatu nyisipang jadmane sane dursila, sisipangja jadmane sane nilar margin Palungguh IRatune. Dumadakja wenten dame ring Israel.

← Chapter 124 Chapter 126 →