Psalms 116

balinese

1Titiang astiti bakti ring Ida Sang Hyang Widi Wasa, santukan Ida mirengang atur titiange, tur Ida mirengang pinunas-pinunas titiange.

2Ida mirengang atur titiange sabilang titiang mapinunas ring Ida.

3Baya patine ngiter titiang, tur kadurgaman bangbang setrane nganampekin titiang. Titiang kaliput antuk katakutan miwah manah inguh.

4Irika titiang raris mapinunas ring Ida Sang Hyang Widi Wasa, sapuniki: “Duh Ratu Sang Hyang Widi Wasa, titiang mapinunas ring Palungguh IRatu, ledang Palungguh IRatu ngrahayuang titiang.”

5Ida Sang Hyang Widi Wasa kalintang sih sueca tur adil, Widin iragane kalintang sih kapiolasan.

6Ida Sang Hyang Widi Wasa nyayubin anake sane nglisting. Rikala titiang katempuh bencana, Ida ngrahayuang titiang.

7Entegangja kenehe, ih jiwan tiange, sawireh Ida Sang Hyang Widi Wasa suba kalintang sueca teken tiang.

8Ida Sang Hyang Widi Wasa ngluputang titiang saking patine. Ida nyadsadin yeh matan titiange tur ngluputang titiang saking kakaonan titiange.

9Duaning punika titiang mamargi ring ayun Ida Sang Hyang Widi Wasa, ring jagat jadmane sane urip.

10Titiang tetep kantun pracaya, yadiastun titiang rikalaning mabaos kadi asapuniki: “Titiang kanyagang pisan.”

11Taler rikalaning titiang sajeroning katakutan tur mabaos sapuniki: “Tan wenten anak sane nyandang gugu.”

12Napi sane patut aturang titiang pamantuka ring Ida Sang Hyang Widi Wasa pabuat saluiring kabecikan Idane ring titiang?

13Titiang jaga ngaturang anggur ring Ida Sang Hyang Widi Wasa, buat matur panyuksma ring Ida, santukan Ida sampun ngrahayuang titiang.

14Ring pantaran pauman kaulan Idane, titiang jaga naur sesangin titiange ring Ida.

15Ambate sungkan pakayunan Ida Sang Hyang Widi Wasa, yening wenten salah tunggil kaulan Idane padem.

16Duh Ratu Sang Hyang Widi Wasa, titiang puniki parekan Palungguh IRatu. Titiang nyadia ngancangin Palungguh IRatu, sakadi sane sampun kalaksanayang antuk memen titiange. Palungguh IRatu sampun ngluputang titiang saking sang pati.

17Titiang jaga ngaturang panyuksma ring Palungguh IRatu miwah ngunggahang pangastawan titiange ring ayun Palungguh IRatu.

18Sajeroning paruman sawatek kaulan Palungguh IRatune, ring genahe sane suci ring Perhyangan Agung Palungguh IRatune ring Yerusalem, titiang jaga naur sesangin titiange ring ayun Palungguh IRatune. Pujija Ida Sang Hyang Widi Wasa!

← Chapter 115 Chapter 117 →