Psalms 108

balinese

1Duh Ratu Sang Hyang Widi Wasa, manah titiange telas pisan. Titiang mamanah makidung tur ngluihang Palungguh IRatu! Ih jiwan tiange, bangunja!

2Ih suling muah rebab tiange pada bangunja! Tiang lakar nundun matan ai.

3Duh Ratu Sang Hyang Widi Wasa, titiang praya ngaturang panyuksma ring ayun Palungguh IRatu, ring pantaran parabangsane. Titiang praya muji Palungguh IRatu ring pantaran rakyate sami.

4Sih pasuecan Palungguh IRatu sane nenten rered-rered punika tegehipun rauh ka suargan, tur kasatian Palungguh IRatu rauh ka akasane.

5Duh Ratu Sang Hyang Widi Wasa, sinahangja kagungan Palungguh IRatu ring akasane miwah kaluihan Palungguh IRatu ring sakuub jagate sami.

6Luputangja titiang antuk kawisesan Palungguh IRatune, tur daginginja pinunas titiange, mangdane kaula sane sayangang Palungguh IRatu punika prasida luput.

7Saking linggih Idane sane suci, Ida Sang Hyang Widi Wasa sampun masabda sapuniki: “Ulun lakar ngadumang kota Sikem muah Lebak Sukote teken kaulan Ulune.

8Kota Gilead muah Manase dadi duen Ulune. Epraim dadi tetopong Ulune muah Yehuda dadi teteken muah ciri kaprabon Ulune.

9Nanging Moab lakar anggon Ulun wadah pabasehan, tur Ulun lakar ngentungang sandal Ulune sig Edome makaciri ia dadi gelah Ulune. Ulun lakar masuryak-suryak, sawireh Ulun menang nglawan Pilistin.”

10Duh Ratu Sang Hyang Widi Wasa, sapasirake jaga ngajak titiang ngranjing ka kota sane kiter antuk benteng? Sapasirake jaga nandan titiang ngranjing ka Edom?

11Punapike sawiakti Palungguh IRatu sampun nilar titiang? Boyake Palungguh IRatu jaga nyarengin wadua balan titiange mamargi ka payudan?

12Tulungja titiang nglawan meseh titiange, santukan pitulungan manusane nenten wenten pikenohipun.

13Yening Ida Sang Hyang Widi Wasa nyarengin titiang, titiang jaga menang. Ida pacang ngaonang meseh-meseh titiange.

← Chapter 107 Chapter 109 →