Psalms 104

balinese

1Pujija Ida Sang Hyang Widi Wasa, ih jiwan titiange. Duh Ratu Sang Hyang Widi Wasa, Widin titiange, Palungguh IRatu sawiakti kalintang agung. Palungguh IRatu kabusanain antuk kagungan miwah kaluihan.

2Palungguh IRatu kalikub antuk galang. Palungguh IRatu ngebatang langite sakadi anake ngebatang tenda.

3Palungguh IRatu ngwangun puri ring toyane sane ring langite. Megane anggen Palungguh IRatu kreta palinggihan, tur kampid angine anggen Palungguh IRatu mamargi.

4Angine anggen Palungguh IRatu utusan, miwah kelepan tatite anggen Palungguh IRatu parekan.

5Jagate sampun genahang Palungguh IRatu saha kukuh bakuh ring duur dasaripune, tur ipun nenten jaga naenin magingsir.

6Segarane genahang Palungguh IRatu ring duur jagate, waluya sakadi sapatutnyane tur toyane nglancah gunung-gunung.

7Yening toyane punika dukain Palungguh IRatu, ipun raris kapilayu. Rikala ipun miragi geluran sabdan Palungguh IRatune, ipun pada masriut makaon.

8Ipun tumuli nglancah gunung-gunung, raris ngliab lebahe, ka genah sane sampun kardi Palungguh IRatu pabuat ipun.

9Palungguh IRatu mastikayang watesipune, mangda ipun nenten mrasidayang nglintang, tur mangda ipun nenten mrasidayang malih nglancah daatane.

10Palungguh IRatu sane ngwentenang toya kalebutan ring lebah-lebahe miwah tukad-tukade milir ring selagan bukit-bukite.

11Ipun nyediang toya pabuat sato-sato alase, tur irika keledae alasane pada ngicalang bedakipune.

12Ring taru-taru sane mentik ring tukade punika, sawatek paksine pada masebun miwah masuara.

13Palungguh IRatu nedunang sabeh saking ambarane, tumiba ring bukit-bukite, tur pretiwine kabekin antuk mertan Palungguh IRatune.

14Palungguh IRatu numbuhang padang pabuat ingon-ingone miwah palawija buat kagunayang antuk imanusa, mangda ipun mrasidayang mupuang gandum,

15mupuang anggur, sane ngawinang ipun liang miwah minyak saitun sane ngawinang ipun bungah, ping kalih roti sane ngawinang ipun polih kakuatan.

16Wit taru arase sane ring Libanon, taru druen Ida Sang Hyang Widi Wasa sane tandur Ida ngraga pepek polih sabeh.

17Irika paksine pada masebun. Paksi cangake masebun ring taru sanobare.

18Kambing alasane magenah ring gunung-gununge sane tegeh miwah lubake pada mengkeb ring bukit-bukit batu kaange.

19Palungguh IRatu ngardi candra, buat nyinahang sasihe miwah suryane uning ring masanipune jaga surup.

20Palungguh IRatu ngardi wengi, tur sajeroning peteng dedet punika sawatek sato alase pada medal.

21Singane sane kantun muda pada gerem-gerem ngulati tetedan sane sampun kacawisang antuk Ida Sang Hyang Widi Wasa.

22Yening suryane sampun endag, ipun pada mawali tur medem ring guanipune suang-suang.

23Irika jadmane pada medal buat ngarap pakaryanipune, tur ipun nglantur makarya kantos sore.

24Duh Ratu Sang Hyang Widi Wasa! Akeh pisan pakardin Palungguh IRatune. Palungguh IRatu kalintang-lintang wicaksana sajeroning ngardi punika makasami. Jagate bek antuk pakardin Palungguh IRatune.

25Irika wenten segara sane linggah tur jimbar genah gumatap-gumitipe sane tan keni wilangin akehipune, wenten sane ageng wenten sane alit.

26Ring segarane punika kapale pada malayar miwah ring sawang segarane pada pasliwer Lewiatan, inggih punika sato ageng sane sampun kardi Palungguh IRatu.

27Makasami punika wantah ngandelang Palungguh IRatu mangda ipun polih merta rikalaning ipun mamuatang tetedan.

28Palungguh IRatu ngicen ipun tetedan, tur ipun raris pada nunas. Palungguh IRatu nyawisang tetedan pabuat ipun, tur ipun pada betek.

29Yening Palungguh IRatu nenten lingu ring ipun, ipun sami pada ajerih. Yening Palungguh IRatu mancut angkihanipune, ipun raris padem, tur mawali dados buk, santukan kawitipune saking buk.

30Nanging yening Palungguh IRatu mapaica angkihan ring ipun, kenginan ipun prasida urip malih. Palungguh IRatu sane nganyarang pretiwine.

31Dumadak kaluihan Ida Sang Hyang Widi Wasa langgeng kantos salami-laminipun. Dumadak Ida Sang Hyang Widi Wasa ledang ring kayun, malantaran saluiring sane sampun kardi Ida.

32Ida mandreng pretiwine, tur ipun raris magejeran. Ida ngusud gunung-gununge tur ipun raris ngamedalang andus.

33Titiang jaga makidung ngluihang Ida Sang Hyang Widi Wasa, salamin urip titiange. Salamin urip titiange, titiang jaga makidung muji Widin titiange.

34Dumadak Ida ledang ring kayun, malantaran kakidungan titiange, santukan kaliangan titiange wantah saking Ida rauhnya.

35Dumadak jadmane madosa kasirnayang saking mrecapada. Dumadak nenten wenten malih jadma dursila. Pujija Ida Sang Hyang Widi Wasa, ih jiwan titiange! Pujija Ida Sang Hyang Widi Wasa!

← Chapter 103 Chapter 105 →