Proverbs 2

balinese

1Ih cening, idepangja pangajah bapane, tur eda pesan engsap teken unduk ane suba tunden bapa nglaksanayang.

2Padingehangja paundukan ane wicaksana muah tegarangja resepang.

3Alihja karirihane muah ulatija pepinehe ane dalem.

4Saratangja ngalih unduke ento buka sarat ceninge ngalih perak wiadin arta brana ane makebang.

5Yening cening nyalanang unduke ento, cening lakar nawang apa artinne takut teken Ida Sang Hyang Widi Wasa, tur cening lakar nyidayang mlajahin unduk Ida Sang Hyang Widi Wasa.

6Tuah Ida Sang Hyang Widi Wasa ane mapaica kawicaksanan, tur uli sig Idane tekan karirihane muah pangresepane.

7Ida nyawisang pitulungan muah pasayuban pabuat anake ane patut muah jujur.

8Ida nyayubin anake ane malaksana adil teken anak lenan, tur Ida ngraksa anake ane astiti bakti teken Ida.

9Yening cening madingehang pitutur bapane, cening lakar nawang unduk ane patut, adil muah jujur. Cening lakar nawang unduk ane patut laksanayang cening.

10Cening lakar dadi wicaksana tur karirihan ceninge lakar ngranayang cening liang.

11Pangresepan muah karirihan ceninge lakar nyayubin cening,

12muah ngandeg cening uli nglaksanayang paundukan ane pelih. Pangresepan muah karirihane ento lakar ngejohang cening uli anake ane ngae pakewuh aji unduk ane raosanga, nah ento:

13anak ane suba nilar laksana ane patut, tur nongos sajeroning dosa ane peteng dedet,

14anak ane marasa liang nyalanang unduk ane tan patut muah demen teken paundukan ane jaat,

15ane tuara nyandang gugu tur tuara nyandang cagerang.

16Cening lakar nyidayang nglawan sakancan anake luh-luh ane nglemesin cening aji raos nyunyur manis,

17ane ngapus somahne padidi tur engsap teken janjinnyane ane suci.

18Yening cening nututin ia ka umahne, sujatinne cening majalan sig margane ane ngungsi pati. Yening cening kema, mapiteges cening ngungsi ka pati loka.

19Sawatek anake ane ka umah anake luh ento, ia tusing taen buin malipetan ka margane ane ngungsi idup.

20Sawireh keto, cening patut nuutang tetuladan anake ane patut muah malaksana ane melah.

21Anake ane patut, anake ane jujur, lakar idup di gumin iragane ene.

22Nanging Ida Sang Hyang Widi Wasa lakar mancut urip anake dursila uli gumine, tur mancut anake madosa, buka ngabut entik-entikane uli di tanahe.

← Chapter 1 Chapter 3 →