Obadiah 1

balinese

1Puniki sabdan Ida Sang Hyang Widi Wasa Sane Maha Luur sane kawarahang antuk Dane Obaja ngeniang indik bangsa Edome. Ida Sang Hyang Widi Wasa sampun ngutus utusan Idane ring parabangsane, tur tiang sampun miragi sabdan Idane kadi asapuniki: “Pada sayagaja. Jalan iraga maperang nglawan Edome!”

2Ida Sang Hyang Widi Wasa masabda ring bangsa Edome sapuniki: “Ulun lakar ngawanang kita lemet, tur makejang anake lakar nganistayang kita.

3Kasombongan kitane suba ngapus kita. Ibukotan kitane mabenteng baan batu kaang ane kuat. Umah kitane tegeh di muncuk gununge, ento awanane kita kantos mapineh, kene: ‘Nyen ane lakar nyidayang ngedeng iraga tuun?’

4Yadiastu kita ngae umah tegehne patuh amun sebun sikepe, kantos pangenahne buka di pantaran bintang-bintange, nanging Ulun lakar ngedeng kita tuun.

5Yen ada maling teka dikalaning peteng, ia tuah lakar nyuang ane dotanga dogen. Yening anake ngalap buah anggur, ia setata nyisaang abedik. Nanging musuh-musuh kitane nyapuh kita kanti telah.

6Ih katurunan Esaune, arta branan kitane suba kajarah.

7Kanti-kantin kitane suba ngapus kita, tur ia suba ngulah kita uli di gumin kitane. Bangsane ane madame ngajak kita, ane jani ia ngalahang kita. Sawitran kitane ane ajak kita bareng-bareng madaar suba masangin kita jeet, tur kene raosne: ‘Dijaya sakancan kaduegannyane ipidan?’

8Dipanemayan Ulune nyisipang bangsa Edome, Ulun lakar nyirnayang jlemannyane ane dueg-dueg, tur Ulun lakar nyapuh kawicaksanannyane.

9Parapahlawan wong Temane lakar jejeh ngetor, tur sakancan prajurite di Edom lakar kamatiang.”

10“Sawireh kita suba ngrampokin tur ngamatiang katurunan Yakub nyaman kitane, kita lakar kasirnayang tur kanistayang salawas-lawasne.

11Dugase musuh-musuhne nguugang gapura-gapurannyane, kita jeg majujuk mabalih dogen. Kita jele pesan, patuh buka wong sunantarane, ane nyuang arta brana kasugihan Yerusaleme laut ngadum di pantarannyane.

12Benehne kita tusingja liang dikalan nyaman kitane di Yehuda katiben sengkala. Benehne kita tusing demen nepukin ia kanyagang, tur tusing ngedekin ia dikalane ia kena bencana.

13Benehne kita tusing masuk di kotan kaulan Ulune tur maliang-liang nepukin kasangsarannyane muah nyuang kasugihannyane dimasane ia kena bencana.

14Benehne kita tusingja nongos di pempatan-pempatane tur ngejuk anake ane lakar ngluputang dewekne. Benehne kita tusingja nyerahang ia teken musuh-musuhnyane dugase ia katiben bencana.”

15“Panemayane ento suba paek, nah ento panemayan Ulune, Sang Hyang Widi Wasa lakar nepasin parabangsane. Ih bangsa Edom, unduk ane laksanayang kita ento lakar kalaksanayang masih marep teken kita. Kita lakar nampi apa ane suba pakidihang kita.

16Kaulan Ulune suba maan ukuman keras pesan di gunung Ulune ane suci. Nanging bangsa-bangsa ane ada di kiwa tengennyane lakar kena ukuman ane beratan teken ento. Ia lakar pada kena ukuman berat tur lantas sirna tan pagantulan.”

17“Nanging di Gunung Sione lakar ada makudang-kudang anak ane luput, tur Gunung Sione lakar dadi tongos ane suci. Bangsa katurunan Yakube lakar ngelahang gumine makadadi gelahne.

18Katurunan Yakub muah Yusupe lakar dadi buka apine. Ia lakar ngenyagang katurunan Esaune, patuh buka apine muunang tunggak sumine. Katurunan Esaune lakar telah tan pagantulan. Ulun Ida Sang Hyang Widi Wasa ane suba ngandika buka keto.

19Anak uli Yehuda bagian kelod lakar ngaug gumi Edome, tur ane uli di sampih bukite bedauh lakar nyuang daerah Pilistine. Wong Israele ane lakar ngelahang daerah Epraim muah Samariane, tur wong Benyamine lakar nyuang gumi Gileade.

20Wadua balane ane maselong uli Israel bagian kaja, lakar mabalik tur ngelahang tanah wong Penisiane kanti neked ka Sarpat. Anake ane maselong uli Yerusalem ane nongos di Sardis, lakar ngrampas kota-kotane di tanah Yehuda.

21Parapamenange ane uli di Yerusalem lakar ngebug gumi Edome lantas mrentah ia, tur Ida Sang Hyang Widi Wasa ngraga ane lakar jumeneng ratu.”