Numbers 8

balinese

1Ida Sang Hyang Widi Wasa ngandika ring Dane Musa, kadi asapuniki:

2“Orahinja Harun dikalane ia ngenyit lampune ane pepitu di tumbun lampune ento, apang melahanga pesan ngejang, apanga sinar lampune ento masinaran ka arep.”

3Dane Harun tumuli nglaksanayang sapatitah Ida Sang Hyang Widi Wasa. Lampu-lampune punika tumuli kagenahang marep ka arep.

4Tumbun lampune punika saking muncuk rauh ka bongkol kakardi antuk mas matoktok manut rancangan sane kapakantenang antuk Ida Sang Hyang Widi Wasa ring Dane Musa.

5Ida Sang Hyang Widi Wasa ngandika ring Dane Musa, kadi asapuniki:

6“Anehangja wong Lewine uli pantaran bangsa Israele ane lenan, tur gaenangja ia upacara pabresihan.

7Kene caranne: Ketisin ia aji yeh upacara pabresihan laut tunden ia nyukur muah ngurisin ibanne makaukud tur ngumbah panganggonne. Sasubane keto ia kadanin bresih manut sopacaraning agama.

8Suud keto tunden ia ngalih sampi jagiran bajang aukud, muah aturan gandum amun biasanne ane marupa tepung madukan lengis saitun. Buina kita Musa, patut ngalih sampi jagiran buin aukud, buat anggon aturan panyupat dosa.

9Suba keto paumangja pasamuan Israele, tur wong Lewine tunden ia majujuk di arepan Kemah Linggih Ulune.

10Bangsa Israel patut ngisi sirah-sirah wong Lewine ento.

11Ditu laut Harun ngaturang wong Lewine ento, makadadi aturan istimewa uli bangsa Israel pabuat Ulun, apanga wong Lewine ento nglaksanayang gegaen Ulune.

12Wong Lewine ento patut ngisi tenggek sampi jagirane makadadua ento. Sampine ane aukud patut katurang makadadi aturan panyupat dosa, muah ane buin aukud makadadi aturan maborbor. Malantaran upacarane ane buka keto ento, parawong Lewine bebas uli dosa-dosannyane.

13Aturangja wong Lewine ento teken Ulun, makadadi aturan ane istimewa. Tundenja Harun muah pianak-pianaknyane mimpin wong Lewine ento.

14Keto caranne kita nganehang wong Lewine ento uli di pantaran wong Israel ane lenan, apanga ia dadi duen Ulune.

15Sasubane kita nglaksanayang upacara ngaturang wong Lewine ento, dadinne ia wenang ngayah di Kemah Linggih Ulune.

16Ulun suba nadiang ia silur sakancan pianak wong Israele ane muani ane paling keliha. Sawireh keto ia ajaka makejang kaselik dadi duen Ulune.

17Dugase Ulun ngamatiang pianak-pianak bangsa Mesire ane muani paling keliha, muah panak ubuh-ubuhane ane jumun daana, pianak-pianak kulawargan wong Israele ane muani ane paling keliha muah sakancan ubuh-ubuhane ane lekad jumun daana, suba selik Ulun dadi duen Ulune.

18Ane jani Ulun nyuang wong Lewine makadadi silur pianak-pianak wong Israele ane muani-muani ane paling keliha ento,

19makadadi aturan uli wong Israele. Buina wong Lewine ento ane jani serahang Ulun teken I Harun muah pianak-pianakne, apanga wong Lewine ento nyidayang nyalanang darmaning kapanditan di Kemah Linggih Ulune. Buina apanga wong Lewine ento ane nunasang bangsane ene pangampura teken Ulun, apanga bangsane ene tusing katiban bencana, dikalane ia bes paek teken Tongose Ane Suci.”

20Duaning punika, Dane Musa, Dane Harun miwah bangsa Israele makasami tumuli ngaturang wong Lewine punika ring Ida Sang Hyang Widi Wasa, sakadi sane sampun titahang Ida ring Dane Musa.

21Parawong Lewine raris mresihin deweknyane manut sopacaraning agama, saha ngumbah panganggennyane. Irika Dane Harun raris ngaturang wong Lewine punika makadados aturan istimewa ring ayun Ida Sang Hyang Widi Wasa. Dane taler ngamargiang upacara pabresihan pabuat wong Lewine punika.

22Bangsa Israele tumuli nglaksanayang sapatitah Ida Sang Hyang Widi Wasa ring Dane Musa, ngeniang indik wong Lewine punika. Malantaran punika wong Lewine punika polih wewenang buat ngayah ring Kemah Linggih Ida Sang Hyang Widi Wasa, kapimpin antuk Dane Harun miwah paraputran danene.

23Ida Sang Hyang Widi Wasa masabda ring Dane Musa kadi asapuniki:

24“Ngawit uli matuuh slae tiban, asing-asing wong Lewine patut ngayah di Kemah Linggih Ulune,

25tur yen ia suba matuuh seket tiban ia dadi lepas ayah.

26Sasubane keto ia dadi masih nulungin wong Lewine ane lenan, ane ngayah di Kemah Linggih Ulune, nanging ia tusing dadi magarapan padidiana. Aketo caranne kita nabdabang gegaen wong Lewine ento.”

← Chapter 7 Chapter 9 →