Numbers 25

balinese

1Rikala bangsa Israele ngwangun pakemahannyane ring lebake ring Sitim, paralanang-lanangnyane raris pada mamitra ngajak anak luh-luh Moab sane wenten irika.

2Paraluh-luh Moabe punika ngundang anake lanang-lanang punika ring upacara-upacara piodalan dewa-dewan bangsa Moabe. Wong Israele taler pada nunas surudan tur pada nyumbah Baal,

3dewa sane ring Gunung Peor. Duaning punika Ida Sang Hyang Widi Wasa tumuli duka ring ipun.

4Ida raris ngandika ring Dane Musa, sapuniki: “Punduhangja pamimpin-pamimpin Israele makejang, tur matiang ia ajaka makejang ditu di arepan rakyate, makadadi bukti mungguing kita ngalaksanayang titah Ulun, apanga Ulun tusing duka buin teken bangsane ene.”

5Sasampune punika, Dane Musa raris ngandika ring parapamimpin Israele sapuniki: “Semeton suang-suang patut ngamademang asing-asing anak sane sampun nyumbah Baal ring pantaran suku bangsan semetone.”

6Rikala Dane Musa miwah rakyate sami pada geleng masesambatan ring lawang Kemah Linggih Ida Sang Hyang Widi Wasa, dane raris ngaksi wong Israel adiri ngajak anak luh Midian ngranjing ka kemahnyane.

7Wau Dane Pinehas okan Dane Eleasar, putun Dane Harun ngaksi indike punika, dane tumuli matangi tur medal saking papunduhane punika. Dane raris ngambil tumbak,

8saha ngetut anake muani miwah luh punika ka tengah kemahipune. Irika dane raris numbak anake punika, kantos bedah makakalih. Malantaran punika grubuge sane sedek ngrubeda ring Israel raris wusan.

9Nanging daweg punika sampun wenten 24.000 anak sane padem.

10Ida Sang Hyang Widi Wasa tumuli masabda ring Dane Musa, sapuniki:

11“Pinehas tusing nyak masidi kara ngajak anak ane nyumbah widi lenan, sajabaning Ulun. Sawireh keto Ulun tusing enu duka teken bangsa Israel, tur Ulun suud nyirnayang ia.

12Sawireh keto orahang teken Pinehas, mungguing Ulun ngae prajanjian teken ia nganti salawas-lawasne.

13Ia muah katurunannyane katetepang dadi pandita kanti salawas-lawasne, sawireh ia tusing nyak masidi kara ngajak anak ane nyumbah widi lenan sajabaning Ulun. Malantaran ento, Ulun ngampurayang dosan wong Israele.”

14Jadma Israel sane kapademang ngajak anak luh Midian punika mawasta Simri, pianak Salu, sinalih tunggaling kepala kulawarga saking suku Simeon.

15Anake luh punika mawasta Kosbi, pianak Sur, satunggaling kepala palingsehan ring pantaran wong Midiane.

16Ida Sang Hyang Widi Wasa raris mapaica titah ring Dane Musa, kadi asapunika:

17“Gebugja wong Midiane ento, tur sirnayangja ia,

18malantaran kajaatan ane suba laksanayanga, dugase ia ngapus kita di Peor, muah ulihan Ni Kosbi, ane kamatiang dugase ada grubug di Peor ento.”

← Chapter 24 Chapter 26 →