Nehemiah 9

balinese

1Ring tanggal patlikur ring sasihe punika, rakyat Israele pada mapupul jaga mapuasa buat nyinahang kasedihannyane malantaran dosa-dosannyane. Ipun sampun pada malasang dewek saking parawong sunantara. Ipun pada nganggen pangangge kaduhkitan tur nyambehin sirahnyane antuk abu makacihna nandang kaduhkitan. Sasampune punika, ipun tumuli pada majujuk tur ngangkenin dosa-dosanipune miwah dosa-dosan leluurnyane sane sampun kardi ipun.

3Tigang jam suenipun Pidabdab Ida Sang Hyang Widi Wasa, Widin ipune kawacen pabuat ipun, miwah tigang jam sapanglanturipun, ipun pada ngangkenin dosa-dosanipune saha ngaturang bakti ring Ida Sang Hyang Widi Wasa, Widinipune.

4Irika panggung genah parawong Lewine, tur Dane Yesua, Bani, Kadmiel, Sebanya, Buni, Serebya, Bani miwah Dane Kenani pada ngadeg ring panggunge punika. Dane sareng sami ngastawa antuk suara sane keras pamantuka ring Ida Sang Hyang Widi Wasa, Widinnyane.

5Dane Yesua, Kadmiel, Bani, Hasabneya, Serebya, Hodia, Sebanya miwah Dane Petahya, nauhin rakyate mangda pada ngaturang bakti. Sapuniki baos danene: “Pada ngadegja semeton, tur pujija Ida Sang Hyang Widi Wasa, Widin semetone! Pujija Ida kantos salami-laminipun! Pujija parab Idane sane maha luih, yadiastu pujian manusane tan wenten sane sampurna!”

6Sapangrarisipun, pasamuan Israele tumuli ngastawa sapuniki: “Oduh Ratu Sang Hyang Widi Wasa, wantah IRatu ngraga sane maraga Widi. Palungguh IRatu sane ngardi akasa miwah bintang-bintange ring langite. Palungguh IRatu ngardi pretiwi miwah segara rauhing sadagingipun. Palungguh IRatu mapaica urip ring saluiring sane murip. Wadua bala suargane pada sumungkem nyumbah IRatu.

7Singgih Ratu Sang Hyang Widi Wasa, IRatu nyelik Dane Abram tur nantan dane medal saking Ur-Kasdim. IRatu ngentosin pesengan danene dados Abraham.

8Palungguh IRatu ngaksi mungguing dane jati pracaya ring IRatu, tur IRatu ngardi prajanjian ring dane. Palungguh IRatu majanji jaga maicayang ring dane gumin wong Kanaane, wong Het miwah wong Amorine, jagat wong Peris, Yebus miwah wong Girgasine, makadados genah magumana pabuat katurunan danene. Palungguh IRatu ngamanggehang prajanjian IRatune, santukan IRatu maraga satia.

9Palungguh IRatu ngaksi kasangsaran leluur titiange ring Mesir. Palungguh IRatu mireng gelurannyane nunas tulung ring Segara Teberau.

10Palungguh IRatu ngardi katawahan-katawahan sane ngangobin nglawan sang prabu, nglawan paraprakanggen idane miwah rakyate ring jagat idane, duaning IRatu wikan ring pangala-alannyane marep ring kaulan IRatune. Malantaran punika, IRatu ngawinang parab IRatune kabinawa rauh mangkin.

11Palungguh IRatu ngardi margi ring tengah segarane pabuat kaula druene, tur nantan ipun mamargi ring tanahe sane tuh. Jadmane sane nguber ipun kalebu ring toyane sane dalem, sakadi batune nyilem ring sawang segarane.

12Palungguh IRatu nantan ipun antuk mega rikalaning rahina, tur rikalaning wengi Palungguh IRatu ngalangin pamarginnyane antuk geni.

13Ring Gunung Sinai Palungguh IRatu tumurun saking langite. Palungguh IRatu ngandika ring kaulan IRatune tur ngicen ipun pidabdab sane becik miwah paurukan-paurukan sane pasti.

14Palungguh IRatu nguruk ipun mangda nyuciang rahina Sabat druene, tur Palungguh IRatu maicayang pidabdab-pidabdab IRatune ring parakaulan IRatune malantaran Dane Musa.

15Rikala ipun seduk, IRatu ngicen ipun roti saking langite, tur rikala ipun bedak IRatu ngicen ipun toya sane medal saking batu kaange. IRatu ngandikain ipun mangda miara jagat sane janjiang IRatu ring ipun.

16Nanging paraleluur titiange raris sumbung tur bengkung, tur tempal ring titah-titah IRatune.

17Ipun nenten sairing ring titah IRatune tur ipun lali ring saluiring pakardin IRatune. Ipun lali ring praciri-praciri sane sampun adakang IRatu. Sajeroning kasombonganipune, ipun milih satunggaling pamimpin buat mimpin ipun mawali ka genahipune dados panjak ring Mesir. Nanging Palungguh IRatu maraga Widi sane ngampurayang, darma miwah asih sueca, tur nenten gelis duka. Agung pisan sih kawelas arsan Palungguh IRatune. Palungguh IRatu nenten nilarin ipun.

18Ipun ngardi arca lembu tur mabaos mungguing arca punika dados widinnyane sane nantan ipun saking panegara Mesir. Oduh Ratu Sang Hyang Widi Wasa, ambate bangetipune sampun nganistayang IRatu.

19Nanging Palungguh IRatu nenten ngutang ipun ring tanah melakange, duaning kawelas arsan Palungguh IRatune kalintang ageng. Palungguh IRatu nenten ngingsirang mega wiadin genine sane nyuluhin pamarginipune rahina miwah wengi.

20Malantaran kabecikan Palungguh IRatune, IRatu sampun ngandikain ipun indik sane patut laksanayang ipun. Palungguh IRatu mapaica manna makadados panganipune, tur mapaica toya pabuat kinumnyane.

21Sajeroning petang dasa taun ring tanah melakange, Palungguh IRatu nyediayang saluiring kabuatannyane. Panganggennyane nenten naenin uek, tur buntutnyane nenten kembung-kembung kasakitan.

22Palungguh IRatu nglugrain ipun ngaonang bangsa-bangsa miwah kaprabon-kaprabone, jagat-jagat sane wenten ring tepi siring panegarannyane. Ipun ngaonang jagat Hesbon sane kaprentah antuk Ida Sang Prabu Sihon, tur ngaonang jagat Basan sane kaprentah antuk Sang Prabu Og.

23Palungguh IRatu mapaica pianak akeh pisan ring ipun tan bina sakadi bintang-bintang ring langite, tur nglugrain ipun ngaonang tur magenah ring jagat sane sampun janjiang tur jaga paicayang IRatu ring paraleluurnyane.

24Ipun ngaonang jagat Kanaan. IRatu ngaonang jadmane sane magenah irika. Palungguh IRatu mapaica kakuatan ring kaulan IRatune buat ngamargiang napi sane demenin ipun marep ring rakyat miwah ratu Kanaane.

25Parakaulan IRatune sampun ngrampas kota-kota sane mabenteng, tanah sane gemuh, umah sane bek madaging kasugihan, semer sane sampun sedia, wit saitun, wit woh-wohan miwah abian anggur. Ipun neda napija sane demenin ipun, tur ipun sayan mokoh. Ipun muponin sakancan sane becik sane paicayang IRatu ring ipun.

26Nanging kaulan IRatune brontak tur tan sairing ring IRatu, ipun tungkas ring pidabdab IRatune. Ipun nyedayang paranabine sane nglemekin ipun, sane mituturin ipun mangda ipun mawali ka ayun IRatu. Ipun nganistayang IRatu sapanjang masa.

27Duaning punika Palungguh IRatu manggayang meseh-mesehnyane ngaonang tur mrentah ipun. Rikala ipun kamewehan, ipun masesambatan nunas tulung ring IRatu, tur IRatu nagingin pinunasipune saking suargan. Sajeroning sih pasuecan IRatune sane ageng, IRatu ngicen pamimpin-pamimpin buat mebasang ipun saking meseh-mesehipune.

28Rikala sampun dame, ipun malih ngardi dosa, tur IRatu manggayang malih meseh-mesehipune ngaonang ipun. Yadiastun asapunika, yening ipun kapok tur nunas karahayuan ring IRatu, Palungguh IRatu setata mireng saking suargan, tur nyabran masa Palungguh IRatu ngluputang ipun antuk sih piwelas Palungguh IRatune sane ageng.

29Palungguh IRatu mapakeling ring ipun mangda ipun ninutin paurukan-paurukan IRatune, nanging malantaran sumbungipune, ipun nulak Pidabdab-pidabdab IRatune, yadiastu malantaran ipun tinut ring Pidabdab Palungguh IRatu punika ipun jaga muponin urip. Antuk manah sane bengkung tur punggung ipun nenten nyak sairing.

30Palungguh IRatu sabar mapakeling ipun nyabran taun. Palungguh IRatu ngwisikin paranabin IRatune mangda dane pada mabaos, nanging parakaulan IRatune pada bongol. Duaning punika IRatu manggayang ipun kakaonang antuk bangsa-bangsa sane tiosan.

31Nanging yadiastu kadi asapunika, malantaran sih kawelas arsan Palungguh IRatune sane kalintang ageng, Palungguh IRatu nenten ngutang wiadin nyirnayang ipun. Palungguh IRatu maraga Widi sane sih sueca miwah sih kapiolas.

32Oduh Ratu Sang Hyang Widi Wasa, Widin titiange, Palungguh IRatu kalangkung agung, maha luih lan maha wisesa. Palungguh IRatu satia tuu ngagem prajanjian-prajanjian IRatune. Ngawit saking duk Sang Prabu Asure nindes titiang kantos rauh mangkin kalintang ageng kasangsaran titiange. Pararatun titiange, parapamimpin, parapandita miwah paranabin titiange, paraleluur titiange makamiwah rakyate makasami sampun nandang sangsara. Ledang Palungguh IRatu eling kadi asapunapi ageng sangsaran titiange.

33Sampun sapatutipun Palungguh IRatu nyisipang titiang. Palungguh IRatu satia tuu, yadiastu titiang sampun ngardi dosa.

34Paraleluur titiange, pararatun titiange, parapamimpin miwah parapanditan titiange, sampun nenten ngamanggehang Pidabdab Palungguh IRatune. Ipun sampun nenten nglinguang titah-titah miwah panglemek-panglemek IRatune.

35Malantaran sih panugrahan IRatune, pararatune mrentah kaula druene, rikala ida malinggih ring jagat sane linggah tur gemuh landuh, sane paicayang IRatu ring ida, nanging ida nenten kayun ngutang dosan idane tumuli ngancangin Palungguh IRatu.

36Sane mangkin titiang dados panjak ring tanah sane paicayang IRatu ring titiang, tanah sane gemuh tur ngwehin titiang babuktian.

37Sakancan pamupon tanahe puniki dados paderbean pararatu sane adegang IRatu buat nitah titiang, santukan titiang sampun madosa ring Palungguh IRatu. Pararatune punika nyapa kadi aku marep ring titiang miwah ingon-ingon titiange, tur titiang nandang sangsara banget pisan.”

38Malantaran sakancan paindikane punika makasami, tiang miwah rakyat Israel raris ngardi prajanjian sane matulis, tur parapamimpin tiange miwah parapanditane tumuli nagingin cap surat prajanjiane punika.

← Chapter 8 Chapter 10 →