Nehemiah 7

balinese

1Sane mangkin temboke sampun majujuk malih. Gapura-gapurane sampun kapasang ring genahnyane suang-suang, tur juru gebag Perhyangane, parajuru kidung miwah parawong Lewi sane tiosan sampun ngagem pakaryannyane.

2Tiang raris ngangkat anak kekalih buat mrentah kota Yerusaleme, inggih punika: nyaman tiange Hanani miwah Hananya sane dados komandan bentenge. Hananya punika anak sane kapiandel tur anak sane ajerih ring Ida Sang Hyang Widi Wasa saha tan wenten sane nyamenin.

3Tiang mrentahang sang kalih mangda sampunang mukak gapura-gapuran Yerusaleme kantos suryane sampun ngenter, tur ngubetang gapura-gapurane punika miwah masang palangnyane sadurung parapajagaane budal rikalaning surup surya. Tiang taler mrentahang sang kalih mangda ipun milih pajagaan-pajagaan saking rakyate sane magenah ring kota Yerusalem, tur ngenahang makudang-kudang saking pantaran ipune ring pos-pos pajagaane, tur sane tiosan mangda ngronda daerahnyane ring saileh umah-umahipune.

4Kota Yerusalem punika ageng, nanging nentenja akeh jadmane sane magenah ring kotane punika, tur durung akeh umah-umah sane sampun kawangun.

5Ida Sang Hyang Widi Wasa ngwisikang ring manah tiange mangda tiang munduhang rakyate miwah parapamimpin lan prakanggennyane, tur nureksain daptar kulawargannyane. Tiang manggihin daptar jadmane sane riinan mawali saking paselongan, tur sapuniki catetan sane panggihin tiang.

6Akeh jadmane sane maselong ring wewidangan panegara Babele mawali ka Yerusalem miwah wewidangan Yehudane. Ipun pada mawali ka kotannyane suang-suang. Kulawarga-kulawargannyane magenah ring paselongan ring Babel, ngawit saking daweg Ida Sang Prabu Nebukadnesar makta ipun mrika dados tawanan.

7Parapamimpinnyane, inggih punika: Dane Serubabel, Yosua, Nehemia, Asarya, Raamya, Nahamani, Mordekai, Bilsan, Misperet, Bigwai, Nehum miwah Dane Baana.

← Chapter 6 Chapter 8 →