Leviticus 8

balinese

1Ida Sang Hyang Widi Wasa ngandika ring Dane Musa sapuniki:

2“Ajakja I Harun muah pianak-pianaknyane ka arep gapuran Kemah Linggih Ulune, tur abaja busana kapanditane, lengis upacara, godel sampi jagiran aukud buat aturan panyupat dosa, biri-biri muani dadua muah kranjang misi roti ane tan paragi.

3Sasubane keto tunden bangsa Israele makejang pada mapunduh ditu.”

4Dane Musa tumuli nglaksanayang sapatitah Ida Sang Hyang Widi Wasa. Rikala bangsane punika pada sampun mapunduh,

5dane raris ngandika ring pasamuane sapuniki: “Paindikan sane jaga margiang tiang mangkin puniki, inggih punika paindikan sane sampun kapituduhang antuk Ida Sang Hyang Widi Wasa.”

6Dane Musa tumuli ngajak Dane Harun miwah paraputran danene ngarepang tur ngandikayang mangda dane ngamargiang upacara masuci.

7Sasampune punika Dane Harun raris karangsukin busana, inggih punika kawaca miwah jubah, miwah wangkong danene kapepetetin. Dane taler karangsukin epod, epode punika kaseetang ring wangkong danene.

8Dane kasalukin tabeng dada sane ring tengahnyane madaging Urim miwah Tumim.

9Duur danene kasalukin sorban tur sorbane punika kadagingin rerenggan mas, makacihna mungguing Dane Harun sampun dados padruen Ida Sang Hyang Widi Wasa. Punika makasami kamargiang antuk Dane Musa anut ring pituduh Ida Sang Hyang Widi Wasa ring dane.

10Sasampune punika Dane Musa raris ngambil minyak upacarane punika, tur kolesang ring Kemah Linggih Ida Sang Hyang Widi Wasa miwah ring saluiring prabot sane wenten ring jeroan kemahe punika. Malantaran punika dane ngaturang makasami ring Ida Sang Hyang Widi Wasa.

11Dane tumuli ngambil minyak upacarane punika akidik raris kaketisang ping pitu ring pamorboran aturane miwah ring saananing prabotnyane, miwah ring jambangan pawasuhane rauh ka dasarnyane. Malantaran kadi asapunika dane ngaturang prabote punika makasami ring ayun Ida Sang Hyang Widi Wasa.

12Sasampune punika dane nglantik Dane Harun malantaran mriokang minyak upacara akidik ring duur danene.

13Wusan punika, Dane Musa ngajak paraputran Dane Harun ngarepang tur kasalukin kawaca, pepetet ring wangkongnyane, miwah topin pandita ring duurnyane suang-suang manut ring sane sampun kasabdayang antuk Ida Sang Hyang Widi Wasa ring dane.

14Sasampune punika godel banteng jagirane punika raris kabakta antuk Dane Musa, kanggen aturan panyupat dosa, tur Dane Harun miwah paraputran danene ngambel tenggek bantenge punika.

15Bantenge punika raris katampah antuk Dane Musa, tur getihipune kambil akidik, raris kolesang ring tanduk-tanduke sane wenten ring bucu-bucun pamorboran aturane, mangda malantaran punika pamorboran aturane punika kantebang dados padruen Ida Sang Hyang Widi Wasa. Sisan getihe punika raris kabriokang ring dasar pamorboran aturane. Malantaran punika dane ngaturang tur nyuciang pamorboran aturan punika.

16Dane Musa tumuli ngambil saananing muluk sane wenten ring jejeron bantenge punika. Dane taler ngambil sane pinih becik saking atinnyane, ginjel miwah muluk sane wenten ring ginjelnyane, tumuli kaborbor ring pamorboran aturane.

17Sisan bantenge punika rauh ka kulitipune, daging miwah jejeronnyane, tumuli katunjel ring jabaan pakemahane, sakadi sane kapituduhang antuk Ida Sang Hyang Widi Wasa.

18Wusan punika Dane Musa tumuli makta biri-birine muani sane kanggen aturan maborbor, tur Dane Harun miwah paraputran danene ngambel tenggek biri-birine punika.

19Dane Musa raris nampah biri-birine punika, tur getihipune kasriokang ring sisin pamorboran aturan punika makaileh.

20Biri-birine muani punika raris kapukang-pukang, jejeron miwah batisne durian kumbah antuk toya, tur tenggek, muluk miwah sisan biri-birine punika makasami kaborbor ring pamorboran aturane, sakadi sane sampun kapituduhang antuk Ida Sang Hyang Widi Wasa. Aturan sane maborbor punika makadados aturan rayunan tur ambunnyane ngledangin pakayunan Ida Sang Hyang Widi Wasa.

22Sasampune punika Dane Musa raris makta biri-biri muani sane lianan, inggih punika biri-biri pabuat aturan palantikan panditane punika, tur Dane Harun miwah paraputran danene tumuli ngambel tenggek biri-birine punika.

23Dane Musa tumuli nampah biri-birine punika, tumuli dane ngambil getihnyane akidik, raris kolesang ring daun karnan Dane Harun sane tengen, ring inan tangan danene sane tengen, miwah ring inan cokor danene sane tengen.

24Sasampune punika paraputran Dane Harun raris kapangandikayang ngarepang tur Dane Musa raris ngolesang getih ring daun karnan danene sane ring tengen, ring inan tangan danene sane ring tengen miwah ring inan cokor danene ring tengen. Sisan getihe punika raris kasriokang antuk Dane Musa ring sisin genah aturane punika makaileh.

25Muluk ipune, ikuh sane madaging muluk, muluk sane ngaput jejeronnyane makasami, bagian ati sane pinih becik, ginjel miwah muluk sane wenten ring ginjel punika, buntutipune sane tengawan durian, punika kambil antuk Dane Musa.

26Sasampune punika dane raris ngambil roti sane tan paragi saking kranjange, sane katurang ring ayun Ida Sang Hyang Widi Wasa, roti sane madaging minyak saitun asiki, miwah roti kering asiki. Makasami punika genahang dane ring duur muluk miwah buntut aturan wewalungan sane tengawan punika.

27Makasami aturane punika raris genahang dane ring tlapakan tangan Dane Harun miwah ring tlapakan tangan putra-putran danene, tumuli katurang dados aturan sane istimewa ring ayun Ida Sang Hyang Widi Wasa.

28Sawusan punika Dane Musa raris ngambil aturane punika saking tangan Dane Harun miwah saking tangan paraputran danene tumuli kaborbor ring pamorboran aturane, ring duur aturane sane maborbor, makadados aturan palantikan sang pandita. Punika aturan rayunan, tur ambunnyane ngledangin pakayunan Ida Sang Hyang Widi Wasa.

29Sasampune punika Dane Musa tumuli ngambil tangkah biri-birine punika, tumuli katurang dados aturan istimewa ring ayun Ida Sang Hyang Widi Wasa. Punika dados eduman Dane Musa saking biri-biri aturan palantikane punika. Dane Musa nglaksanayang paindikane punika makasami saadung ring sane sampun kapituduhang antuk Ida Sang Hyang Widi Wasa.

30Dane Musa tumuli ngambil minyak upacarane miwah getih akidik sane wenten ring duur pamorboran aturane punika, tumuli kaketisang ring ragan Dane Harun miwah paraputran danene, miwah ring busanan danene sareng sami. Malantaran punika dane ngaturang Dane Harun miwah paraputran danene, ping kalih busanan danene sareng sami, ring ayun Ida Sang Hyang Widi Wasa.

31Dane Musa raris mabaos ring Dane Harun miwah ring paraputran danene sapuniki: “Rarisang bakta ulame punika ring ajeng gapuran Kemah Linggih Ida Sang Hyang Widi Wasa tur ratengangja irika, tur ajengang irika sasarengan ring roti aturan palantikane sane wenten ring kranjange, sakadi sane kapituduhang antuk Ida Sang Hyang Widi Wasa.

32Tur sisan roti miwah daginge punika rarisang tunjel.

33Semeton sampunang pisan matilar saking gapuran Kemah Linggih Ida Sang Hyang Widi Wasa pitung rahina suenipun, kantos upacara palantikan semetone puput makasami, wau dados mapamit.

34Ida Sang Hyang Widi Wasa nitahang ring iraga, mangda iraga nglaksanayang paindikane sane sampun laksanayang iraga ring rahinane puniki mangda dosa-dosan semetone kampurayang.

35Semeton patut meneng ring gapuran Kemah Linggih Ida Sang Hyang Widi Wasa rahina wengi, pitung rahina suenipun, sinambi nglaksanayang sane sampun kapituduhang antuk Ida Sang Hyang Widi Wasa. Yening semeton nenten nglaksanayang paindikane punika, semeton pacang padem. Paindikane punika sane sampun kasabdayang antuk Ida Sang Hyang Widi Wasa ring tiang.”

36Dane Harun miwah paraputran danene raris nglaksanayang saluiring sane kapituduhang antuk Ida Sang Hyang Widi Wasa malantaran Dane Musa.

← Chapter 7 Chapter 9 →