Leviticus 27

balinese

1Ida Sang Hyang Widi Wasa maicayang ring Dane Musa,

2pidabdab-pidabdab sane inucap ring sor puniki, pabuat bangsa Israele. Yening wenten anak sane sampun katurang ring ayun Ida Sang Hyang Widi Wasa, makadados panaur sesangi ring Ida, anake punika dados katebus malantaran ngaturang jinah panebus,

3manut pangarga sane katetepang ring Kemah Linggih Ida Sang Hyang Widi Wasa inggih punika: - Anak lanang sane matuuh kalih dasa kantos nem dasa taun, 50 bidang jinah perak. - Anak istri sane sampun kelih, 50 bidang jinah perak. - Anak lanang sane matuuh lima ngantos kalih dasa taun, 20 bidang jinah perak. - Anak alit istri, 10 bidang jinah perak. - Rare alit lanang sane umurnyane kirangan ring limang taun, limang bidang jinah perak. - Rare alit istri, 3 bidang jinah perak. - Anak lanang sane langkungan ring 60 taun, 15 bidang jinah perak. - Anak istri sane langkungan ring 60 taun, 10 bidang jinah perak.

8Yening anake sane masesangi punika kalintang tiwas, ngantos ipun nenten mrasidayang naur sesangi sane sampun kapastiang punika, ipun patut ngajak anake sane sampun katurang ring Ida Sang Hyang Widi Wasa punika ka ajeng sang pandita. Irika sang pandita patut netepang panebus sane murahan, manut kamampuhan anake punika.

9Yening sesangi punika marupa wewalungan sane dados kanggen aturan ring ayun Ida Sang Hyang Widi Wasa, anake sane masesangi punika tan wenang nyilurin wewalungane punika antuk wewalungan sane lianan, santukan saananing aturan sane katurang ring ayun Ida Sang Hyang Widi Wasa punika suci. Yening ipun nyilurin wewalungane punika, raris wewalungane punika makakalih dados druen Ida Sang Hyang Widi Wasa.

11Nanging yening wewalungan aturane punika marupa wewalungan sane leteh, sane nenten wenang katurang ring ayun Ida Sang Hyang Widi Wasa, anake sane ngaturang wewalungan punika patut makta wewalungane punika ring ajeng sang pandita.

12Sang pandita pacang netepang pangargannyane, manut kawentenan wewalungane punika, tur pangarga sane sampun katetepang antuk sang pandita punika nenten malih dados tawah.

13Yening anake punika malih mamanah numbas wewalungane punika, ipun patut naur pangargan wewalungan punika, saha kimbuhin malih apahliman.

14Yening wenten anak ngaturang umahnyane ring ayun Ida Sang Hyang Widi Wasa, sang pandita patut netepang pangargannyane, manut kawentenan umahe punika. Pangarga sane sampun katetepang punika, nenten dados malih tawah.

15Yening anake sane ngaturang umahe punika malih mamanah jagi numbas umahe punika, ipun patut naur pangargannyane punika, saha kimbuhin apahlimannyane.

16Yening wenten anak ngaturang tanahnyane abagian ring ayun Ida Sang Hyang Widi Wasa, pangargan tanahe punika katetepang manut akeh winih sane kanggen nandurin tanahe punika. Buat bibit gandum sane kalih dasa kilogram akehipun, katetepang pangarganipun dasa bidang jinah perak.

17Yening tanahe punika katurang riwau wusan Taun Kabebasane, pangargannyane patut kataur sategepipun.

18Yening tanahe punika katurang sasampun maletan makudang-kudang taun, sang pandita patut naksir pangargannyane, manut akeh taun sane kantun, rauh ring Taun Kabebasane sane jaga rauh, raris netepang pangarga sane murahan ring punika.

19Yening anake sane ngaturang tanahe punika mawali mamanah numbas tanahe punika, ipun patut naur pangargan tanahe punika, saha kimbuhin malih apahliman.

20Yening ipun ngadol tanahe punika ring anak lianan sadurung tebus ipun ring ayun Ida Sang Hyang Widi Wasa, ipun nenten dados malih numbas tanahe punika.

21Ring Taun Kabebasan sane jaga rauh, tanahe punika dados druen Ida Sang Hyang Widi Wasa ngantos salami-laminipun, tur kapaicayang ring parapanditane.

22Yening wenten anak ngaturang pategalan sane antuk ipun numbas,

23sang pandita patut naksir pangargannyane, manut akeh taun sane kantun, ngantos rauh Taun Kabebasane sane jaga rauh. Raris anake punika patut naur pangargannyane ring rahinane punika ugi. Jinahe punika dados druen Ida Sang Hyang Widi Wasa.

24Ring Taun Kabebasane, tegale punika patut kawaliang ring sang sane nerbeang pangawit wiadin ring katurunannyane.

25Saananing pangarga punika patut katetepang manut pangarga sane resmi.

26Wewalungan sane lekad pangawit, punika dados druen Ida Sang Hyang Widi Wasa. Punika awinanipun jadmane sami nenten dados ngaturang wewalungan punika ring ayun Ida Sang Hyang Widi Wasa, makadados aturan saking suka lila. Panak banteng, panak biri-biri miwah panak kambing sane lekad jumun daana, punika dados druen Ida Sang Hyang Widi Wasa.

27Wewalungan sane leteh, sane lekad jumun daana punika dados katebus manut pangarga sane resmi, saha kimbuhin malih apahliman. Yening nenten katebus wewalungane punika dados kadol ring anak tiosan manut pangarga sane resmi.

28Tan wenten anak kalugra ngadol wiadin malih numbas sane sampun katurang saking nekeng ati ring ayun Ida Sang Hyang Widi Wasa, yadian aturane punika marupa manusa, wewalungan wiadin tanah. Punika makasami dados druen Ida Sang Hyang Widi Wasa, ngantos salami-laminipun.

29Kadi asapunika taler manusa sane sampun katurang saking nekeng ati, ipun nenten dados katebus, ipun patut kapademang.

30Saananing pamupon tanahe makasami, yadian gandum wiadin woh-wohan apahdasannyane punika dados druen Ida Sang Hyang Widi Wasa.

31Yening wenten anak malih mamanah jaga numbas abagian, ipun patut naur sakadi sane sampun katetepang, saha kimbuhin malih apahliman.

32Sabilang ingon-ingonnyane adasa, asiki dados druen Ida Sang Hyang Widi Wasa. Yening ingon-ingone punika kawilang, sabilang ingon-ingon sane kaping dasa, punika dados druen Ida Sang Hyang Widi Wasa.

33Sang maderbe ingon-ingone punika nenten dados ngatur ingon-ingone punika kantos wewalungane sane kaon sane keni kapilih. Ipun taler nenten dados nyilurin wewalungane punika. Yening silurin ipun antuk wewalungan sane lianan, kenginan wewalungane punika makakalih dados druen Ida Sang Hyang Widi Wasa tur nenten dados malih katumbas.

34Kadi asapunika pituduh-pituduh sane kapaicayang antuk Ida Sang Hyang Widi Wasa, ring Dane Musa ring duur Gunung Sinaine, pabuat bangsa Israele.