Leviticus 20

balinese

1Ida Sang Hyang Widi Wasa ngandikayang Dane Musa,

2mangda dane ngrauhang sabdan Idane ring bangsa Israele, kadi asapuniki: “Asing-asing anak di pantaran kitane wiadin wong sunantara ane nongos di gumin kitane, ane nyerahang pianakne buat anggona aturan sajeroning pangubakti teken Dewa Molok, anake ento patut kencurin aji batu kanti mati baan rakyate ajaka makejang.

3Yening ada anak nyerahang salah tunggal pianakne dadi aturan teken Dewa Moloke, kanti ia ngletehin Kemah Ulune ane suci, muah nganistayang parab Ulune ane suci, Ulun lakar nglawan anake ento, tur Ulun tusing enu buin ngangkenin ia dadi kaulan Ulune.

4Nanging yening rakyate nyelapang tusing rungu teken anake ento, tur tusing ngukum anake ento kanti mati,

5Ulun lakar nglawan anake ento, muah sakancan kulawargannyane, aketo masih nglawan anake ane sruron teken ia buat nilas Ulun tur mabakti teken Dewa Moloke ento. Anake ento ajaka makejang tusing enu angkenin Ulun dadi kaulan Ulune.

6Yening ada anak ngidih pepineh teken anake ane bisa ngidih pepineh teken roh anak ane suba mati, Ulun lakar nglawan anake ento, tur ia tusing angkenin Ulun dadi kaulan Ulune.

7Yatnainja dewek kitane, apanga kita enu tetep suci, sawireh Ulun ene Ida Sang Hyang Widi Wasa, Widin kitane.

8Tinutinja pidabdab Ulune, sawireh Ulun ene Ida Sang Hyang Widi Wasa, tur Ulun suba nyelik kita.”

9Ida Sang Hyang Widi Wasa maicayang pidabdab sane inucap ring sor puniki: “Asing-asing anak ane nemah bapa wiadin memennyane, ia patut kukum mati. Ia mati ulihan pelihne padidi.

10Yening ada anak Israel mamitra ngajak somah timpalne paturu bangsa Israel, anake ento makadadua, luh muani patut kukum mati.

11Anake muani ane matemu semara ngajak salah tunggal kurenan bapanne, ia ngranayang bapannyane kimud. Anake muani muah anake luh ento patut kukum mati. Ia ngemasin mati ulihan dosannyane padidi.

12Yen ada anak muani matemu semara ngajak mantunnyane, anake ento makadadua patut kukum mati. Ia ajaka dadua suba mamurug adat, tur ia ngemasin mati ulihan dosannyane padidi.

13Yen ada anak muani matemu semara ngajak anak muani lenan, ia ajaka dadua suba nglaksanayang paundukan ane cemer, tur ia ajaka dadua patut kukum mati. Ia ngemasin mati ento ulihan pelihne padidi.

14Yen ada anak muani nyuang anak luh kayang ka memennyane kanggon kurenan, anake makatelu ento patut katunjel kantos mati, sawireh ia suba malaksana ane tusing patut. Laksana ane buka keto patut tusing ada di pantaran kitane.

15Yen ada anak muani masanggama ngajak buron, anake muani muah burone ento patut kukum mati.

16Yen ada anak luh ngindayang masanggama ngajak buron, anake luh muah burone ento patut kukum mati. Ia ngemasin mati, ulihan pelihne padidi.

17Yen ada anak muani ane nyuang nyama tugelan wiadin nyama kualonnyane ane luh anggona kurenan, anake ento patut kanistayang di arepan anake liu, lantas kasepekang uli pasamuane. Anake ento suba masanggama ngajak nyamannyane ane luh, sawireh keto, ia patut nampi palannyane.

18Yen ada anak muani ane matemu semara ngajak anak luh ane nuju sebel di awak, anake ento makadadua patut kasepekang uli pasamuan, sawireh ia suba lempas uli pidabdab unduk kasucian manut sopacaraning agama.

19Yen ada anak muani ane matemu semara ngajak bibinnyane, anake makadadua ento patut ngemasin karma palannyane ane lempas teken adat ento.

20Yen ada anak muani matemu semara ngajak kurenan pamannyane ia nganistayang pamannyane. Anake muani muah anake luh ento patut ngemasin ukuman, nah ento ia ajaka dadua tusing lakar dadi ngelah pianak.

21Yen ada anak muani ane nyuang kurenan belinne, ia lakar mati tan pasentana. Ia suba malaksana tan patut tur nganistayang belinnyane.”

22Ida Sang Hyang Widi Wasa masabda kadi asapuniki: “Tinutinja sakancan pidabdab muah pituduh Ulune, apanga kita tusing kulah uli tanah Kanaan, sig tongos Ulune suba nuntun kita.

23Edaja kita ninutin adat istiadat jlemane ane nongos ditu. Jlemane ane tan pawidi ento suba ngranayang Ulun duka, malantaran sakancan laksanannyane ane jaat. Ento kranane ane jani Ulun ngulah ia, apanga kita nyidayang ngaug gumine ento.

24Ulun suba majanji mungguing tanahe ane gemuh landuh ento lakar dadi gelah kitane. Sawireh keto, Ulun lakar maicayang tanahe ento teken kita. Ulun ene Sang Hyang Widi Wasa, Widin kitane tur Ulun suba nganehang kita uli bangsa-bangsa ane lenan.

25Sawireh keto kita apang bisa maminayang kanti sinah, encen buron muah kedis ane leteh, muah encen ane tusing leteh. Eda kita naar buron muah kedis ane leteh. Burone ento suba adanin Ulun leteh, dadinne yen kita naar burone ento, kita dadi leteh.

26Kita suba anehang Ulun uli bangsa-bangsane ane lenan, apanga kita dadi duen Ulune dogen. Kita patut suci, sawireh Ulun ene Ida Sang Hyang Widi Wasa, tur Ulun maraga suci.

27Asing-asing anak muani wiadin anak luh ane ngidih pepineh teken roh-roh anake ane suba mati, ia patut kencurin baan batu kanti mati. Anake ane buka keto ento ngemasin mati ulihan kapelihannyane padidi.”

← Chapter 19 Chapter 21 →