Joshua 21

balinese

1Sedek rahina anu, parapanglingsir kulawarga-kulawarga suku Lewine raris nangkil ring Sang Pandita Eleasar, miwah ring Dane Yosua, okan Dane Nun, pingkalih ring paralingsir-lingsir kulawarga sajeroning suku bangsa Israele makasami.

2Irika dane matur ring dane sareng sami ring Silo, ring tanah Kanaan, sapuniki atur danene: “Malantaran Dane Musa, Ida Sang Hyang Widi Wasa sampun mapituduh, mangda tiang sareng sami kicen kota genah tiange mumah, miwah tegalan ring kiwa tengen kotane punika, jaga genah tiange ngangonang ingon-ingon tiange.”

3Duaning punika, satinut ring pituduh-pituduh Ida Sang Hyang Widi Wasa, bangsa Israele raris ngicen suku Lewine makudang-kudang kota, miwah pategalan genah ngangonang ingon-ingon, ring pantaran wewidangan dumannyane sareng sami.

4Sane pinih riin polih duman kota inggih punika palingsehan Dane Kehat saking suku Lewi. Kulawarga saking katurunan Pandita Harun, polih duman kota telulas akehipun, sane magenah ring wewidangan suku Yehuda, Simeon miwah Benyamin.

5Kulawarga-kulawargan Dane Kehat sane lianan, polih duman kota adasa akehipun, magenah ring wewidangan suku Epraim, Dan miwah Manase sane dauh Tukad Yordane.

6Kulawargan Dane Gerson, polih duman kota telulas akehipun, magenah ring wewidangan suku Isakar, Aser, Naptali miwah Manase sane dangin Tukad Yordane.

7Kulawarga sajeroning palingsehan Dane Merari polih kota roras akehipun, magenah ring wewidangan suku Ruben, Gad miwah Sebulon.

8Kadi asapunika wong Israele ngedumang kota-kota miwah pategalan genah ngangon ingon-ingon pabuat suku Lewine malantaran mulang undi, sakadi sane sampun kapituduhang antuk Ida Sang Hyang Widi Wasa malantaran Dane Musa.

← Chapter 20 Chapter 22 →