Job 8

balinese

1Dane Bildad sane saking tanah Suah punika raris mabaos sapuniki: “Punapike semeton nenten jaga wusan ngamedalang baos sane sakadi angin mampeh punika?

3Ida Sang Hyang Widi Wasa tansah ngamanggehang kadilan. Ida nenten naenin lempas ngamargiang paindikan sane patut.

4Oka-okan semetone sinah ipun sampun malaksana dosa ring ayun Ida Sang Hyang Widi Wasa. Punika awinannya Ida nyisipang ipun sakadi patutipun.

5Nanging sane mangkin, nangkil tur nunas icaja ring Ida Sang Hyang Widi Wasa Sane Maha Kuasa.

6Yening semeton sawiakti jujur tur suci, sinah Ida Sang Hyang Widi Wasa jaga rauh tur nulungin semeton miwah mecikang malih pakurenan semetone, makadados pikolih semetone.

7Saananing kasugihan semetone sane ical punika tan jaga wenten ajinipun, yan bandingang ring paica sane jaga kapaicayang ring semeton, antuk Ida Sang Hyang Widi Wasa.

8Indayang sliksik kawicaksanaan anake sane nguni-nguni. Indayang pikayun-kayunin kapatutan sane kaplajahin antuk leluur iragane.

9Tuuh iragane cutet pisan. Iraga nenten uning ring punapa-punapi. Tuuh iragane tan bina sakadi lawate sane nglintang ring jagate.

10Nanging banggayangja anake sane wicaksana sane nguni ngajahin semeton. Pirengangja indik sane jaga kapangandikayang ring semeton.

11‘Padange nenten jaga mrasidayang mentik ring genahe sane nenten madaging toya. Nenten jaga wenten padang sajawining ring genahe sane becik.

12Yening toyane nyat, ipun sane pinih riin layu, yadiastun ipun kantun kalintang alit buat jaga karit miwah kagunayang.

13Jadmane sane tan pawidi tan bina sakadi padang-padange punika. Pangajap-ajap ipune sirna, santukan ipun lali ring Ida Sang Hyang Widi Wasa.

14Ipun andel ring benang umah kekawane.

15Yening ipun nyelelegang dewekipune ring umah kekawane punika, punapike umah kekawane punika mrasidayang nyegjegang ipun? Yening ipun ngisiang benang kekawane punika, punapike benang kekawane punika mrasidayang nyujukang ipun?’

16Jadmane dursila tan bina sakadi entik padange sane mentik tengaine. Ipun sakadi padang sane mentik ngebekin tetamanane.

17Akah-akahipune ngaput batu-batune, tur madeket ring sakancan batu kaange.

18Nanging yening ipun kabut saking irika, nenten wenten anak uning, mungguing ipun naenin wenten irika.

19Inggih, kadi asapunika kaliangan jadmane sane dursila. Sane mangkin raris wenten sane lianan rauh tumuli ngambil genahipune.

20Nanging Ida Sang Hyang Widi Wasa nenten naenin ngutang jadmane sane astiti bakti wiadin mapaica pitulung ring jadmane dursila.

21Ida jaga malih nglugrain semeton kedek miwah masuryak-suryak,

22nanging ida pacang ngawinang kimud anake sane geting ring semeton, tur umah jadmane sane dursila jaga sirna.”

← Chapter 7 Chapter 9 →