Job 42

balinese

1Irika Dane Ayub raris matur ring Ida Sang Hyang Widi Wasa, sapuniki:

2“Duh Ratu Sang Hyang Widi Wasa, titiang uning mungguing Palungguh IRatu kalangkung wisesa. Palungguh IRatu mrasidayang ngardi saananing sane arsayang Palungguh IRatu.

3Palungguh IRatu nakenang napi awinan titiange purun nunasang kawicaksanan Palungguh IRatune. Sujatinipun titiang jadma sane kalintang nambet. Titiang maosang paindikan sane nenten karesep antuk titiang, indik katawahan sane kalintang agung pabuat pangresepan titiange.

4Palungguh IRatu ngarsayang mangda titiang miragiang sakantun Palungguh IRatu masabda, tur ngandikayang mangda titiang nyaurin pitaken-pitaken Palungguh IRatune.

5Sujatinipun sane uningin titiang wantah sane sampun katuturang antuk anak lian ring titiang, nanging sane mangkin titiang sampun ngeton Palungguh IRatu antuk matan titiange newek.

6Duaning punika titiang rumasa kimud ngeniang ring saluiring paindikan sane sampun baosang titiang, tur sane mangkin titiang kapok tur maguyang iriki ring buk miwah abune.”

7Sasampune Ida Sang Hyang Widi Wasa puput masabda ring Dane Ayub, Ida raris ngandika ring Dane Elipas, sapuniki: “Ulun duka pesan teken kita muah teken timpal kitane makadadua, wireh kita tusing ngraos ane beneh unduk Ulune, buka ane raosanga baan I Ayub parekan Ulune.

8Ane jani kema ngalih sampi muani pitung ukud muah biri-biri muani pitung ukud, laut ajak I Ayub ngaturang makadadi aturan kitane. I Ayub lakar ngastawayang kita tur Ulun lakar nagingin pinunasne, tur tusing lakar ngaenang kita kimud buka ane patut tampi kita. Kita tusing nuturang ane beneh unduk Ulune buka ane katuturang baan I Ayub.”

9Dane Elipas, Bildad miwah Sopar sairing ring pituduh Ida Sang Hyang Widi Wasa, tur Ida raris nagingin pinunas Dane Ayube.

10Sapanglanturipun, sasampun Dane Ayub ngastawayang sawitran danene tetiga punika, Ida Sang Hyang Widi Wasa raris nglugrain Dane Ayub malih muponin kasugihan. Tur Ida mapaica arta brana nikel ping kalih bandingang ring druen danene sane sampun-sampun.

11Semeton danene lanang istri, miwah parasawitran danene sane lianan makasami pada rauh masuka-suka ngiring dane ring jeroan danene. Dane sareng sami pada nyinahang kapitresnan danene miwah nglipur Dane Ayub ngeniang indik kamewehan sane sampun katibakang antuk Ida Sang Hyang Widi Wasa ring dane. Dane suang-suang pada mapaica jinah miwah ali-ali mas ring Dane Ayub.

12Sapanglanturipun, sapanyeneng Dane Ayub, dane kamertanin antuk Ida Sang Hyang Widi Wasa langkungan ring sane sampun-sampun. Dane madue biri-biri patbelas tali, unta nem tali, banteng kalih tali miwah keledae siu ukud.

13Dane madue oka lanang pepitu miwah oka istri tetiga.

14Okan danene sane istri sane pinih duur kapesengin Yemima sane madia kapesengin Kesia miwah sane pinih alit kapesengin Kerenhapuh.

15Ring sakuub jagate sami, tan wenten anak istri sane nyamenin kaayuan okan Dane Ayub punika. Dane Ayub taler mapaica waris ring oka-okan danene sane istri-istri punika pateh sakadi okan danene sane lanang-lanang.

16Sasampune punika, Dane Ayub nyeneng malih satus petang dasa taun suenipun, kantos dane napetang putu miwah kompiang danene.

17Kenginan Dane Ayub seda, sasampun yusan danene panjang pisan.