Job 29

balinese

1Dane Ayub malih ngawitin mabaos, sapuniki:

2“Dumadakja tiang malih nyidayang muponin urip, sakadi daweg Ida Sang Hyang Widi Wasa kantun ngiangin tiang.

3Ida Sang Hyang Widi Wasa setata ngiangin tiang tur mapaica galang ring tiang rikalaning tiang mamargi ring petenge.

4Masane punika dados masan tiange muponin kawibuhan miwah sih Ida Sang Hyang Widi Wasa nyayubin pumahan tiange.

5Ida Sang Hyang Widi Wasa Sane Maha Wisesa ngiangin tiang, samaliha tiang kiter antuk pianak-pianak tiange makasami.

6Banteng miwah kambing tiange ngwedalang susu kantos maliah-liah miwah wit saitun tiange pada mentik ring tanahe sane mabatu-batu.

7Rikala panglingsir kotane ngwentenang pauman, tiang taler sareng paum irika.

8Paratrunane pada nyamping rikalaning ipun pada manggihin tiang miwah paraanake lingsir-lingsir pada ngadeg ngormatin tiang.

9Parapamimpin rakyate pada wusan mabebaosan,

10kadi asapunika taler parasulinggihe pada meneng mapepan.

11Sakancan anake sane manggihin tiang wiadin anake sane miragi indik tiange, ipun pada maosang becik ngeniang ring paindikan sane sampun kardi tiang.

12Rikala anake tiwas-tiwas pada ngeling nunas tulung, tiang nulungin ipun. Tiang nulungin anake sane ubuh-ubuh sane nenten wenten anak sane ngetangang ipun.

13Jadmane sane katempuh antuk kasangsaran sane ageng, pada muji tiang, tur tiang nulungin anake sane balu-balu mangda ipun sutrepti.

14Tiang setata malaksana adil miwah jujur.

15Tiang makadados paningalan anake sane buta miwah buntut buat anake sane rumpuh.

16Tiang waluya sakadi bapa buat anake sane tiwas-tiwas, tur dados panampih buat wong sunantarane sane katempuh antuk kamewehan.

17Tiang nyirnayang kawisesan jadmane sane nyapa kadi aku, tur ngluputang anake sane kala-ala antuk jadmane sane nyapa kadi aku punika.

18Tiang setata ngajap-ajap mangda tiang nutugang tuuh tur padem jumah sajeroning kabingaran.

19Tiang tan bina sakadi wit taru sane akahnyane tansah ngemu toya miwah carang-carangnyane kabelusin antuk damuh.

20Sakancan anake setata pada muji tiang, tur kakuatan tiange nenten naenin ngadoang tiang.

21Rikala tiang ngamedalang tetimbangan, anake sami pada meneng tur teleb miragiang baos tiange.

22Yening tiang sampun puput mabaos, tan wenten malih anak sane ngwuwuhin baos tiange punika. Raos tiange katelebang waluya sakadi pretiwine ngisep toyan sabehe.

23Sakancan anake pada nampi baose punika waluya sakadi petanine nampi sabeh rikalaning masan endang.

24Tiang masemu kenyem ring ipun, rikala ipun pada tan maderbe pangajap-ajap malih. Sebeng tiange sane bingar ngawinang ipun pada semangat.

25Tiang tumuli nadosang dewek tiange pamimpin, tur ngardi kaputusan. Tiang raris nuntun ipun sakadi sang prabu nuntun wadua balan idane, tur nglipurang ipun rikalaning ipun nenten maderbe pangajap-ajap malih.

← Chapter 28 Chapter 30 →