Job 24

balinese

1Punapi awinannya Ida Sang Hyang Widi Wasa nenten ngwentenang sela buat nibakang tetepasan, inggih punika rahina buat nibakang kadilan ring anake sane astiti bakti ring Ida?

2Wenten jadma sane ngisidang patok tanahnyane, mangda tanahipune nglinggahang. Ipun mamaling biri-biri tur kadukang ring ingon-ingonipune niri.

3Ipun pada ngambil keledae sane dados paderbean anake sane ubuh-ubuh miwah ipun ngadol banteng anake sane balu-balu kantos anake balu punika nebus banteng paderbeannyane.

4Ipun ngalang-alangin anake tiwas-tiwas molih sane dados hakipune, tur anake sane kakirangan pada kulah mangda masingidan.

5Duaning punika anake tiwas tan bina sakadi keledae alasane, sane ngulati tetedan ring tegal melakange sane tuh, kantos dija jua ipun ngrereh tetedan, ipun nenten polih tetedan pabuat panak-panakipune.

6Ipun pada ngampung ring pategalan sane nenten padruenipune, tur ngalap buah anggur ring pabianan anggur anake dursila.

7Rikalaning wengi ipun pules tan pasaput, tur nenten wenten anggen ipun nawengin dingin.

8Ipun belus lepegan antuk sabehe sane tedun ring pagunungan, tur ipun pada majeljel masayuban ring batu kaange.

9Jadmane dursila manjakang rarene ubuh tan pabapa, tur pianak anake tiwas kambil kanggen gegaden.

10Nanging anake sane tiwas patut medal saha tan ngangge pangangge angan akesetan sane ngangkebin dewekipune. Ipun patut nandang seduk ring masan anake pada ngampung gandum.

11Ipun pada nepes woh saitun kanggen minyak miwah meres buah anggur kanggen anggur, nanging ipun newek nandang bedak.

12Ring kota-kota jadmane sane matatu jaga padem pajerit, nanging Ida Sang Hyang Widi Wasa nenten nglinguang pangastawanipune.

13Wenten jadma sane nulak sang galang. Ipun nenten ngresep ring galange punika, tur nenten uning kija jaga ipun katuntun antuk galange punika.

14Rikalaning galang kangin jadmane sane demen ngamademang anak raris bangun, tur ipun raris ngamademang anake tiwas, tur rikalaning wengi ipun mamaling.

15Jadmane sane seneng mamitra nyantosang mangda rahinane gelis sore. Ipun nekep muanipune mangda nenten wenten anak sane ngantenang ipun.

16Rikalaning wengi dustane pada mongpong umah, nanging rikalaning rahina ipun pada mengkeb miwah ngelidin galang.

17Ipun pada ajerih ring galang rahinane, nanging peteng dedete nenten ngawinang ipun rumasa resres.”

18“Jadmane dursila anyud kasampatang antuk blabare, tur tanahipune wenten ring sor kakuasan Ida Sang Hyang Widi Wasa. Ipun nenten malih makarya ring pabianan angguripune.

19Sakadi saljune nyag ring masan panese, kadi asapunika taler jadmane madosa sirna saking pantaran jadmane sane urip.

20Sane mangkin, yadian memenipune taler nenten eling ring ipun. Ipun sampun kabaksa antuk cacing-cacinge tur kasirnayang sakadi tarune sane pungkat.

21Paindikane punika mamargi kadi asapunika santukan ipun nyangsaren anak balu, tur nyapa kadi aku ring anake luh sane tan maderbe pianak.

22Ida Sang Hyang Widi Wasa, sajeroning kakuatan Idane ngaonang saananing kakuasan. Rikala Ida Sang Hyang Widi Wasa nglaksanayang pakarsan Idane, anake sane jaat tumuli padem.

23Ida Sang Hyang Widi Wasa nglugrain ipun urip muponin sutrepti, nanging Ida tansah nureksain ipun salami-laminipun.

24Jadmane dursila kengin muponin kawibuhan ajebos, nanging wusan punika ipun raris kasampatang sakadi padange, sakadi katik gandume sane sampun kagetep.

25Wentenke anak sane mrasidayang moyanin indike punika? Wentenke anak sane mrasidayang muktiang, mungguing baos tiange puniki nenten patut?”

← Chapter 23 Chapter 25 →