Job 15

balinese

1Dane Elipas sane saking kota Teman tumuli masaur, sapuniki: “Semeton Ayub, punika makasami baos tan paisi. Makasami punika baos puyung.

3Tan wenten anak wicaksana sane jaga mabaos sakadi sane baosang semeton iwau, wiadin melanin deweknyane antuk baos sane tan papuara.

4Yening semeton ninutin pakayun semetone ngraga, tan wenten anak sane jaga takut ring Ida Sang Hyang Widi Wasa, tur tan wenten anak sane jaga ngastawa ring Ida.

5Kadursilan semetone sampun sinah uli krana baos sane baosang semeton punika. Semeton ngindayang mengkeb ring ungkur bebaosan sane ririh.

6Tiang nenten maderbe kaperluan buat nyisipang semeton. Semeton kasisipang antuk sakancan baos sane ucapang semeton punika.

7Punapike semeton mitaenang ragan semetone, mungguing semeton dados anak sane mijil pinih riina? Punapike semeton wenten irika, duk Ida Sang Hyang Widi Wasa ngadakang gunung-gunung?

8Punapike semeton naenin mirengang rencana-rencana sane kakardi antuk Ida Sang Hyang Widi Wasa? Punapike kawicaksanaan manusane wantah dados druen semetone ngraga kewanten?

9Tan wenten paindikan sane uningin semeton, sane nenten uningin tiang.

10Tiang mlajahin kawicaksanaane puniki saking anak sane sampun uban, anak sane sampun wenten sadurung ajin semetone wenten.

11Ida Sang Hyang Widi Wasa ngenjuhang panglipuran ring semeton, punapike awinannya semeton tan kayun nrima? Tiang sampun ngrauhang indike punika ring semeton, ngangge baos sane nyunyur manis.

12Nanging semeton brangti tur nelik mamedih ring tiang.

13Semeton pedih pamantuka ring Ida Sang Hyang Widi Wasa tur nyacad Ida.

14Punapike wenten anak mrasidayang sujati suci? Punapike wenten anak mrasidayang patut ring ayun Ida Sang Hyang Widi Wasa?

15Punapike awinannya Ida Sang Hyang Widi Wasa nenten ngega ring paramalaekat Idane? Santukan malaekat-malaekate punika nenten suci ring ayun Idane.

16Jadmane sane nginum kacorahan, tan bina sakadi ipun nginum toya, inggih punika jadma sane pekel, jadma sane tan paguna.

17Inggih semeton Ayub, sane mangkin indayang pirengang indik sane uningin tiang.

18Wenten anak wicaksana sane sampun ngajahin tiang indik kasujatian, kasujatian sane sampun plajahin ipun saking wong tuanipune, samaliha tan wenten sane nenten kawerayang.

19Ring panegaranipune nenten wenten wong sunantara. Punika awinanipun nenten wenten anak sane jaga nuntun ipun lempas saking Ida Sang Hyang Widi Wasa.

20Jadmane dursila sane demen nyakitin anak lianan, jaga tansah nandang kasangsaran sapanjang umuripune.

21Ipun setata miragi suara-suara sane ngresresin jerit-jerit ring kupingipune, tur yening ipun marasa dewekipune sampun sutrepti, irika raris wenten parampok sane ngrampok ipun.

22Ipun nenten maderbe pangajap-ajap jaga luput saking kawisesan petenge, santukan ipun kiter antuk pedang sane jaga ngamademang ipun,

23samaliha paksi-paksi guake pada nyantosang jaga neda sawan ipune. Ipun uning mungguing margi sane pacang tempuh ipun sajeroning uripipune punika peteng dedet.

24Baya bencana sane tan bina sakadi pararatu sane mawisesa, nyantosang ipun, misadia jagi nibenin ipun.

25Kadi asapunika kawiaktian kawentenanipun imanusa, sane ngenjirang lengenipune nglawan Ida Sang Hyang Widi Wasa, miwah matangtang nglawan Ida Sane Maha Kuasa.

26Jadmane punika sumbung tur nyapa kadi aku. Ipun mamengkung ngagem tamengipune, tur ipun sahasa jaga mayuda nglawan Ida Sang Hyang Widi Wasa.

28Punika jadma sane ngaonang kota-kota tur ngrampas umah-umah sane sampun katilar rarud antuk sane nerbeang, nanging wenten payudan sane jaga nguugang kota-kota miwah umah-umahe punika.

29Ipun jaga nenten kantun sugih. Paderbeanipune nenten jaga kantun, rauhing lawatipune jaga kasisipang.

30Samaliha ipun nenten jaga luput saking kawisesan sang peteng. Ipun waluya sakadi wit taru, sane carang-carangnyane puun dilap geni, sane bungannyane aas ampehang angin.

31Yening ipun kalintang nambet, ngantos ipun andel ring kadursilan, kenginan kadursilan sane jaga dados pikolihipune.

32Sadurung masanipun, ipun sampun jaga layu, inggih punika layu sakadi carang-carang tarune, samaliha nenten mrasidayang malih gadang lumlum.

33Ipun waluya sakadi wit anggur sane wohnyane aas sadurung wayah, miwah sakadi wit saitune sane aas bunganipune.

34Jadmane sane tan pawidi, ipun nenten jaga maderbe katurunan samaliha umah jadmane sane demen nagih suap jaga kageseng antuk geni.

35Parajadmane sane ngrincikang kamewehan miwah malaksana dursila, manahipune setata kabekin antuk pangindrajala.”

← Chapter 14 Chapter 16 →