Job 10

balinese

1Titiang sampun wadih urip. Ledang Palungguh IRatu mirengang panulemen titiange sane wetu saking manah sane duhkita.

2Duh Ratu Sang Hyang Widi Wasa, sampunangja Palungguh IRatu nyisipang titiang. Indayang nikayang ring titiang, punapike dedalihan sane tibakang Palungguh IRatu ring titiang?

3Punapike patut yening Palungguh IRatu angkara murka, tur mapakayun jaga ngenyagang pakardin Palungguh IRatune ngraga? Samalihipun Palungguh IRatu raris ledang ring paindikan sane karencanayang antuk jadmane dursila?

4Punapike Palungguh IRatu taler ngaksi pateh sakadi titiang?

5Punapike yusan Palungguh IRatu taler cutet sakadi tuuh titiange?

6Sapanglanturipun, punapike awinannya Palungguh IRatu nyliksik dosa-dosan titiange, miwah ngulati saananing kiwangan titiange?

7Palungguh IRatu wikan, mungguing titiang nenten pisan iwang, samalihipun nenten wenten anak sane mrasidayang ngluputang titiang saking ayun Palungguh IRatu.

8Tangan Palungguh IRatu sane sampun mola miwah ngrupayang titiang, tur sane mangkin tangan Palungguh IRatu taler sane ngenyagang titiang.

9Elingangja, mungguing Palungguh IRatu sampun ngardi titiang antuk tanah legit. Punapike Palungguh IRatu mapakayun jaga ngenyagang titiang mangda dados abu?

10Palungguh IRatu sampun mapaica kakuatan ring bapan titiange buat numbuhang titiang. Palungguh IRatu sane sampun ngawinang titiang sayan ageng ring garba wasan memen titiange.

11Palungguh IRatu ngrupayang sikian titiange antuk tulang miwah otot, samaliha ngaput tulange punika antuk daging miwah kulit.

12Palungguh IRatu sampun mapaica urip miwah sih pasuecan sane tan rered-rered ring titiang, tur Palungguh IRatu matiningin titiang, kantos titiang prasida kantun murip.

13Nanging sane mangkin titiang uning, mungguing sajeroning masane punika Palungguh IRatu sampun saking silib ngrencanayang buat jaga ngenyagang titiang.

14Palungguh IRatu nlektek titiang, punapike titiang jaga ngardi dosa punapi nenten. Yening titiang ngardi dosa mangda Palungguh IRatu mrasidayang nenten ngampurayang titiang.

15Yening titiang ngardi dosa, kenginan titiang raris katibenin sengkala. Nanging yening titiang malaksana patut, titiang nenten polih pujian. Titiang kalintang sangsara tur kakaput antuk kimud.

16Yening titiang prasida labda karya, Palungguh IRatu nguber titiang sakadi singa. Palungguh IRatu misadia nyengkalen titiang, masrana katawahan-katawahan sane kardi Palungguh IRatu.

17Palungguh IRatu setata jaga madue saksi buat jaga nglawan titiang. Pidukan Palungguh IRatu tumiba ring titiang sayan ngagengang kewanten. Palungguh IRatu tansah ngrencanayang jaga malih ngebug titiang.

18Duh Ratu Sang Hyang Widi Wasa, punapi awinannya Palungguh IRatu nglugrain titiang lekad? Becikan titiang padem, sadurung wenten anak sane manggihin titiang.

19Becikan titiang saking garba wasan memen titiange ngraris katanem. Becikan titiang satmaka nenten wenten.

20Boyake tuuh titiange sampun makire telas? Banggayangja titiang newek iriki. Lugrainja titiang muponin sisan urip titiange puniki.

21Titiang jaga gelis mapamit tur nenten jaga malih mawali. Titiang jaga ngungsi jagat sane peteng dedet, inggih punika:

22Jagat sane peteng dedet, remrem tur madukan. Ring jagate punika terange pateh sakadi petenge.”

← Chapter 9 Chapter 11 →