Jeremiah 6

balinese

1Ih semeton wong Benyamin, pada malaibja luputang ragane! Medalangja ragane saking Yerusalem! Suarayangja trompete ring Tekoa, endihangja genine makadados tanda ring Bet-Kerem! Santukan bencanane sane jaga nguugang sampun rauh saking kaler.

2Kota Sione punika kalintang luih, nanging ipun pacang kuugang.

3Pararatune pacang makemah irika kairing antuk parawadua balannyane. Ipun pacang ngwangun kemahnyane ngiter kota, tur suang-suang pacang ngwangun kemahnyane ring genah sane demenin ipun.

4Ipun pacang mabaos sapuniki: “Pada sayagaja buat ngebug kota Yerusaleme! Sayagaangja! Iraga lakar ngebug kotane tengaine!” Nanging wusan asapunika, ipun pacang mabaos malih sapuniki: “Ento bes tengai, nyanan enggalan sanja, lawat sanjane suba ngancan dawa.

5Iraga lakar ngebug ia petengne, iraga lakar nguugang benteng kotane.”

6Ida Sang Hyang Widi Wasa Sane Maha Kuasa sampun mrentahang pararatune punika buat ngebah taru tur ngwangun gelar ngiter kota Yerusaleme. Ida sampun ngandika asapuniki: “Ulun lakar ngukum kotane ene sawireh kotane ento bek misi jlema ane nyapa kadi aku.

7Buka semere terus mesuang yeh ening, buka keto masih Yerusalem tansah mesuang kajaatane. Ulun mireng kawirosan muah panyangsaran di kotane ento. Ulun tansah ngatonang anak sakit muah anak matatu ditu.

8Ih rakyat Yerusaleme, depangja pakewuhe ento dadi patinget buat kita. Yan tusing keto Ulun lakar ngutang kita. Ulun lakar ngobah kotan kitane dadi tegal melakang, dadi tanah ane tusing ada anak nongosin.”

9Ida Sang Hyang Widi Wasa Sane Maha Kuasa ngandika ring tiang sapuniki: “Wong Israele lakar kalalungin tan bina buka punyan anggure ane buahne suba telah malap. Sawireh keto, sanune ada sela, kita patut ngrahayuang sakancan anak ane nyidayang karahayuang.”

10Tiang raris matur asapuniki: “Sapasirake sane pacang madingehang titiang yening titiang mabaos ring ipun wiadin mituturin ipun? Ipun jadma bengkung tur tan nyak madingehang pangandikan Palungguh IRatune. Ipun ngedekin sabdan Palungguh IRatune sane baosang titiang punika.

11Duh Ratu Sang Hyang Widi Wasa, pidukan Palungguh IRatune sane nibenin ipun taler morbor tangkah titiange. Titiang tan mrasidayang malih negen indike punika.” Irika Ida Sang Hyang Widi Wasa ngandika ring tiang sapuniki: “Pesuangja dukan Ulune ento sig cerik-cerike ane di rurung-rurunge muah sig papunduhan paratrunane. Somahne luh muah muani lakar katawan. Buina yadian ane suba tua ngodngod masih tusing lakar kenuang.

12Umah-umahnyane lakar serahanga teken anak len, keto masih tegal-tegal muah somahne. Ulun ane ngukum rakyate di gumine ene.

13Ia ajaka makejang cerik kelih ngulahang ngalih pipis aji mamekel, yadian ia ento nabi wiadin pandita patuh melog-melog rakyat.

14Ia ngubadin tatun kaulan Ulune cara anake ngubadin bered dogen. Ia ngorahang ‘suba uas’ nanging sujatinne tonden.

15Apake ia marasa kimud sawireh ia nglaksanayang paundukan ane cemer tenenan? Ia tusing pesan marasa kimud, tur tusing taen ngrasayang muane barak. Ento awanane ia lakar labuh, buka labuh anake ane lenan. Dikalane Ulun ngukum ia, ditu ia lakar pragat. Ulun Sang Hyang Widi Wasa suba ngandika buka keto.”

16Ida Sang Hyang Widi Wasa ngandika ring kaulan Idane sapuniki: “Majujukja di pempatane tur iwasinja! Takonang rurunge ane nguni muah dija rurunge ane paling melaha. Majalanja ditu, pedas kita lakar idup tur sutrepti.” Nanging aturnyane: “Tan wenten, titiang tan ngiring.”

17Irika Ida Sang Hyang Widi Wasa raris ngadegang pajagaan buat madingehang suaran wangsit trompete. Nanging pajagaane punika matur sapuniki: “Titiang nenten sairing.”

18Ida Sang Hyang Widi Wasa raris masabda sapuniki: “Ih parabangsa padingehangja! Buina mlajahja uli paundukan ane suba nibenin kaulan Ulune.

19Ih gumi makejang, padingehangja! Makadadi ukuman buat rencanannyane ajaka makejang, Ulun lakar nekaang bencana buat rakyate ento, sawireh ia suba nulak purukan Ulune tur tusing nyak ninutin sabdan Ulune.

20Kudiang Ulun menyane ane abana uli Seba ane aturanga teken Ulun, wiadin wewangene ane abana uli di gumine ane joh? Ulun tusing demen tur tusing nyak nampi aturannyane.

21Sawireh keto Ulun lakar ngawanang rakyate ene katanjung tur labuh. Rerama lan pianakne muani-muani lakar mati, keto masih sawitra-sawitra muah pisaga-pisagannyane.”

22Pangandikan Ida Sang Hyang Widi Wasa sapuniki: “Ada bangsa ane teka uli di gumine kaja, nah ento bangsa ane kuat uli joh nyadia lakar masiat.

23Ia suba munduhang panah lan pedangnyane. Ia wirosa tur tusing ngelah kapiolasan. Dikalane ia teka negakin jaran, suarannyane waluya kuugan ombake di pasihe. Ia suba sayaga buat masiat nglawan Yerusaleme.”

24Rakyat Yerusaleme pada mabaos sapuniki: “Iraga suba ningeh orta nanging liman iragane lemet. Iraga suba kaliput baan sedih tur sakit buka anake luh nyakit ngelah pianak.

25Iraga tusing pesan bani pesu ka tegale wiadin majalan di rurunge, sawireh musuh-musuh iragane pada ngaba sanjata tur bencanane suba ngiter iraga.”

26Ida Sang Hyang Widi Wasa ngandika ring kaulan Idane sapuniki: “Panganggoinja iban kitane aji karung tur maguyangja di abune. Sedihja kita buka nyedihang pianak kitane ane tuah abesik, sawireh anake ane teka nguugang kita lakar nadak ngebug kita.

27Ih Yeremia, pintoninja kaulan Ulune, patuh buka kita nguji besi, apanga kanti tawang buka apa ia.

28Ia ajaka makejang pembrontak ane bengkung, kekeh buka prunggu muah besine. Ia ajaka makejang jaat, tur kema mai ngaba pisuna.

29Apin prapene suba kebus bara, nanging besine tusing nyak enceh tur maliah pesu. Tusing ada gunanne nutugang nglebur kaulan Ulune, sawireh ane jaat tusing nyak ilang.

30Ia lakar kadanin barang ane tuara maji, sawireh Ulun Sang Hyang Widi Wasa suba nulak ia.”

← Chapter 5 Chapter 7 →