Isaiah 49

balinese

1Ih parabangsa sane doh miwah rakyat sane magenah doh pisan, pirengangja baos tiange. Saderenge tiang lekad, Ida Sang Hyang Widi Wasa sampun nyelik tiang tur ngamanggehang tiang dados parekan Idane.

2Ida sane ngawinang baos tiange mangan sakadi pedange. Ida nyayubin tiang antuk tangan Idane. Ida nadosang tiang waluya sakadi panah sane lanying tur sregep buat kagunayang.

3Ida ngandika ring tiang sapuniki: “Ih Israel, kita ene parekan Ulune. Malantaran kita anake lakar pada muji Ulun.”

4Atur tiange sapuniki: “Titiang sampun makarya nanging nenten wenten pikenohipun. Titiang sampun nganggen kakuatan titiange, nanging sami tan wenten pikenohipun.” Nanging tiang pracaya Ida Sang Hyang Widi Wasa pacang nindihin wicaran tiange. Ida pacang ngupahin tiang pabuat indik sane sampun laksanayang tiang.

5Sadurunge tiang lekad, Ida Sang Hyang Widi Wasa sampun ngamanggehang tiang. Ida sampun nadosang tiang parekan Idane buat ngwaliang parakaulan Idane, inggih punika ngwaliang wong Israele sane sambeh pablesat genahipun. Ida Sang Hyang Widi Wasa ngajiang tiang, tur Ida dados wit kakuatan tiange.

6Ida Sang Hyang Widi Wasa ngandika ring tiang sapuniki: “Ih parekan Ulune, Ulun ngelah gegaen ane gede pabuat kita. Tusingja tuah buat ngrajegang buin kagungan wong Israele ane enu dogen, nanging Ulun masih lakar nadiang kita galang pabuat parabangsane, apanga gumine makejang dadi rahayu.”

7Widin Israele Sane Maha Suci miwah Sang Juru Rahayu, ngandika ring anake sane kanistayang, ring anake sane kagetingin antuk parabangsane, ring sane dados panjak parapanguasane, sapuniki: “Pararatune lakar nepukin kita kabebasang saha rahayu, laut lakar bangun buat ngormatin kita. Parapangerane masih lakar nepukin unduke ento, tur ia lakar pada nengkluk nyumbah kita.” Paindikan sane kadi asapunika pacang kasidan, santukan Ida Sang Hyang Widi Wasa sampun nyelik parekan Idane. Widin wong Israele sane suci ngamanggehang sakancan janjin Idane.

8Ida Sang Hyang Widi Wasa ngandika ring kaulan Idane sapuniki: “Dikalan teka masanne kita karahayuang, Ulun lakar nyinahang sih pasuecan Ulune teken kita, tur nyuecanin kita dikalane kita ngeling nunas ica. Ulun lakar nyaga tur nyayubin kita, buina malantaran kita, Ulun ngae prajanjian teken parabangsane makejang. Ulun lakar nglugrain kita buin nongosin tanah kitane ane jani makutang ento.

9Ulun lakar ngandika teken paratawanane kene: ‘Kemaja bebasang ibane!’, muah teken anake ane nongos di petenge, Ulun ngandika kene: ‘Maija pesu ka galange!’ Anake ento lakar buka biri-birine ane kangonang di bukit-bukite.

10Ia tuara lakar taen seduk wiadin bedak. Panes matan ai muah tegal melakange tusing lakar ngebusin ia, sawireh ia lakar katuntun baan anak ane tresna teken ia. Anake ento lakar nuntun ia ka yeh klebutane.

11Ulun lakar ngae rurung gede ngliwatin gunung-gununge, tur nabdabang rurung buat pajalan kaulan Ulune.

12Kaulan Ulune lakar teka uli joh, uli kaja muah uli kauh, muah uli Aswan ane bedelod.”

13Ih langit makidungja, masuryakja saha liang ih gumi! Depangja gunung-gununge masuryak makidung! Ida Sang Hyang Widi Wasa mapakayun nglipur kaulan Idane. Ida rumasa sih kapiolasan ring kaulan Idane sane nandang sangsara.

14Nanging wong Yerusaleme mabaos asapuniki: “Ida Sang Hyang Widi Wasa suba ngutang iraga! Ida suba lali teken iraga!”

15Irika Ida Sang Hyang Widi Wasa ngandika ring ipun sapuniki: “Nyidayangke anake luh engsap teken pianak gelahnyane, tur tuara tresna teken pianak ane lekadanga? Yadiastu ada meme ane engsap teken pianakne, nanging Ulun tusing taen engsap teken kita.

16Ih Yerusalem, Ulun tusing taen engsap teken kita! Ulun suba nyuratang adan kitane di tlapakan liman Ulune.

17Anake ane lakar ngwangun kita enggal lakar teka, tur anake ane nguugang kita lakar makaad.

18Iwasinja milehan tur pedasinja apa ane ada. Rakyat kitane pada mapunduh, ia suba pada malipetan mulih. Sasajaane Ulun ene Widi ane nyeneng. Kita lakar rumasa bangga marep teken rakyat kitane. Rasa banggan kitane patuh buka pangantene luh marep teken sasocannyane.

19Gumin kitane suba uug tur suung, nanging ane jani ia lakar dadi kaliwat cupit pabuat rakyate ane teka muah nongos ditu. Buina anake ane nepin kita uug, ia lakar makaad joh pesan uli sig kitane.

20Rakyat kitane ane lekad di paselongan, manian lakar ngraos kene: ‘Gumine ene cupit pesan. Iraga merluang tongos ane linggahan buat magumana.’

21Ditu kita lakar ngraos teken dewek kitane padidi kene: ‘Nyenke ane suba nglekadang cerik-cerike ene? Iraga suba kelangan pianak tur tusing lakar ngelah pianak buin. Iraga suba kaselong tur abana joh pesan. Nyenke ane suba ngedenang cerik-cerike ene? Iraga suba kalahina padewekan, uli dijake tekan cerik-cerike ene?’ ”

22Ida Sang Hyang Widi Wasa Sane Maha Luur ngandika ring kaulan Idane sapuniki: “Ulun lakar mapaica wangsit teken bangsa-bangsane, tur ia lakar ngamulihang pianak-pianak kitane.

23Pararatune lakar satmaka dadi bapa pabuat kita, tur parapramesuarine lakar satmaka dadi memen kitane. Ia lakar pada ngeed di arepan kitane tur ngajiang kita. Ia ngasorang dewek buat ngedengang rasa hormatnyane teken kita. Ditu kita lakar nawang, mungguing Ulun ene Sang Hyang Widi Wasa. Anake ane ngantosang pitulungan Ulune tusing lakar taen kado.”

24Nyidayangke kita ngrebut jejarahan uli liman prajurite? Nyidayangke kita mebasang tawanane uli anake ane wirosa?

25Ida Sang Hyang Widi Wasa malih ngandika asapuniki: “Unduke ene ane lakar kasidan. Tawanan-tawanan prajurite lakar kajuang tur jejarahan anake wirosa lakar karampas. Ulun lakar nyiatin sawatek anake ane nyiatin kita tur Ulun lakar ngrahayuang pianak-pianak kitane.

26Ulun lakar ngawanang parapanindes kitane saling matiang ajaka timpalne. Ia lakar katagihan ngamatiang muah setata brangti. Ditu sawatek manusane lakar pada nawang mungguing Ulun ene Sang Hyang Widi Wasa, ane ngrahayuang tur mebasang kita. Ia lakar nawang mungguing Ulun ene Widin Israele Ane Maha Kuasa.”

← Chapter 48 Chapter 50 →