Haggai 1

balinese

1Ring taun sane kaping kalih, panyeneng Ida Sang Prabu Darius ring Persia, ring tanggal apisan sasih sane kaping nem, Ida Sang Hyang Widi Wasa masabda malantaran Nabi Hagai. Pawuwus Idane punika katiba ring Dane Serubabel okan Dane Sealtiel, sane dados gubernur ring Yehuda, miwah ring Dane Yosua okan Dane Yosadak, sane madeg dados Pandita Agung.

2Ida Sang Hyang Widi Wasa Sane Maha Kuasa ngandika ring Nabi Hagai, sapuniki: “Bangsane ene pada ngorahang, mungguing jani tonden masanne buat ngwangun buin Perhyangan Agung.”

3Duaning punika Ida Sang Hyang Widi Wasa raris mapaica pawuwus ring bangsane punika, malantaran Nabi Hagai, sapuniki:

4“Ih parakaulan Ulune, ngudiang dadi kita nongosin umah ane melah, nanging Perhyangan Agung Ulune enu uug?

5Tusingke kita ngrasayang unduk ane puponin kita jani?

6Kita liu nyambehang bibit, nanging maan pamupon tuah abedik, kita ngelah dedaaran ane lakar daar kita, nanging tusing nyandang buat ngwaregang basang kitane. Kita ngelah anggur ane lakar inem kita, nanging tusing nyandang buat nglegaang kita. Kita ngelah panganggo nanging tusing nyandang buat ngangetang awak kitane. Buina anake ane magae nanggap upah, upahne tusing nyandang buat pangupajiwannyane.

7Tusingke kita nawang, apa kranane kanti buka keto?

8Ane jani kemaja luas ka gunung ngalih kayu, tur jujukangja buin Perhyangan Agunge. Ditu Ulun lakar ledang tur kasungsung amun patutne.

9Kita ngajap-ajap apang maan pamupon liu, nanging kita mupu tuah abedik. Buina dikalan kitane ngaba pamupon kitane ento mulih, Ulun ngampehang aji angin. Apa kranane dadi ketoang Ulun? Sawireh Perhyangan Agung Ulune enu uug, nanging kita suang-suang pada kumuh ngitungang umah kitane padidi dogen.

10Ento kranane tusing ada ujan, tur tusing ada entik-entikan ane nyidayang mentik.

11Ulun suba nibakang masan tuh teken gumine, tur bukite, teken tegalan gandume, teken abian anggure muah teken abian saitune, teken sakancan ane pupuanga baan gumine, teken manusa muah teken burone muah teken sakancan ane lakar pupuang kita.”

12Irika Dane Serubabel miwah Dane Yosua miwah sawatek rakyate sane sampun mawali saking paselongan ring Babel, sami pada nglaksanayang sapituduh Ida Sang Hyang Widi Wasa, Widinnyane, sakadi sane kapituduhang ring dane miwah ipun sareng sami. Dane miwah ipun sareng sami pada ajerih miwah satinut ring Nabi Hagai, utusan Ida Sang Hyang Widi Wasa.

13Irika Nabi Hagai ngrauhang pawuwus Ida Sang Hyang Widi Wasa ring rakyate, kadi asapuniki: “Ulun lakar ngiangin kita. Aketo janjin Ulune.”

14Ida Sang Hyang Widi Wasa mangunang semangat sakancan anake buat makarya ring Perhyangan Agung, inggih punika Dane Serubabel, gubernure ring Yehuda, Sang Pandita Agung Yosua miwah sakancan rakyate sane sampun mawali saking paselongan. Dane miwah ipun pada ngawitin makarya ring Perhyangan Agung Idane Sang Hyang Widi Wasa Sane Maha Wisesa, Widinnyane,

15ring tanggal patlikur sasih sane kaping nem, ring taun sane kaping kalih, panyeneng Ida Sang Prabu Darius.