Ezekiel 6

balinese

1Ida Sang Hyang Widi Wasa ngandika ring tiang, sapuniki:

2“Ih manusa, iwasinja gunung-gunung Israele tur tekedangja pawuwus Ulune teken ia.

3Tundenja gunung-gunung Israele madingehang sabdan Ida Sang Hyang Widi Wasa Sang Maha Luur ane katiba teken gunung-gununge, bukit-bukite, jurang-jurange muah teken lebak-lebake, mungguing Ulun lakar nekaang pedang buat nguugang tongos-tongos rakyate nyungsung arca-arcane.

4Palinggih-palinggihnyane lakar kuugang muah tongos-tongos pasepane lakar kabenyahang. Sakancan jlemane ane ditu lakar kamatiang di arepan arca-arcannyane.

5Ulun lakar nyambehang bangken-bangken wong Israele. Ulun lakar nyambehang tulang-tulangnyane milehan di palinggih-palinggihe ento.

6Sakancan kota-kota Israele lakar kuugang apanga sakancan palinggih muah arcannyane dekdek inggel, tongos-tongos pasepane lakar kabenyahang muah sakancan ane gaene lakar sirna.

7Milehan jlema-jlemane lakar kamatiang, tur ane enu idup lakar nawang, mungguing Ulun ene Sang Hyang Widi Wasa.

8Ada masih ane lugrain Ulun malaib luput uli anake ane lakar ngamatiang, tur ia lakar sambehang Ulun di pantaran bangsa-bangsane

9di tongosnyane maselong. Ditu ia lakar inget teken Ulun tur nawang mungguing Ulun ene suba nyisipang muah ngaenang ia kimud, sawireh ia suba ngutang Ulun, baana ia tusing pracaya teken Ulun, buina ia demenan teken arca-arcane bandingang teken Ulun. Ia lakar seneb teken dewekne padidi malantaran laksanannyane ane corah muah nista.

10Ia lakar nawang mungguing Ulun ene Ida Sang Hyang Widi Wasa, tur patinget Ulune ento tusingja puyung.”

11Ida Sang Hyang Widi Wasa Sane Maha Luur ngandika, sapuniki: “Andupangja liman kitane! Ketebangja batis kitane. Ngelingja kasedih-sedih, malantaran sakancan paundukan ane corah muah cemer, ane suba kalaksanayang baan wong Israele. Ia lakar pada mati di pasiatan, ulihan sayah gede muah ulihan grubug.

12Anake ane joh-joh lakar bah tur mati muah ane paek lakar mati di pasiatan. Ane enu idup lakar mati kasedukan. Ia lakar pada ngrasayang kakuasan pidukan Ulune.

13Bangke-bangkene lakar mura di pantaran arca-arcane muah diilehan palinggih-palinggihnyane, lakar mura di bukite ane tegeh, di sakancan pucak gununge, di beten sakancan kayune ane gadang lumlum muah di sakancan punyan kayune ane rob, di sakancan tongosnyane morbor aturan pabuat arca-arcannyane. Sasubane keto sakancan anake lakar nawang mungguing Ulun ene Ida Sang Hyang Widi Wasa.

14Nah Ulun lakar ngamengang tangan Ulune tur nguugang guminnyane. Ulun lakar nguugang guminnyane uli tegal melakange bedelod nganti neked ka kota Ribla ane bedaja. Kota-kota tongos wong Israele tusing ada ane lakar tumanang Ulun. Sasubane keto makejang anake lakar nawang mungguing Ulun ene Ida Sang Hyang Widi Wasa.”

← Chapter 5 Chapter 7 →