Ezekiel 47

balinese

1Anake punika raris ngajak tiang mawali ka kurin Perhyangan Agunge. Irika wenten toya medal saking sor kurine punika, membah nganginang pateh sakadi Perhyangan Agunge sane taler marep kangin. Toyane punika membah saking sor bagian kelod Perhyangane nglintang ring sisi delod pamorboran aturane.

2Wusan punika, anake punika raris ngajak tiang medal saking pakarangan Perhyangane, mamargi nglintang ring kurine sane baler. Samaliha dane ngajak tiang milehan, buat ngungsi kurine sane marep kangin. Ring sisi kelod gapurane punika wenten tukad alit membah.

3Anake punika tumuli nyikut tukade punika antuk tali sikutnyane, limang atus meter nganginang, sarwi ngandikayang tiang mangda tedun nglintang ring tukade punika. Toyan tukade punika wantah rauh ring pagelangan buntut tiange.

4Sasampune punika dane nyikut malih limang atus meter, tur toyan tukade raris nganegehang ngantos rauh ring entud tiange. Malih limang atus meter ngatebenang toyan tukade punika raris nganegehang rauh ring bangkiang tiange.

5Dane nyikut malih limang atus meter, tur toyan tukade punika kalintang dalem, ngantos tiang nenten mrasidayang mamargi nglintang. Tukade punika kalintang dalem kantos tan sida antuk mamargi nglintang sajawining nglangi.

6Dane ngandika ring tiang sapuniki: “Ih manusa, melahang pesan ngingetang unduke ento makejang.” Sasampune punika anake punika raris ngajak tiang mawali ka sisin tukade.

7Riwau tiang rauh irika, panggihin tiang wenten wit taru akeh pisan ring sabilang sisin tukade punika.

8Dane raris ngandika ring tiang sapuniki: “Yehe ene membah ngliwatin gumine ane ngungsi nganginang, nglantur ka Lebak Yordane muah ka Segara Mati. Dikalan yehe ento neked ka Segara Mati, ditu yehe ento nyilurin yeh pasihe ane pakeh ento aji yeh nyem.

9Kijaja tukade ento membah, ditu lakar ada buron muah be magenepan. Tukade ento lakar ngranayang yeh Segara Matine ento dadi tabah, tur kijaja lakuna tukade ento membah ditu sarwaning gumatap-gumitip muah entik-entikane pada idup.

10Ngawit uli yeh klebutane di En-Gedi nglantur kanti neked di yeh klebutane di En-Eglaime, ditu liu lakar ada bendega di sisin pasihe, tur ia pada lakar ngeberang nyemuh jaringnyane. Ditu lakar liu ada be mlegendah, patuh buka ane ada di Segara Tengahe.

11Nanging yeh loloan muah rawa-rawane ane di pasisine ento tusing lakar nyem. Yehnyane enu tetep pakeh, dadi lakar uyah.

12Di sabilang sisin tukade ento, ditu lakar mentik punyan woh-wohan magenepan ane dadi daar. Donnyane tusing lakar layu-layu, buina tusing lakar suud-suud mabuah. Ngabulan punyan kayune ento lakar mabuah, sawireh ia kaecokin baan yeh tukade ane membah uli di Perhyangan Agung. Punyan woh-wohane ento lakar mupuang woh ane dadi daar, tur donnyane dadi anggon ubad nyegerang anak.”

13Ida Sang Hyang Widi Wasa Sane Maha Luur ngandika sapuniki: “Ene bates-bates tanahe ane patut kadum baan suku bangsane makaroras, tur suku Yusupe maan duang duman.

14Ulun suba masumpah teken leluur kitane, mungguing Ulun lakar ngicen ia cecatu di gumine ene. Sawireh keto, ane jani dumja tanahe ento asahang di pantaran kitane.

15Bates kajanne, ngawit uli Segara Tengah nganginang ka kota Hetlon ka margane ane ka Hamat, ka kota Sedad,

16ka kota-kota Berota muah Sibraim (kota-kotane ento ada di selagan wewidangan kaprabon Damsike muah kaprabon Hamate) nglaut ka Hasar-Enon (ane tongosne di bates kaprabon Haurane).

17Keto bates kajanne, ngawit uli Segara Tengah nganginang ka Hasar-Enon nganti neked bedelod bates wewidangan Damsike muah Hamate.

18Bates kanginne, ngelodang ngawit uli di Hasar-Enon ane di selagan wewidangan Damsike muah Haurane, tur Tukad Yordane dadi bates kauh tanah Israele muah Gilead ane dadi bates kanginne, nganti neked ka Tamar ane di Segara Mati.

19Bates kelodne, ngawit uli Tamar ngungsi ngelod kauhang ka yeh anakan Meribane di Kades, laut ngaja kauhang nuluh bates Mesire, nganti ka Segara Tengah.

20Bates kauhne, kabatesin baan Segara Tengah, laut ngajanang neked di margane ka Hamat.

21Dumja tanahe ento di pantaran suku-suku bangsan kitane.

22Tanahe ento patut dadi cecatun kitane. Dikalan kitane ngedum tanahe ento, soroh wong sunantara ane nongos di pantaran kitane, ane suba pada ngelah pianak lekad dini, ia masih patut nampi duman tanah. Ia patut maan duman patuh buka wong Israele, tur patut nampi tanah ulihan maundi bareng-bareng ngajak suku bangsa Israele.

23Asing-asing wong sunantarane ento patut nampi dumannyane di pantaran suku bangsa sig tongosnyane magumana. Ulun Sang Hyang Widi Wasa Sang Maha Luur ane suba masabda buka keto.”

← Chapter 46 Chapter 48 →