Ezekiel 42

balinese

1Sasampune punika anake punika raris ngajak tiang ka natare sane ring jaba tur tiang kajak ka balene sisi kaler Perhyangane, sane genahnyane nenten doh saking balene sane magenah ring tanggun kauh Perhyangane.

2Balene puniki panjangipun wenten seket meter miwah linggahipun wenten slae meter.

3Sisinnyane asiki mapapas nglawan embang sane linggahipun dasa meter sane nuluh sisin Perhyangane miwah sisinnyane sane lianan mapapas nglawan lante batu ring natare sane ring jaba. Balene punika kawangun matingkat tiga, tingkat sane duuran makeledan ring sane betenan.

4Ring sisi kaler balene punika wenten margi sane linggahipun limang meter, panjangipun seket meter, tur madaging pamedal ring sisinnyane punika.

5Kamar-kamare sane ring tingkat sane pinih duur cupitan ring kamare sane ring tingkat madia miwah sane ring sor santukan kamare sane baduuran kawangun makeledan ring sane betenan.

6Kamar-kamare sane wenten ring makatigang tingkat punika, magenah ring duur terase, nenten katunjang antuk sesaka sakadi balene sane lianan sane ring natare punika.

7Ring tingkat sane pinih sor, temboknyane sane ring jabaan atenga, inggih punika slae meter panjangipun, siteng pisan. Tur tanggunipun sane malih slae meter madaging kamar-kamar. Ring tingkat sane pinih duur sapanjang tembok balene punika madaging kamar-kamar.

9Ring sor kamare kekalih punika, ring tanggun kangin balene punika, ring tanggun temboke, wenten pamedal sane ngungsi ka natare sane ring jaba. Ring sisi kelod Perhyangane punika wenten bale sane pateh, sane genahnyane nenten doh saking balene sane wenten ring tanggun kauh Perhyangane.

11Ring arepan kamar-kamare punika wenten margi sane pateh sakadi sane wenten ring baler Perhyangane. Margine punika asah sikut miwah gambarnyane miwah pateh taler pamedalnyane.

12Ring sor kamare sane wenten ring sisi kelod balene punika, ring tanggun temboke bedangin wenten lawang asiki.

13Anake punika raris ngandika ring tiang sapuniki: “Balene makadadua ene suci. Di balene ento parapanditane ane nangkil di ayun Ida Sang Hyang Widi Wasa, pada ngajengang aturan ane paling sucina. Sawireh kamar-kamare ento suci, ditu parapanditane lakar ngejang aturan-aturan ane paling sucina, luire aturan gandum muah aturan ane katurang buat nebus dosa muah panaur pasilih.

14Yen parapanditane suba masuk ka Perhyangane laut ia makeneh ka natare ane di jaba, parapanditane ento patut ngejang busana kasucian ane rangsuka buat ngancangin Ida Sang Hyang Widi Wasa, di kamar-kamare tenenan. Ia patut ngrangsuk busana ane lenan satondene ia pesu ka natare sig tongos rakyate mapunduh.”

15Dikalan anake punika sampun puput nyikut pakarangan Perhyangane sane ring jeroan, dane raris ngajak tiang medal, nglintang ring kurine sane bedangin tumuli nyikut pakarangane sane ring jaba.

16Dane ngambil sikute, tumuli nyikut sisi kanginnyane, wenten 250 meter.

17Sasampune punika, dane raris nyikut sisi kalernyane, sisi kelodnyane miwah sisi kauhnyane, tur asing-asing sisi punika asah panjangnyane, inggih punika 250 meter.

20Dadosipun temboke sane ngiter pakarangane punika 250 meter mrepat. Temboke punika makadados panyeleng sane suci kalawan sane nenten suci.

← Chapter 41 Chapter 43 →