Ezekiel 35

balinese

1Ida Sang Hyang Widi Wasa ngandika ring tiang, sapuniki:

2“Ih manusa, uman-umanja gumi Edome.

3Orahang teken rakyate ditu, sabdan Ulun Ida Sang Hyang Widi Wasa Sang Maha Luur ane buka kene: ‘Ih gunung-gunung Edome, Ulun ene musuh ibane! Ulun lakar nadiang iba tanah makutang ane suung mangmung.

4Ulun lakar nepinin kota-kotan ibane uug muah gumin ibane suung mangmung. Ditu iba lakar nawang mungguing Ulun ene Ida Sang Hyang Widi Wasa.’

5Iba mula musuh kaliliran wong Israele. Iba nepinin wong Israele kamatiang dimasan iane katempuh bencana, nah ento di masan iane nampi pasisip ane pamragat buat dosa-dosannyane.

6Sawireh keto mula tuah kapitui Ulun ene Sang Hyang Widi Wasa Sang Maha Luur, Widi ane jumeneng langgeng, dadinne sang pati ane dadi duman ibane, tur iba tusing nyidayang ngelidin unduke ento. Iba pelih mamati-mati tur unduk mamati-matine masih ane lakar nguber iba.

7Ulun lakar nadiang desa pagunungan Edome tegal melakang, tur sakancan anake ane ngliwat ditu lakar matiang Ulun.

8Ulun lakar ngabekin gunung-gununge aji bangke, tur bangken anake ane mati di pasiatan lakar ngabekin bukit-bukit muah lebake.

9Ulun lakar nadiang iba suung mangmung sakayang-kayang, tur tusing lakar ada anak ane buin nongosin kota-kotan ibane. Sasubane keto iba lakar nawang, mungguing Ulun ene Ida Sang Hyang Widi Wasa.

10Iba ngorahang mungguing bangsa Yehuda muah Israel makamuah guminnyane padidi gelah ibane, tur iba lakar ngelahang ia, yadianja Ulun Sang Hyang Widi Wasa, ane dadi Widinnyane.

11Sawireh keto, mula tuah sasajaane Ulun ene Sang Hyang Widi Wasa Sang Maha Luur, Widi ane jumeneng langgeng, Ulun lakar ngwales teken iba sakancan pedih, iri ati muah geting ibane marep teken kaulan Ulune. Kaulan Ulune lakar pada nawang, mungguing Ulun lakar nyisipang iba, majalaran laksanan ibane marep teken ia.

12Ditu iba lakar nawang mungguing Ulun Sang Hyang Widi Wasa, mireng raos panyacad ibane, mungguing gunung-gunung Israele suba suung mangmung tur dadi gelah muah tetadahan ibane.

13Ulun suba mireng munyin ibane ane bes ngliwat sumbungne marep teken Ulun.”

14Ida Sang Hyang Widi Wasa Sane Maha Luur ngandika sapuniki: “Ulun lakar nadiang iba suung mangmung tan sipi, kanti sakuub gumine lakar pada masuka rena majalaran uug ibane,

15patuh buka ibane masuka rena dikalan wong Israel druen Ulune nemu karusakan. Gunung-gunung Seire muah sakuub gumi Edome lakar suung mangmung, sasubane ento, makejang anake lakar nawang mungguing Ulun ene Ida Sang Hyang Widi Wasa.”

← Chapter 34 Chapter 36 →