Ezekiel 13

balinese

1Ida Sang Hyang Widi Wasa ngandika ring tiang, sapuniki:

2“Ih manusa, cacadja nabi-nabi Israele ane mesuang ramalan nganggoang kenehne padidi. Tunden ia madingehang sabdan Ida Sang Hyang Widi Wasa.”

3Sapuniki sabdan Ida Sang Hyang Widi Wasa Sane Maha Luur: “Sengkala paranabine ane belog ento! Ia pada ngreka pawarah-pawarahnyane tur wahyunnyane padidi.

4Ih wong Israel, paranabin kitane ento tan paguna, tan bina buka cicing alase ane nongos di uug-uugan kotane.

5Ia tusing nyaga tongos-tongos temboke ane uug, wiadin menahin temboke ento. Sawireh keto, dadinne gumi Israele tusing nyidayang kabelanin dikala teka siate, dipanemayan rauh Ida Sang Hyang Widi Wasa.

6Wahyu ane tepukina ento palsu muah pangwakiannyane pada bobab. Ia ngorahang dewekne, mungguing ia ngwarah-warahang pawuwus Ulune, nanging Ulun tusing ada ngutus ia. Yadian keto ia masih ngantosang munyinnyane apang kasidan.

7Ulun ngorahang ia kene: “Wahyu ane tepukin kita ento palsu, muah ramalan ane warah-warahang kita ento bobab. Kita ngorahang mungguing pawarah-warahe ento sabdan Ulun, nanging Ulun tusing taen masabda teken kita.”

8Irika Ida Sang Hyang Widi Wasa Sane Maha Luur masabda ring ipun sapuniki: “Raos kitane ento palsu muah wahyu ane tepukin kita ento bobab. Ulun ane nglawan kita.

9Ulun lakar nyisipang kita ih paranabi ane nepukin wahyu ane palsu muah ane mesuang ramalan ane bobab. Dikalan kaulan Ulune mapiguman, kita lakar tusing bareng ada ditu, buina adan kitane tusing lakar bareng matulis di daptar penduduk Israele. Kita tusing lakar malipetan buin ka gumin kitane. Sasubane keto, kita lakar nawang, mungguing Ulun ene Ida Sang Hyang Widi Wasa Sang Maha Luur.”

10Paranabine ento ngapus kaulan Ulune majalaran ngorahang mungguing makejang suba pada melah. Sujatinne makejang ento tusing melah. Kaulan Ulune ngae tembok aji batu ane ngeleb tusing mengket, tur sasubane keto paranabine ento laut nglabur temboke ento.

11Orahang teken nabi-nabine ento, mungguing temboknyane ento lakar uug. Ulun lakar mriokang ujan bales pesan. Ujan es lakar nepen muah angin baret lakar nempuh temboke ento.

12Temboke ento lakar bah, tur anake makejang lakar nakonin kita amunapa kamelahan lelaburane ento.”

13Sane mangkin, sapuniki sabdan Ida Sang Hyang Widi Wasa Sane Maha Luur: “Sajeroning pidukan Ulune, Ulun lakar nedunang angin baret, ujan bales muah ujan es buat nguugang temboke ento.

14Ulun mapakayun nguugang temboke ane suba labura ento, laut nyambehang batunnyane, tur nepinin batu dasarnyane kanti ngenah. Temboke ento lakar bah tur ngamatiang kita ajak makejang. Sasubane keto, anake makejang lakar nawang, mungguing Ulun ene Ida Sang Hyang Widi Wasa.

15Temboke muah anake ane nglabur ia lakar kaliput baan kawisesan pidukan Ulune. Sasubane keto Ulun lakar ngorahin kita mungguing temboke ento suba sirna, aketo masih anake ane nglabur temboke ento,

16nah ento paranabi ane ngorahang Yerusaleme ento melah, nanging sujatinne tusingja melah.” Kadi asapunika sabdan Ida Sang Hyang Widi Wasa Sane Maha Luur.

17Ida Sang Hyang Widi Wasa ngandika, sapuniki: “Ih manusa, ane jani iwasinja luh-luhe di pantaran rakyat kitane, ane mesuang ramalan. Cacadja ia,

18tur orahang teken ia sabdan Ida Sang Hyang Widi Wasa Sang Maha Luur ane katiba teken ia, kene: Sengkala kita, ih paraluh-luhe makejang. Kita ngaenang anake makejang gelang muah udeng gegemet, apanga ia pada nyidayang nangkeb anak lenan. Kita makeneh ngwawa idup muah matin kaulan Ulune buat anggon kita ngulurin keneh kitane.

19Kita nganistayang Ulun di arep kaulan Ulune, apanga kita maan gandum makudang-kudang gemel muah roti makudang-kudang tebih. Kita ngamatiang anake ane pantes enu idup, tur nepang idup anake ane pantes mati. Aketo kita mobab teken kaulan Ulune, tur kaulan Ulune pada ngugu kita.”

20Sane mangkin sapuniki sabdan Ida Sang Hyang Widi Wasa Sane Maha Luur: “Ulun geting teken gelang gegemet ane anggon kita ngwawa idup muah matin anake ane lenan. Ulun lakar ngampegang gelange ento uli liman kitane, tur lakar mebasang anake ane kawawa baan kita.

21Ulun lakar nguek udeng kitane, tur Ulun lakar nglugrain kaulan Ulune luput uli kawisesan kitane nganti salawas-lawasne. Sasubane keto kita lakar nawang mungguing Ulun ene Ida Sang Hyang Widi Wasa.

22Majalaran bobab kitane, ngawinang anake ane patut, ane pedalem Ulun ento, pada dadi jejeh. Kita tusing nombahang jlemane corah buat ngae corah, tur ngrahayuang idupnyane.

23Wireh keto ane jani wahyun kitane ane palsu muah ramalan kitane ane bobab suba pragat. Ulun ngluputang kaulan Ulune uli sig kakuasan kitane, apanga kita nawang mungguing Ulun ene Ida Sang Hyang Widi Wasa.”

← Chapter 12 Chapter 14 →