Deuteronomy 9

balinese

1“Inggih parasemeton bangsa Israel, pirengangja mangda becik! Ring rahinane puniki parasemeton jaga nglintangin Tukad Yordane jaga ngaug wewidangan bangsa-bangsa sane agengan miwah sitengan ring semeton. Kota-kotannyane ageng-ageng tur benteng-bentengnyane tegeh-tegeh nyucuk langit.

2Pangadeg jadmane irika tegeh-tegeh, pawakanipune ageng-ageng tur siteng-siteng kadi raksasa. Parasemeton sampun pada mireng mungguing nenten wenten anak sane nyidayang nglawan ipun.

3Nanging sane mangkin parasemeton ngraga jaga ngaksi Ida Sang Hyang Widi Wasa, Widin semetone mamargi ring ajeng semetone sakadi geni sane ngeseng. Ida jaga ngaonang ipun ring ajeng semetone, kantos parasemeton digelis nyidayang ngulah tur nyirnayang ipun, sakadi sane sampun kajanjiang antuk Ida Sang Hyang Widi Wasa.

4Sasampune Ida Sang Hyang Widi Wasa, Widin semetone ngulah ipun pabuat parasemeton, pungkuran sampunang pisan semeton raris mabaos ring kayun, mungguing parasemeton tuntun Ida mrika buat nerbeang tanahe punika santukan semeton becik tur ngamargiang pakarsan Ida Sang Hyang Widi Wasa, kantos parasemeton patut nampi tanahe punika. Boya pisan kadi asapunika. Ida Sang Hyang Widi Wasa ngulah bangsane punika pabuat parasemeton, duaning bangsane punika jaat. Ida Sang Hyang Widi Wasa nglugrain parasemeton ngambil tanah ipune, duaning Ida mapakayun jaga negepang prajanjian Idane ring leluur parasemetone: Dane Abraham, Ishak miwah Yakub.

6Parasemeton patut pracaya mungguing Ida Sang Hyang Widi Wasa nglugrain semeton tanah sane gemuh punika boyaja malantaran semeton pantes nampi tanahe punika. Nentenja asapunika. Parasemeton puniki bangsa sane bengkung.

7Elingangja mungguing parasemeton sampun ngawinang Ida Sang Hyang Widi Wasa, Widin semetone duka, duk ring tanah melakange. Ngawit saking semeton matilar saking Mesir, kantos parasemeton rauh iriki ring rahinane puniki, parasemeton sampun tungkas pamantuka ring Ida Sang Hyang Widi Wasa.

8Malahan ring Gunung Sinai parasemeton ngawinang Ida duka pisan, kantos Ida mapakayunan nyirnayang semeton.

9Tiang munggah ka gununge punika buat nampi papan batune sane madaging tulisan prajanjian sane kardi Ida marep ring semeton. Petang dasa rahina suenipun tiang nongos ring duur gununge punika tur nenten nunas miwah nginum.

10Sasampun punika Ida Sang Hyang Widi Wasa raris maicayang papan batune makakalih punika ring tiang. Papane punika sampun tulisin Ida saluiring sabdan Idane sane nikayang Ida ring semeton saking tengah genine, rikala semeton mapupul ring bongkol gununge punika.

11Dadosipun, sasampune lintang petang dasa rahina punika, Ida Sang Hyang Widi Wasa tumuli maicayang ring tiang papan batune makakalih sane madaging tulisan indik prajanjiane punika.

12Ida Sang Hyang Widi Wasa tumuli masabda ring tiang sapuniki: ‘Kema enggalang tuun uli gununge ene, sawireh bangsan kitane ane pimpin kita makaad uli Mesir, suba alpaka, ia suba malaksana jaat. Ia suba lempas uli titah-titah Ulune, laut ngae arca ane dadi sasungsungannyane.’

13Ida taler ngandika sapuniki: ‘Ulun wikan, mungguing bangsane ene bengkung pesan.

14Eda kita matetegar buat nombaang Ulun. Ulun lakar ngeseng ia kantos tusing ada anak ane inget buin teken ia. Nanging kita lakar dadiang Ulun leluur satunggaling bangsa ane gedenan muah kuatan teken bangsane ene.’

15Tiang tumuli tedun saking gununge punika sinambi makta papan batune kekalih sane madaging sasuratan prajanjiane punika. Rikala tiang mamargi tedun saking gununge punika, raris metu geni makelep saking muncuk gununge punika.

16Tiang manggihin parasemeton sampun mamurug titah Ida Sang Hyang Widi Wasa, Widin semetone sane sampun titahang Ida ring parasemeton. Parasemeton sampun madosa ring Ida Sang Hyang Widi Wasa, duaning semeton sampun makarya arca banteng sane malakar antuk logam pabuat ragan semetone.

17Raris ring genahe punika ugi, ring ajeng semetone, papan batune makakalih punika pantigang tiang kantos belah mapilah-pilahan.

18Sasampune punika tiang tangkil malih pisan ring ayun Ida Sang Hyang Widi Wasa ring pucak gununge petang dasa rahina suenipun, nenten nunas wiadin nginem. Tiang ngamargiang indike punika duaning semeton sampun madosa ring Ida Sang Hyang Widi Wasa tur ngawinang Ida duka.

19Tiang ajerih ring pidukan Idane, duaning Ida duka pisan, kantos Ida mapakayun jaga nyirnayang semeton, nanging daweg punika taler Ida nagingin pinunas tiange.

20Ida Sang Hyang Widi Wasa taler duka pisan ring Dane Harun, kantos Ida mapakayun jaga nyedayang dane. Duaning punika tiang taler ngastawa pabuat dane.

21Arca bantenge sane kardi semeton antuk logam punika raris entungang tiang ka genine tumuli intuk tur benyahang tiang kantos dekdek dados abu. Abunnyane raris entungang tiang ring tukade sane membah saking gununge punika.

22Parasemeton sampun ngawinang Ida Sang Hyang Widi Wasa, Widin semetone duka daweg ring Tabera, Masa miwah ring Kibrot-Taawa.

23Sapangrarisipun, rikala Ida Sang Hyang Widi Wasa nitahang mangda semeton matilar saking Kades-Barnea, tur kapangandikayang mangda ngebug jagat sane pacang paicayang Ida ring semeton, parasemeton raris tungkas pamantuka ring Ida, tur semeton nenten pracaya tur nenten tuon ngiring Ida.

24Ngawit saking tiang uning ring semeton, semeton setata nglawan Ida Sang Hyang Widi Wasa.

25Tiang raris sumungkem ring ayun Ida Sang Hyang Widi Wasa petang dasa rahina suenipun, duaning tiang uning mungguing Ida Sang Hyang Widi Wasa sampun nyadia jaga nyirnayang parasemeton.

26Tiang raris ngastawa sapuniki: ‘Oduh Ratu Sang Hyang Widi Wasa Sane Maha Luur, sampunang Palungguh IRatu ngeseng kaulan Palungguh IRatune ngraga. Ipun sampun bebasang miwah tantan IRatu makaon saking Mesir antuk kakuatan miwah kawisesan Palungguh IRatune, sane ageng.

27Ledang Palungguh IRatu eling ring parekan Palungguh IRatune: Abraham, Ishak miwah Yakub, tur sampunang IRatu nglinguang ambek bangsane sane bengkung, jaat miwah madosa puniki.

28Yening Palungguh IRatu jaga nyirnayang kaulan Palungguh IRatune puniki, wong Mesire jaga mabaos mungguing Palungguh IRatu nenten mrasidayang nantan kaulan Palungguh IRatune ngungsi jagat sane janjiang Palungguh IRatu ring ipun. Wong Mesire jaga mabaos mungguing Palungguh IRatu sampun makta bangsane puniki ka tanah melakange buat ngamademang ipun, duaning Palungguh IRatu bendu ring ipun.

29Nanging elingangja, duh Ratu Sang Hyang Widi Wasa, mungguing bangsane puniki sampun selik Palungguh IRatu dados kaulan Palungguh IRatune, tur Palungguh IRatu sampun nantan ipun saking Mesir antuk kakuatan miwah kawisesan sane ageng.’ ”

← Chapter 8 Chapter 10 →