Deuteronomy 33

balinese

1Puniki merta sane kucapang antuk Dane Musa, parekan Ida Sang Hyang Widi Wasa, tumiba ring bangsa Israel, sadurunge dane seda:

2“Ida Sang Hyang Widi Wasa rauh saking Gunung Sinai, Ida endag sakadi suryane ring duur jagat Edome, tur nyunarin kaulan Idane saking Gunung Paran. Ida kasarengin antuk malaekat alaksa akehipun miwah geni murub wenten ring tangan Idane tengen.

3Ida Sang Hyang Widi Wasa asih sueca ring kaulan Idane, tur Ida nyayubin anake sane dados druen Idane. Duaning punika, iraga sumuyud ring bukpadan Idane, sarwi sairing ring pituduh-pituduh Idane.

4Iraga satinut ring pidabdab sane kapaicayang ring iraga antuk Dane Musa sane pinaka dados arta branan bangsan iragane sane luih.

5Ida Sang Hyang Widi Wasa jumeneng nata pabuat kaulan Idane Israel, rikala watek suku bangsannyane miwah parapamimpinnyane paum sinarengan.”

6Dane Musa raris ngandika ngeniang indik suku Ruben sapuniki: “Moga-moga suku Ruben nenten pacang winasa, yadiastun wargannyane wantah akidik.”

7Ngeniang indik suku Yehuda, sapuniki pangandikan danene: “Duh Ratu Sang Hyang Widi Wasa, pirengangja sesambatanipune nunas tulung. Tunggilangja ipun ring suku-suku sane lianan. Duh Ratu Sang Hyang Widi Wasa sarenginja ipun mayuda, tur tulunginja ipun nglawan meseh-mesehipune.”

8Ngeniang indik suku Lewi, sapuniki pangandikan danene: “Duh Ratu Sang Hyang Widi Wasa, sinahangja pakarsan Palungguh IRatu masrana Urim miwah Tumim malantaran suku Lewi kaulan Palungguh IRatu sane satia. Palungguh IRatu sampun mintonin ipun ring Masa. Samaliha Palungguh IRatu sampun muktiang mungguing ipun patut dawege ring toya klebutane ring Meriba.

9Ipun sampun nyinahang subakti sane ageng ring Palungguh IRatu, agengan ring tresnan ipune marep ring wong tua, nyama miwah pianak-pianakipune. Ipun sairing ring sapituduh Palungguh IRatu, tur satia tuu ring prajanjian Palungguh IRatu.

10Ipun jaga nguruk parakaulan Palungguh IRatu buat ninutin pidabdab Palungguh IRatu. Ipun jaga ngaturang aturan ring pamorboran aturan Palungguh IRatu.

11Duh Ratu Sang Hyang Widi Wasa, tulunginja sukune puniki mangda ipun sayan kukuh. Ledanginja saananing sane laksanayang ipun. Enyagangja sakancan mesehipune, kantos nenten mrasidayang bangun malih.”

12Ngeniang indik suku Benyamin, sapuniki pangandikan danene: “Puniki suku sane kasayangang miwah kasayubin antuk Ida Sang Hyang Widi Wasa. Ida nyaga ipun rahina wengi. Samaliha Ida malingga ring pantaranipune.”

13Ngeniang indik suku Yusup, sapuniki pangandikan danene: “Dumadak Ida Sang Hyang Widi Wasa ngamertanin tanahipune antuk sabeh, miwah antuk toya sane metu saking tanahe.

14Dumadak tanahipune kamertanin antuk woh-wohan sane nasak ring punya tur nyabran masa kabekin antuk woh-wohan sane pinih becik.

15Dumadak bukit-bukitipune sane wenten saking nguni-nguni kabekin antuk woh-wohan sane becik-becik.

16Dumadak tanahipune kabekin antuk sakancan sane becik, kamertanin antuk kabecikan Ida Sang Hyang Widi Wasa sane masabda saking tengah bete sane ngendih murub. Dumadak mertane puniki nibenin suku Yusup. Santukan ipun dados pamimpin ring pantaran nyama-nyamaanipune.

17Yusup madue kakuatan sakadi kakuatan banteng jagiran, miwah tanduknyane sakadi tanduk banteng alase. Sane pinaka dados tanduk, inggih punika katurunan Manase sane panyiuan akehipun, miwah katurunan Epraim sane panglaksaan akehnya. Malantaran sang kalih punika ipun nyenggot parabangsane, tur nyabatang bangsa-bangsane punika ngantos rauh ka tanggun jagate.”

18Ngeniang indik suku Sebulon, miwah Isakar dane ngandika sapuniki: “Moga-moga Sebulon gemuh landuh sajeroning padedaganganipune ring segara, samaliha dumadak Isakar sayan nyugihang ring pumahannyane.

19Ipun ngundang wong sunantara ngrauhin gunung-gunungipune, tur ngaturang aturan sane patut irika. Ipun molih kasugihan saking segara, miwah saking biase ring pasisi.”

20Ngeniang indik suku Gad, dane ngandika sapuniki: “Pujija Ida Sang Hyang Widi Wasa, sane sampun malinggahin wewidanganipune. Gad nyantosang tan bina sakadi singa sane jaga nyarap lima wiadin kaun tendas.

21Ipun ngambil tanah sane pinih becik pabuat dewekipune. Duman parapamimpine sampun kapastikayang pabuat ipun. Ipun sairing ring pituduh miwah Pidabdab Ida Sang Hyang Widi Wasa rikala parapamimpin Israele pada paum sinarengan.”

22Ngeniang indik suku Dan, dane ngandika sapuniki: “Dan punika singa bajang sane makecos medal saking Basan.”

23Ngeniang indik suku Naptali, dane ngandika sapuniki: “Naptali punika sugih merta miwah panugrahan Ida Sang Hyang Widi Wasa. Tanahipune ngawit saking Danu Galilea nglajur ngelodang.”

24Ngeniang indik suku Aser, dane ngandika sapuniki: “Aser kamertanin langkungan ring suku-suku sane lianan. Dumadak ipun dados sesayangan nyama-nyamaanipun. Tur tanah ipune dumadak sugih antuk wit saitun.

25Dumadak kotannyane katabengin antuk gapura-gapura besi. Samaliha dumadakja ipun setata wenten sajeroning kerta raharja.

26Semeton bangsa Israel, tan wenten Widi sane sakadi Widin semetone, sane mamarga sajeroning kaluihang nglintang ring langite. Sane mamarga sajeroning megane buat rauh mapaica pitulungan ring semeton.

27Ida Sang Hyang Widi Wasa tansah dados pasayuban semetone. Tangan Idane sane langgeng dados paglantingan semetone. Ida ngulah meseh-meseh semetone saking ajeng semetone, tur Ida ngandikayang semeton, mangda nyirnayang ipun makasami.

28Kadi asapunika katurunan Dane Yakub jaga urip sajeroning kerta raharja. Kerta raharja ring jagat sane bek madaging gandum miwah anggur, jagat sane kasiam antuk damuh saking langite.

29Duh Israel, ambate bagian semetone! Tan wenten anak sane sakadi semeton, semeton dados bangsa sane karahayuang antuk Ida Sang Hyang Widi Wasa. Ida Sang Hyang Widi Wasa ngraga dados tameng miwah pedang semetone buat nawengin semeton tur mapaica kamenangan ring semeton. Meseh-meseh semetone jaga rauh nunas kapiolasan ring semeton, tur semeton jaga nyekjek ipun.”

← Chapter 32 Chapter 34 →