Deuteronomy 29

balinese

1Puniki kecap prajanjian sane kapituduhang antuk Ida Sang Hyang Widi Wasa ring Dane Musa, mangdane karauhang ring bangsa Israel, duk bangsane punika wenten ring tanah Moab. Prajanjiane puniki makadados wewehan prajanjian sane sampun kakardi antuk Ida Sang Hyang Widi Wasa marep ring bangsa Israel duke ring Gunung Sinai.

2Dane Musa ngandikayang mangda bangsa Israele makasami pada mapunduh raris dane ngandika ring ipun sapuniki: “Semeton sareng sami pada sampun ngaksi paindikan-paindikan sane sampun kamargiang antuk Ida Sang Hyang Widi Wasa tumiba ring prabu Mesire miwah ring parabaudandan idane, samaliha tumiba ring sakuubing jagat idane.

3Semeton taler sampun ngaksi bencana sane ageng, praciri-praciri miwah katawahan-katawahan sane ageng sane sampun kakardi antuk Ida Sang Hyang Widi Wasa.

4Nanging ngantos rauh mangkin Ida nenten ngicen semeton ngresep ring paindikan-paindikan sane sampun aksi miwah pireng semeton punika.

5Petang dasa taun suenipun Ida Sang Hyang Widi Wasa nuntun semeton nglintangin tegal melakange, tur pangangge miwah sepatu sane anggen semeton nenten buuk-buuk.

6Semeton nenten madue roti sane ajeng semeton wiadin anggur miwah bir sane inem semeton, nanging Ida Sang Hyang Widi Wasa nyediang kaperluan semetone, buat ngurukang semeton, mungguing Ida punika maraga Widin semetone.

7Tur ritatkala iraga rauh ring genahe puniki Ida Sang Prabu Sihon, ratune ring Hesbon, miwah Ida Sang Prabu Og, ratune ring Basan, pada rauh nyiatin iraga. Nanging iraga ngaonang ida,

8tur ngambil jagat idane raris kadumang ring pantaran suku Ruben, Gad, miwah Manase atenga.

9Duaning punika tinutinja saananing kecap prajanjiane puniki saking satia tuu, mangdane semeton jaga mapikolih ring saluiring pakibeh semetone.

10Ring rahinane puniki semeton sareng sami ngadeg ring ayun Ida Sang Hyang Widi Wasa, Widin semetone, inggih punika parapamimpin miwah parapamrentah semetone, paralanang-lanang,

11istri-istri miwah oka-okan semetone makamiwah wong sunantara sane wenten ring pantaran semetone, sane dados juru ngandik saang miwah nimba toya pabuat semeton.

12Sane mangkin semeton mapunduh iriki buat ngardi prajanjian, ring Ida Sang Hyang Widi Wasa, Widin semetone, saha nampi sane dados tetegenan semetone.

13Malantaran prajanjiane punika sane mangkin Ida Sang Hyang Widi Wasa ngamanggehang semeton dados kaulan Idane tur Ida dados Widin semetone, sakadi sane sampun janjiang Ida ring semeton miwah ring leluur semetone, inggih punika Dane Abraham, Dane Ishak miwah Dane Yakub.

14Ida Sang Hyang Widi Wasa ngardi prajanjian miwah tetegenane puniki, boyaja marep ring semeton kewanten.

15Ida ngardi prajanjiane puniki ring iraga sareng sami, sane ngadeg iriki ring ayun Idane ring rahinane puniki, taler ring parakaturunan iragane sane durung lekad.

16Semeton kantun eling ring kawentenan iragane ring Mesir, miwah indik iragane nglintangin panegaran bangsa-bangsane sane lianan.

17Semeton sampun ngaksi arca-arcanipune sane cemer sane sumbah ipun, sane malakar antuk taru, batu, perak miwah mas.

18Elingangja! Sampunang wenten ring pantaran semetone anak lanang, anak istri, pakurenan miwah palingsehan sane ngadeg iriki ring rahinane puniki, jaga nilar Ida Sang Hyang Widi Wasa, Widin iragane, raris nyungsung widi-widin bangsa-bangsane sane lianan punika. Laksanane sane kadi asapunika tan bina sakadi akah sane mentik dados entik-entikan sane pait, miwah nglengehin.

19Ring pantaran anak sane ring rahinane puniki miragi pakarsan Ida Sang Hyang Widi Wasa punika, sampunangja wenten sane cager ring manahnya, mungguing ipun pacang setata rahayu, yadiastun ipun bengkung buat ngulurin sapakitanipune niri. Indike punika jaga nyirnayang semeton sareng sami, inggih punika sang sane mapakardi becik miwah kaon.

20Ida Sang Hyang Widi Wasa nenten ledang ngampurayang anake sane sakadi asapunika. Nanging pidukan Ida Sang Hyang Widi Wasa sane ngendih murub jaga ngeseng ipun. Samaliha saananing bencanane sane sinurat ring cakepane puniki jaga nibenin ipun, kantos Ida Sang Hyang Widi Wasa nyirnayang ipun makasami.

21Ida Sang Hyang Widi Wasa jaga nadosang ipun conto ring arepan sakancan suku bangsa Israele tur nibakang bencana ring ipun, satinut ring sakancan temahe sane manggeh ring prajanjiane sane sinurat ring cakepan paurukan Ida Sang Hyang Widi Wasa puniki.

22Benjang pungkur katurunan semetone, miwah wong sunantara sane saking doh-doh, jaga ngeton bencana miwah kasangsaran sane karauhang ring jagat semetone, antuk Ida Sang Hyang Widi Wasa.

23Tegal semetone jaga dadosang Ida tegal melakang, katangkeb antuk welirang miwah tasik, tan wenten tanah sane jaga sida katandurin, tur tan wenten padang sane jaga mentik irika. Tanah semetone jaga dados sakadi kota-kotane ring Sodom miwah Gomora, sakadi kota-kotane ring Adma miwah Seboim sane sampun kasirnayang antuk Ida Sang Hyang Widi Wasa, ritatkala Ida kalintang duka.

24Sadaging jagate sami jaga mataken sapuniki: ‘Punapi awinanipun Ida Sang Hyang Widi Wasa nibakang indike punika marep ring tanahipune! Napi awinanipun Ida kalintang duka kadi asapunika?’

25Raris pasaurnyane jagi sakadi asapuniki: ‘Santukan kaulan Ida Sang Hyang Widi Wasa sampun lompang ring prajanjian sane kardi ipun pamantuka ring ayun Idane inggih punika Widin leluurnyane, ritatkala Ida nuntun ipun rarud saking Mesir.

26Ipun nyungsung widi-widi sane lianan, sane durung naenin sungsung ipun, yadiastun Ida Sang Hyang Widi Wasa sampun tan nglugrain ipun nyungsung widi-widi tiosan.

27Punika awinannya Ida Sang Hyang Widi Wasa menggah piduka ring kaulan Idane, tur ngrauhang bencana-bencana sane sinurat ring cakepane puniki ring panegaranipune.

28Ida Sang Hyang Widi Wasa kalintang duka tur sajeroning pidukan Idane sane ageng punika, Ida mancut bangsa Israele saking tanahipune, tur kentungang ka jagat sunantara, mawinan sane mangkin ipun wenten irika.’

29Wenten paindikan-paindikan sane kapingitang antuk Ida Sang Hyang Widi Wasa, nanging Ida sampun nyinahang pidabdab Idane, tur iraga miwah katurunan iragane patut ninutin pidabdabe punika salami-laminipun.”

← Chapter 28 Chapter 30 →