Deuteronomy 23

balinese

1“Anak muani sane materes wiadin pranannyane magetep, tan kalugra dados kaulan Ida Sang Hyang Widi Wasa.

2Panak bebinjat wiadin katurunanipune, yadiastu katurunan sane undag ping dasa nenten kalugra dados kaulan Ida Sang Hyang Widi Wasa.

3Wong Amon wiadin wong Moab, rauh ring katurunanipune sane undag ping dasa, nenten kalugra dados kaulan Ida Sang Hyang Widi Wasa.

4Santukan ipun sampun nenten nyak nyediayang pangan kinum pabuat semeton, rikalaning semeton mamargi rarud saking Mesir, samaliha ipun ngupah Dane Bileam, okan Dane Beor sane saking kota Petor ring Mesopotamia, mangda nemah semeton.

5Nanging Ida Sang Hyang Widi Wasa, Widin semetone nenten kayun mirengang pinunas Dane Bileam, malahan Ida malikang temahe punika dados merta, santukan Ida asih sueca ring semeton.

6Sakantun semeton dados satunggiling bangsa, sampunangja semeton matulung wiadin ngibehang mangda bangsane punika muponin gemuh landuh.

7Sampunangja semeton nganistayang wong Edom, santukan semeton masemeton ring ipun. Sampunang taler nemberang wong Mesir, santukan semeton naenin urip ring jagatipune.

8Ngawit saking katurunanipune sane undag ping tiga, ipun kalugra dados kaulan Ida Sang Hyang Widi Wasa.”

9“Rikalaning semeton wenten ring pakemahan ring masa payudan, semeton patut ngedohang saluiring paindikan sane ngawinang semeton leteh.

10Yening wenten anak sane leteh, malantaran ipun ngipi belus ring wengine punika, ipun patut medal saking pakemahane tur nongos ring jabaan pakemahane.

11Sasampune makire nyoreang, ipun patut mabresih, tur rikalaning surup suryane ipun kalugrain ngranjing ring pakemahane.

12Semeton patut makarya genah ring jabaan pakemahane punika, buat genah semetone makoratan.

13Rikalan semetone makoratan, semeton patut makta panyongcongan anggen nyongcong tanah, buat nanem bacin semetone.

14Piaraja pakemahan semetone mangda tetep suci, santukan Ida Sang Hyang Widi Wasa, Widin semetone wenten ring pantaran semetone, ring pakemahan semetone, buat nyayubin semeton, tur ngicen semeton kamenangan arep ring meseh-meseh semetone. Sampunang semeton nglaksanayang paindikan sane tan patut, sane ngawinang Ida Sang Hyang Widi Wasa tan lingu ring semeton.”

15“Yening wenten satunggiling panjak sane minggat saking pamekelipune, tur rauh nunas pasayuban ring semeton, sampunang ipun lipetanga ring pamekelipune.

16Ipun dados madunungan ring sinalih tunggil kotan semetone sane pilih ipun, tur semeton tan dados ngala-ala ipun.

17Watek wong Israel, lanang wiadin wadon, sampunangja wenten sane dados panayang ring pura-puran dewa-dewane.

18Kadi asapunika taler jinah pikolih ulihan nayang punika, sampunangja baktana ka Perhyangan Ida Sang Hyang Widi Wasa, Widin semetone buat jaga naur sesangi. Ida Sang Hyang Widi Wasa bendu ring sawatek panayang sane wenten ring pura-purane punika.

19Yening semeton maselangang jinah wiadin pangan wiadin barang-barang lianan ring sesaman semetone Israel, sampunangja semeton nagih putranipune.

20Buat barang-barang sane paselangang semeton ring wong sunantara, semeton dados nagih putranipun, nanging buat barang sane paselangang semeton ring sesaman semetone Israel, sampunang semeton nagih putranipun. Tinutinja pidabdabe puniki, tur Ida Sang Hyang Widi Wasa, Widin semetone jaga ngamertanin sakancan pakibeh semetone ring jagat sane pacang aug semeton.

21Yening semeton masesangi ring ayun Ida Sang Hyang Widi Wasa, Widin semetone, sampunang semeton masangke jaga naur sesangin semetone. Ida Sang Hyang Widi Wasa jaga nagih sesangin semetone, tur semeton madosa yening semeton nenten naur sesangine punika.

22Yening semeton nenten masesangi ring ayun Ida Sang Hyang Widi Wasa, semeton nentenja madosa,

23nanging yen semeton saking suka lila masesangi, semeton patut naur sesangi punika.

24Yening semeton mamargi nglintangin abian anggur anak lian, semeton dados ngajengang buah anggur sakita karep semetone, nanging sampunang wenten sane penpen semeton ring kranjang semetone.

25Yening semeton mamargi nglintangin pategalan gandum anak lian sane durung kanyi, semeton dados nunas gandum amunapija sane keni kaud antuk tangan semetone, nanging sampunang arita gandume punika.”

← Chapter 22 Chapter 24 →