Deuteronomy 20

balinese

1“Yening semeton medal ka payudan ngarepin meseh semetone, raris cingak semeton kreta miwah kuda miwah wadua bala akehan ring druen semetone, sampunangja ajerih ring ipun. Ida Sang Hyang Widi Wasa, Widin semetone, sane sampun mebasang semeton saking jagat Mesir, Ida pacang ngiangin semeton.

2Sadurung semeton ngawitin mayuda, patut wenten pandita adiri ngadeg ring ajeng wadua balane tur ngandika sapuniki:

3‘Ih wong Israel, padingehangja. Ane jani nyama lakar luas masiat. Eda pesan nyama jejeh teken musuh nyamane wiadin ilang kawanenan nyamane muah bingung.

4Ida Sang Hyang Widi Wasa, Widin nyamane lakar ngiangin nyama, tur Ida lakar mapaica kamenangan teken nyama.’

5Sasampune punika parasenapatine patut mapidarta ring prajurite, sapuniki: ‘Punapike wenten iriki semeton sane wau ngwangun umah, nanging durung mlaspasin umahnyane punika? Yening wenten, ipun patut budal. Duaning yening ipun padem ring payudan, anak lianan sane jaga mlaspas umahipune.

6Punapike wenten iriki semeton sane wau nandur wit anggur, nanging durung naenin polih ngalapin wohnyane? Yening wenten, anake punika patut budal, santukan yening ipun padem ring payudan, anak lianan sane jaga mupuang angguripune.

7Punapike wenten iriki semeton sane magegelan tur jaga mamanah nganten? Yening wenten, ipun patut budal santukan yening ipun padem ring payudan, anak tios jaga nganten ngajak gegelan ipune.’

8Parasenapatine taler patut mabaos ring prajurite sapuniki: ‘Punapike iriki wenten semeton sane gringgingan tur marasa ajerih? Yening wenten ipun patut budal, santukan ipun pacang ngusakang semangat kaprawiran prajurite sane lianan.’

9Yening parasenapatine sampun puput mabaos ring prajurite, irika raris patut kapilih komandan-komandan pasukan, sane jaga mimpin asing-asing pasukane punika.

10Yening semeton jaga anglurug satunggiling kota, pinih riin semeton patut nguehin sela ring rakyat kotane punika, buat nyerahang dewek ring semeton.

11Yening ipun mukak gapurannyane tur nyerah ring semeton, ipun sareng sami patut kapaksa kadadosang panjak miwah pangayah semetone.

12Nanging yening wong kotane punika nenten nyak nyerah, nanging ipun mamanah mayuda, kurungja kotane punika antuk wadua balan semetone.

13Samaliha yening Ida Sang Hyang Widi Wasa, Widin semetone, nglugrain semeton ngaonang kotane punika, pademangja sakancan jadmane muani-muani sane wenten irika.

14Semeton wantah kalugrain ngambil pabuat ragan semetone ngraga inggih punika: paraistri, pararare, ingon-ingon miwah sane lian-lianan malih, sane wenten ring kotane punika. Semeton dados ngunayang saluiring sane dados paderben meseh semetone. Ida Sang Hyang Widi Wasa, Widin semetone sampun maicayang punika ring semeton.

15Kadi asapunika patutipun semeton malaksana marep ring kota-kota sane doh genahipun saking jagat sane pacang aug semeton.

16Nanging yen semeton ngaonang kota-kota ring jagat sane jaga kapaicayang ring semeton antuk Ida Sang Hyang Widi Wasa, Widin semetone, pademangja sakancan wong kotane punika.

17Jadma-jadmane makasami sane patut sirnayang semeton, inggih punika wong Het, wong Amori, wong Kanaan, wong Peris, wong Hewi, miwah wong Yebus, sakadi pituduh Ida Sang Hyang Widi Wasa ring semeton.

18Pademang ipun makasami, mangda sampunang ipun ngawinang semeton madosa pamantuka ring ayun Ida Sang Hyang Widi Wasa, malantaran semeton ninutin paurukan-paurukanipune nglaksanayang paindikan-paindikan sane cemer, sane laksanayang ipun rikalaning ipun mabakti ring widi-widinnyane.

19Yening semeton jaga anglurug satunggiling kota, sampunangja semeton ngebah wit woh-wohannyane, yadiastu semeton ngantos sue ngurung kotane punika. Woh-wohanipune dados ajengang nanging punyanipun sampunang sirnayanga, santukan punyanipune punika boya meseh semetone.

20Wit tarune sane lianan sane nenten ngasilang woh, dados bah tur gunayang anggen gelar sajeroning semeton ngurung kotane punika, kantos kotane punika kaonang semeton.”

← Chapter 19 Chapter 21 →