2 Samuel 19 — balinese

1Dane Yoab miragi orti mungguing Ida Sang Prabu Daud nangis kaduhkitan mangenang Ida Absalom.

2Duaning punika kaliangan uli krana molih ring rana mabalik dados sedih pabuat wadua balan sang prabune, duaning miragi mungguing ida sang prabu nangis kaduhkitan mangenang putran idane punika.

3Parawadua balane sami raris pada sesingidan mawali ka kota, sakadi prajurite sane kimud, duaning ipun jerih saking payudan.

4Ida sang prabu nekep prarai, tur nangis gerong-gerong sarwi masesambatan: “Oduh cening, cening Absalom! Cening Absalom!”

5Dane Yoab tumuli ngranjing ka purin ida sang prabu, sarwi matur asapuniki: “Ring rahinane puniki iratu sampun ngardi kimud pabuat parakaulan iratune sane sampun ngrahayuang iratu, sane tindih kantos paraputra, rabi miwah selir iratune kantun nyeneng rauh mangkin.

6Palungguh iratu duka ring jadmane sane subakti ring iratu, nanging tresna ring jadmane sane geting ring iratu. Sane mangkin iratu nyinahang mungguing prakanggene miwah kaulane sami nenten pisan wenten aji ring ajeng iratu. Menawi palungguh iratu jaga gargita pisan yening Ida Absalom kantun nyeneng, tur titiang parakaulan iratune padem sami.

7Sane mangkin rarisang medal tur degdegangja manah parakaulan iratune. Yening nenten asapunika, titiang masumpah sajeroning parab Ida Sang Hyang Widi Wasa, benjang semengan makasami kaula druene jaga nilarin iratu. Indike punika jaga langkungan kaonipun yen bandingang ring saluiring kasangsaran sane naenin tandangin iratu.”

8Sasampune punika ida sang prabu raris matangi tur lunga ka gapuran kotane saha malinggih irika. Rikala parakaulan idane miragi mungguing ida wenten irika, ipun raris pada rauh nangkilin ida. Daweg punika wong Israele sami pada jerih tur ngungsi umahnyane suang-suang.

9Rakyate ring sakuub jagat Israele, sami pada matembung baos ring nyama-nyamaanipune sapuniki baosne: “Ida Sang Prabu Daud suba mebasang iraga uli sig musuh-musuh iragane, ida suba mebasang iraga uli bangsa Pilistin, nanging ane jani ida malaib uli ajeng Ida Absalom tur nilar panegarane.

10Iraga ngamanggehang Ida Absalom dadi prabu dini, nanging ane jani ida suba seda di payudan. Sasubane keto ngudiang dadi tusing ada anak ane ngaturin Ida Sang Prabu Daud apanga ida mawali?”

11Orti ngeniang bebaosan wong Israele punika taler rauh ring Ida Sang Prabu Daud. Duaning punika ida raris ngutus Pandita Sadok miwah Pandita Abyatar mangda mataken ring parapamimpin suku bangsa Yehudane kadi asapuniki: “Ngudiang dadi nyama ane paling durina buat ngaturin ida sang prabu mantuk ka purin idane.

12Nyama ajak makejang dadi kadang wargan gelahe, tunggal purusa. To ngudiang dadi nyama ane paling durina ngajak gelahe mulih?”

13Ida Sang Prabu Daud taler ngandikain sang kalih, mangda ngrauhang wecanan idane ring Dane Amasa, kadi asapuniki: “Paman ene palelintihan gelahe. Uli jani gelahe netepang paman dadi senapatin gelahe, ngentinin paman Yoab. Dumadak Ida Sang Hyang Widi Wasa ngamatiang gelahe, yening gelahe tusing tuon teken munyi.”

14Pangandikan Ida Sang Prabu Daud punika katampi pisan antuk suku bangsa Yehudane sami. Irika suku bangsa Yehudane tumuli ngutus utusan ngaturin Ida Sang Prabu Daud miwah parapangagenge mantuk.

15Rikala mamargi budal, Ida Sang Prabu Daud raris kapendakin antuk paraanak Yehudane ring Tukad Yordane. Ipun sami pada rauh ring Gilgal, misadia jaga ngiringang rikala Ida Sang Prabu Daud jaga nglintang ring tukade.

16Duk punika ugi, Dane Simei okan Dane Gera, wong Benyamin sane saking Bahurim gegelisan rauh ring Tukad Yordane, misadia tangkil ring Ida Sang Prabu Daud.

17Dane Simei kasarengin antuk wong Benyamin sareng siu diri. Kadi asapunika taler Siba, sane dados parekan kulawargan Ida Sang Prabu Saul taler rauh kasarengin antuk pianaknyane sareng limolas diri miwah rencangnyane sareng kalihdasa diri. Ipun sareng sami dumunan ring Ida Sang Prabu Daud rauh ring Tukad Yordane.

18Ipun tumuli nglintang ring tukade punika, misadia mapitulung nglintangang rombongan ida sang prabu tur jaga nglaksanayang napija sane kuduhang antuk ida sang prabu. Rikala ida sang prabu misadia pacang nglintang, Dane Simei tumuli nylempoh tangkil ring ida, sarwi matur asapuniki:

19“Oduh ratu sang prabu, ledang palungguh iratu nglaliang dosan titiange sane kardi titiang rikala iratu matilar saking Yerusalem. Sampunang iratu ngwalesang indike punika ring titiang, samaliha sampunang malih iratu ngelingang indike punika.

20Titiang rumasa, mungguing titiang sampun madosa ring iratu, punika awinanipun saking suku bangsane sane wenten ring tepi siringe kaler, titiang sane pinih dumun nangkilin palungguh iratu ring rahinane puniki.”

21Dane Abisai okan Dane Seruya raris mabaos asapuniki: “Simei patut kadanda pati, santukan ipun sampun nemah misuh sang sane kaselik jumeneng prabu antuk Ida Sang Hyang Widi Wasa.”

22Nanging Ida Sang Prabu Daud raris ngandika ring Dane Abisai, miwah ring Dane Yoab, asapuniki: “Gelahe tusing ngidih tetimbangan teken paman. Eda paman ngaenang gelahe pakewuh. Ane jani gelahe ane dadi prabun bangsa Israele, tur tusing dadi ada anak kamatiang di Israel di dinane jani.”

23Wus punika, ida raris ngandika ring Dane Simei asapuniki: “Gelahe majanji mungguing paman tuara lakar kadanda pati.”

24Sasampune punika Ida Mepiboset putun Ida Sang Prabu Saul, raris rauh tangkil ring Ida Sang prabu Daud. Ida Mepiboset nenten masehin cokor idane, samaliha ida nenten nyukur jenggot tur nenten ngumbah busanan idane, sasukat Ida Sang Prabu Daud matilar saking Yerusalem, kantos ida mawali malih sasampune molih ring rana.

25Rikala Ida Mepiboset sampun nilar Yerusalem tur tangkil ring Ida Sang Prabu Daud, ida sang prabu tumuli ngandika asapuniki: “Cening Mepiboset, ngudiang dadi cening tusing bareng rarud ajak bapa?”

26Atur Ida Mepiboset: “Singgih ratu sang prabu, palungguh iratu wikan mungguing titiang puniki jadma perot. Titiang sampun ngenken parekan titiange mangda masang kedapa ring keledaen titiange mangda titiang prasida ngiringang iratu, nanging ipun nilas titiang.

27Ipun sampun misunayang titiang ring ajeng palungguh iratune. Nanging palungguh iratu tan bina kadi malaekat Ida Sang Hyang Widi Wasa, duaning asapunika, rarisang margiang napija sane mantuk ring kayun.

28Kadang wargan bapan titiange sami patut katibenin danda pati antuk palungguh iratu, nanging titiang sampun polih sih sueca, inggih punika titiang kalugra ngiring palungguh iratu marayunan. Sane mangkin titiang nenten purun malih nunas punapa-punapi saking palungguh iratu.”

29Pangandikan ida sang prabu: “Nah tusing nyandang cening ngorahang unduke ento buin. Bapa suba mutusang, mungguing cening ajak I Seba patut ngedum duen Ida Sang Prabu Saule.”

30Atur Ida Mepiboset: “Inggih ratu sang prabu, banggayang sampun ipun ngambil makasami. Pabuat titiang sampun cukup mungguing palungguh iratu sampun mawali mantuk saha rahajeng.”

31Dane Barsilai wong Gilead punika taler rauh saking Rogelim, jaga ngiring nglintangang kulawargan Ida Sang Prabu Daud ring Tukad Yordane.

32Dane Barsilai punika sampun lingsir pisan, yusan danene ulung dasa warsa. Dane sugih pisan tur dane sane ngaturin Ida Sang Prabu Daud rayunan rikala ida wenten ring Mahanaim.

33Ida Sang Prabu Daud ngandika ring dane asapuniki: “Jalan bapa bareng ka Yerusalem, tiang lakar miara bapa ditu.”

34Nanging atur Dane Barsilai sapuniki: “Singgih ratu sang prabu, nenten wenten gunanipun titiang ngiringang iratu ka Yerusalem, duaning nentenja pacang sue titiang kantun urip.

35Umur titiange sampun ulung dasa warsa, tur nenten wenten malih indik sane jaga ngliangin manah titiange. Titiang sampun nenten mrasidayang ngrasayang pangan kinum sane becik, samaliha titiang sampun nenten mrasidayang malih miragiang suaran anak makidung. Titiang wantah jaga ngawinang abot palungguh iratu kewanten.

36Nenten pisan pantes titiang nampi pikolih sane kalintang utama punika. Duaning asapunika titiang wantah jaga ngiringang iratu nglintangin Tukad Yordane puniki kewanten.

37Sasampune punika lugrainja titiang mapamit budal, tur pacang padem nampek ring setran paraleluur titiange. Puniki Kimham, pianak titiange jaga ngaula ring palungguh iratu. Ledang iratu makta ipun, tur durusang anggen ipun sapakarsan iratune.”

38Pangandikan ida sang prabu: “Nah gelahe lakar ngajak ia tur lakar nganggo ia buka pangidih bapane. Sajaba ento, gelahe masih lakar ngisinin apaja ane idih bapa.”

39Wusan punika Ida Sang Prabu Daud miwah parapangiring idane raris nglintang ring Tukad Yordane. Ida ngaras Dane Barsilai saha ngamertanin dane. Sasampune punika Dane Barsilai raris budal.

40Rikala ida sang prabu sampun nglintangin Tukad Yordane, ida kairing antuk wong Yehuda miwah apahan saking wong Israele. Ida raris ngungsi ka Gilgal, tur Dane Kimham taler sareng ngiringang ida.

41Irika sawatek wong Israele raris matur ring ida sang prabu kadi asapuniki: “Singgih ratu sang prabu, napi awinannya nyama-nyamaan titiange suku bangsa Yehuda, mitaenang mungguing ipun sane patut mendakin tur ngiringang kulawargan iratu saha pangiring-pangiring iratune nglintangin Tukad Yordane?”

42Wong Yehudane tumuli masaur asapuniki: “Tiang ajak makejang nglaksanayang buka keto, sawireh ida sang prabu tunggal purusa ajak tiang. Apa krana nyama jeg pedih? Ida sang prabu tusing ngupahin tiang baan pangan wiadin apa-apaan.”

43Pasaur wong Israele: “Yadiastu Ida Sang Prabu Daud tunggal purusa ajak nyama, nanging tiang makejang ngelah hak tikel ping dasa, yan bandingang teken nyama. Apa krana nyama nganistayang tiang ajak makejang? Tegarang ingetang nyen ane maluan ngitungang apanga Ida mantuk!” Nanging wong Yehudane, bangetan keras baosnyane yan bandingang ring wong Israele sami.