2 Kings 13

balinese

1Ring taun sane kaping tigalikur duk Ida Sang Prabu Yoas putran Ida Sang Prabu Ahasia jumeneng prabu ring Yehuda, Ida Sang Prabu Yoahas okan Ida Sang Prabu Yehu jumeneng prabu ring Israel, tur ida mrentah ring Samaria pitulas taun suenipun.

2Ida Sang Prabu Yoahas taler ngardi dosa ring Ida Sang Hyang Widi Wasa, sakadi pamargin Ida Sang Prabu Yerobeam. Ida ngawinang bangsa Israel ngardi dosa, tur ida nentenja kayun nilar dosa-dosane punika.

3Duaning punika Ida Sang Hyang Widi Wasa raris duka ring bangsa Israel, tur Ida raris manggayang Ida Sang Prabu Hasael prabune ring Siria miwah Ida Sang Prabu Benhadad putran idane mawali-wali ngaonang panegara Israele.

4Ida Sang Prabu Yoahas raris ngastawa ring Ida Sang Hyang Widi Wasa, tur Ida Sang Hyang Widi Wasa ngaksi indik bangsa Siriane nindes bangsa Israele, banget pisan. Duaning punika Ida Sang Hyang Widi Wasa raris nagingin pangastawan Ida Sang Prabu Yoahase.

5Ida Sang Hyang Widi Wasa tumuli ngicen bangsa Israele pamimpin asiki buat mebasang ipun saking bangsa Siriane. Duaning punika bangsa Israele raris muponin kerta raharja sakadi sane sampun-sampun.

6Nanging bangsa Israele taler nenten nyak ngutang dosa-dosannyane, sane kurukang antuk Sang Prabu Yerobeam, samaliha ipun kantun miara arcan Dewi Aserane ring Samaria.

7Ida Sang Prabu Yoahas nenten kantun madue wadua bala sajawining prajurit nunggang kuda seket diri, kreta perang adasa, miwah prajurit dasa tali diri, santukan sisannyane sane tiosan sampun kasirnayang antuk sang prabu Siriane kajekjek sakadi nyekjek abune.

8Saluiring pamargin Ida Sang Prabu Yoahas miwah kaprawiran idane sinurat wenten ring Cakepan Babad Pararatun Israele.

9Ida seda tur kaperemang ring Samaria, tur putran idane Ida Yoas raris jumeneng prabu ngentosin ida.

10Ring taun sane kaping tigang dasa pitu duk Ida Sang Prabu Yoas jumeneng prabu ring Yehuda, Ida Sang Prabu Yoas putran Ida Sang Prabu Yoahase jumeneng prabu ring Israel, tur mrentah ring Israel nembelas taun suenipun.

11Ida taler ngardi dosa ring Ida Sang Hyang Widi Wasa tur nulad kajaatan Ida Sang Prabu Yerobeam sane ngawinang bangsa Israele madosa.

12Saluiring pamargin Sang Prabu Yoas, minakadinipun kaprawiran idane mayuda nglawan Sang Prabu Amasia, prabune ring Yehuda, makasami kunggahang ring Cakepan Babad Pararatun Israele.

13Ida Sang Prabu Yoas seda tur kaperemang ring pamendeman pararatune ring Samaria, tur putran idane Ida Yerobeam raris ngentosin ida dados prabu.

14Dane Elisa keni sungkan sane raat pisan. Rikala dane makire seda Ida Sang Prabu Yoas, prabune ring Israel raris ninjoin dane. Ida sang prabu tumuli nangis masesambatan kadi asapuniki: “Oduh guru, guru sane dados patindih sane kuat pabuat bangsa Israele.”

15Dane Elisa tumuli matur sapuniki: “Rarisang iratu ngambil panah.” Sang Prabu Yoas tumuli ngambil panah.

16Nabi Elisa matur mangda sang prabu tragia jaga mamanah. Ida Sang Prabu Yoas ngamargiang indike punika. Dane Elisa ngenahang tangan danene ring tangan ida sang prabu.

17Sapangrarisipun malantaran prentah sang nabi, ida sang prabu raris mukak jendelane sane marep ka panegara Siria. Dane Elisa matur sapuniki: “Tiwakangja panahe punika!” Rikala ida sang prabu nglepas panah idane, Dane Elisa nyerit sapuniki: “Palungguh IRatu dados panah Ida Sang Hyang Widi Wasa, tur malantaran iratu puniki Ida jaga menang nglawan wong Siriane. Iratu jaga ngebug bangsa Siriane ring Apek, tur iratu jaga ngaonang ipun.”

18Sapangrarisipun Dane Elisa nunas mangda ida sang prabu ngambil panah-panahe sane tiosan tur manteg-manteg tanahe antuk panahe punika. Ida sang prabu manteg tanahe kantos ping tiga tumuli mararian.

19Indike punika ngawinang Dane Elisa raris duka sarwi matur ring sang prabu sapuniki: “Sapatutipun iratu manteg kantos ping lima wiadin ping nem. Malantaran punika iratu jaga molih kamenangan sane ageng nglawan bangsa Siriane, nanging sane mangkin iratu jaga menang wantah ping tiga nglawan bangsa Siriane.”

20Nenten malih amunapi suenipun, Dane Elisa raris seda tur layon danene raris kapendem. Nyabran taun parampok wong Moabe biasa nglurug ka wewidangan Israele.

21Sedek rahina anu, rikala anake sedek mendem sawa, raris wenten kantenang ipun grombolan wong Moab rauh. Anake sane sedek mendem sawa raris ngentungang sawane ka kuburan Dane Elisane tumuli ipun malaib. Rikala sawane punika makeplug ring galih Dane Elisa, jadmane punika jeg malih idup tumuli bangun.

22Sapanyeneng Ida Sang Prabu Yoahas, Ida Sang Prabu Hasael prabune ring Siria tansah nyangsarain bangsa Israele.

23Nanging Ida Sang Hyang Widi Wasa asih sueca miwah welas arsa ring bangsa Israele. Ida nenten manggayang bangsa Israele pacang kasirnayang, nanging Ida mapaica pitulung ring ipun uli krana janjin Idane ring Abraham, Ishak miwah Yakub. Kantos mangkin Ida nenten naenin lali ring kaulan Ida.

24Rikala Ida Sang Prabu Hasael, prabune ring Siria seda, putran idane Ida Sang Prabu Benhadad raris jumeneng prabu.

25Raris Ida Sang Prabu Yoas, prabun wong Israele ngaonang Ida Sang Prabu Benhadad kantos ping tiga, tur ngrampas malih kota-kota sane sampun karampas antuk Sang Prabu Benhadad rikala Ida Sang Prabu Yoahas ajin Ida Sang Prabu Yoase jumeneng prabu.

← Chapter 12 Chapter 14 →