2 Chronicles 23

balinese

1Sasampune nem taun, Sang Pandita Yoyada raris mapakayun, mungguing sane mangkin rauh panemayannya buat jaga nyinahang anake alit punika. Dane raris mapiguman ring parakomandan wadua balane sareng limang diri, inggih punika: Dane Asarya okan Dane Yeroham, Dane Ismael okan Dane Yohanan, Dane Asarya okan Dane Obed, Dane Maaseya okan Dane Adaya miwah Dane Elisapat okan Dane Sikri.

2Dane sareng sami raris lunga nylajah sakancan kotane ring Yehuda, tur rikala mawali ka Yerusalem dane pada ngajak parawong Lewi miwah pamimpin-pamimpin palingsehane.

3Dane sareng sami pada mapunduh ring Perhyangan Agung, tur irika dane ngardi pasubaya sareng Ida Yoas putran ida sang prabu. Dane Yoyada raris mabaos ring dane sareng sami, sapuniki: “Puniki putran ida sang prabu sane sampun newata. Sane mangkin ida patut kadegang dados prabu, satinut ring janjin Ida Sang Hyang Widi Wasa marep ring katurunan Ida Sang Prabu Daud.

4Kadi asapuniki sane patut margiang iraga. Rikala parapandita miwah wong Lewine jaga ngamargiang darma kapanditannyane ring rahina Sabate, apahtiga saking pantarannyane patut nyaga gapurane,

5apahtiga sane patut nyaga ida sang prabu, tur sisannyane mangda magenah ring Gapura Dasare. Rakyate makasami patut mapunduh ring natar Perhyangan Agunge.

6Tan wenten anak sane kalugra ngranjing ka Perhyangan Agung, sajawining parapandita miwah wong Lewi sane ngamargiang darma kapanditannyane. Dane dados ngranjing santukan dane kasuciang, nanging rakyate sane lianan patut satinut ring sapatitah Ida Sang Hyang Widi Wasa tur mangda magenah ring jaba.

7Parawong Lewine patut ngiter ida sang prabu, tur ngagem sanjata saha sregep miwah ngiring ida sang prabu saparilampah idane. Asing-asing anak sane mamanah ngranjing ka Perhyangan Agung patut kapademang.”

8Parawong Lewi miwah wong Yehudane raris nglaksanayang sapatitah Dane Yoyada punika. Anake sane sampun muputang ayahnyane ring rahina Sabate pada nenten kicen bubar. Duaning punika parakomandane raris munduhang pasukannyane sane patut bubar miwah sane wau rauh jaga ngentosin ngayah ring rahina Sabate.

9Dane Yoyada raris ngicen parakomandane punika tumbak miwah tameng, sane pecak druen Ida Sang Prabu Daud, sane kasimpen ring Perhyangan Agung.

10Dane ngenahang rakyate sane sregep ngagem sanjata punika ring arepan Perhyangan Agunge makaileh buat nyaga ida sang prabu.

11Sasampune punika Dane Yoyada raris nuntun Ida Yoas medal, tumuli kasalukin gelungan kaprabon miwah katurin cakepan pidabdab indik nyakra werti. Masrana punika ida kamanggehang jumeneng nata. Dane Pandita Yoyada miwah oka-okan danene tumuli nyriokin Ida Sang Prabu Yoas antuk minyak upacara, tur rakyate sami pada masuryak sapuniki: “Dirga yusa ida sang prabu!”

12Riwau Sang Raja Putri Atalya mireng rakyate masuryak-suryak mendak ida sang prabu, ida raris digelis lunga ka Perhyangan Agung ring genah rakyate pada mapunduh.

13Irika cingak ida sang prabu sane anyar ring pamedal Perhyangane, ngadeg ring samping pilare sane kacawisang buat pararatune, kiter antuk parakomandan wadua balane miwah juru trompete. Sakancan rakyate sami pada liang masuryak-suryak miwah ngupin trompet miwah parajuru tabuh Perhyangane pada nabuh tetabuhannyane nuntun upacarane punika. Irika Sang Raja Putri Atalya nyetset busanan idane, sarwi jerit-jerit, sapuniki: “Dura cara, dura cara!”

14Dane Yoyada nenten ngarsayang mangda Ida Atalya kasedayang ring palemahan Perhyangan Agunge, duaning punika dane raris ngesengin parakomandan wadua balane, tur ngandika sapuniki: “Ajak ida medal sig selagan barisan pasukane, tur matiangja asing-asing anak ane makeneh ngluputang ida.”

15Ida raris kejuk, tumuli kabakta ka puri, tur kasedayang ring Gapura Kudane.

16Sang Pandita Yoyada raris ngiring Ida Sang Prabu Yoas miwah rakyate sami makarya prajanjian, mungguing ida miwah rakyate sami patut dados kaulan Ida Sang Hyang Widi Wasa.

17Sasampune punika ida dane ipun sami raris pada lunga ka perhyangan Baale, tur nguug perhyangane punika. Ida miwah rakyate sami raris nyakcak pamorboran aturan miwah arca-arca sane wenten irika, tur nyedayang Dane Matan, sane dados panditan Dewa Baale, ring arepan pamorboran aturane punika.

18Dane Yoyada raris nabdab parapanditane miwah wong Lewine buat ngamong pakaryan ring Perhyangan Agung. Dane sareng sami pada nglaksanayang darmaning kapanditannyane, sakadi sane sampun kadabdab antuk Ida Sang Prabu Daud, buat morbor aturan sane katur ring Ida Sang Hyang Widi Wasa, satinut ring pidabdab dane Nabi Musa. Dane taler pada ngenterang tetabuhan miwah upacara-upacarane makasami.

19Dane Yoyada taler ngenahang pajagaan ring gapuran Perhyangan Agunge, buat ngamedalang asing-asing anak sane cemer manut sopacaraning agama.

20Parakomandan wadua balane, parapamimpin rakyate, paraprakanggene miwah rakyate sane lianan sami pada nyarengin Dane Yoyada, meedang ida sang prabu medal saking Perhyangan Agung jaga mantuk ka puri. Rakyate sami pada ngranjing ka puri nglintang ring gapura sane pinih ageng, tur ida sang prabu raris malinggih ring singasanan idane.

21Sakancan rakyate sami pada kaliput antuk kaliangan, tur kotane sutrepti, duaning sane mangkin Ida Atalya sampun kasedayang.

← Chapter 22 Chapter 24 →