2 Chronicles 20

balinese

1Sasampune punika wadua balan Moab miwah Amone, kasarengin antuk kantinnyane wong Meunim, raris rauh ngebug jagat Yehudane.

2Irika raris wenten anak rauh nguningayang ring Ida Sang Prabu Yosapat, sapuniki: “Wenten wadua bala akeh pisan saking Edom, sane rauh saking selat Segara Matine, gumanti jaga ngebug palungguh iratu. Sane mangkin ipun sampun ngaug kota Haseson-Tamare.” (Kotane puniki taler mawasta En-Gedi.)

3Ida Sang Prabu Yosapat kalintang kagiat, tumuli ngastawa ring Ida Sang Hyang Widi Wasa nunas tuntunan Idane. Sasampune punika ida ngwedalang prentah mapuasa, mangda kalaksanayang ring jagat Yehudane.

4Saking sakancan kotane ring Yehuda rakyate pada gegison rauh ka Yerusalem, buat nunas tuntunan Ida Sang Hyang Widi Wasa.

5Anake punika, miwah wong kota Yerusaleme sami pada mapunduh ring natar Perhyangan Agunge sane anyar. Ida Sang Prabu Yosapat tumuli ngadeg ring arepan rakyate punika,

6sarwi ngastawa jangih sapuniki: “Duh Ratu Sang Hyang Widi Wasa, Widin leluur titiange. Palungguh IRatu jumeneng mrentah sakancan bangsane ring jagate saking suargan. Palungguh IRatu kalintang mawisesa miwah maha kuasa, tur nenten wenten anak sane mrasidayang mapas Palungguh IRatu.

7Palungguh IRatu dados Widin titiange. Rikala kaula druene Israel magingsir ka jagate puniki, Palungguh IRatu ngulah bangsane sane magenah iriki, tur maicayang tanah puniki ring katurunan Abrahame, sawitran Palungguh IRatu, buat dados paderbeanipune kantos salami-laminipun.

8Kaula druene sampun magumana iriki, tur sampun ngwangun Perhyangan buat ngluihang Palungguh IRatu. Ipun uning,

9mungguing yening wenten bencana nibenin ipun buat nyisipang ipun, luiripun: paperangan, grubug, sayah, irika ipun mrasidayang rauh tur majujuk ring arepan Perhyangan Agunge, genah nyungsung Palungguh IRatu puniki. Ipun mrasidayang ngastawa ring Palungguh IRatu sajeroning kamewehan ipune, tur Palungguh IRatu jaga mireng pinunas ipune, tur ngluputang ipun.

10Sane mangkin bangsa Amon, Moab miwah Edome sampun rauh ngebug titiang. Duk leluur titiange rarud saking tanah Mesir, Palungguh IRatu nenten nglugrain ipun ngranjing ka jagate punika, punika awinannya leluur titiange mamargi ngilehin jagate punika tur nenten nyirnayang ipun.

11Sane mangkin kadi asapuniki pangwales ipune ring titiang. Ipun pada rauh jaga ngulah titiang saking jagat paican Palungguh IRatu ring titiang.

12Palungguh IRatu dados Widin titiange. Sisipangja ipun, santukan titiang nenten maderbe pangajap-ajap sajeroning ngarepin wadua bala sane kalintang akeh punika, sane jaga ngebug titiang. Titiang nenten uning, punapi sane patut laksanayang titiang, sakewanten titiang wantah nulengek ring ayun Palungguh IRatu nunas pitulungan.”

13Sawatek jadmane ring Yehuda kasarengin antuk pianak miwah somahipune sami pada majujuk irika ring Perhyangan Agunge.

14Roh Ida Sang Hyang Widi Wasa tumuli ngencegin satunggiling wong Lewi sane wenten ring pantaran anake punika. Wong Lewine punika mapesengan Yahasiel, okan Dane Sakaria. Dane maug palingsehan Dane Asap. Dane punika katurunan Dane Asap, Matanya, Yeiel miwah Benaya.

15Dane Yahasiel matur sapuniki: “Duh ratu sang prabu, miwah parasemeton wong Yehuda miwah wong Yerusalem makasami. Ida Sang Hyang Widi Wasa masabda, mangda palungguh iratu miwah semeton sareng sami sampunang putus asa wiadin ajerih ngarepin wadua balane sane akeh puniki, santukan sane jaga mayuda punika boya semeton, nanging Ida Sang Hyang Widi Wasa.

16Gebugja ipun benjang semengan, rikala ipun rauh ring margine sane ngamunggahang ring Sis. Semeton jaga matemu ring ipun ring tanggun lebake sane ngungsi ka tegal melakang Yeruele.

17Semeton nenten jaga matempuh yuda ring yudane punika. Semeton wantah patut sayaga ring genah semetone tur nyantosang. Semeton jaga ngaksi Ida Sang Hyang Widi Wasa mapaica kamenangan ring semeton. Semeton wong Yehuda miwah wong Yerusalem, sampunangja semeton bimbang wiadin ajerih. Medalja ka payudan, janten Ida Sang Hyang Widi Wasa jaga ngiangin semeton.”

18Sasampune punika Ida Sang Prabu Yosapat tumuli sumungkem, ngantos prarain idane nganteg tanah, kadi asapunika taler rakyate sami pada sumungkem ngiring ida tur nyumbah Ida Sang Hyang Widi Wasa.

19Irika wong Israel saking palingsehan Dane Kehat miwah Dane Korah sami pada ngadeg saha nyuarayang kidung puji-pujian saha jangih, muji Ida Sang Hyang Widi Wasa, Widin Israele.

20Benjangne pasemengan pisan rakyate raris medal ka tegal melakang Tekoane. Rikala ipun jaga ngawitin mamargi, Ida Sang Prabu Yosapat mapidarta ring ipun, kadi asapuniki: “Ih wong Yehuda muah wong Yerusalem! Pagehangja kapracayan nyamane teken Ida Sang Hyang Widi Wasa, Widin nyamane, sinah nyama lakar kukuh bakuh. Pracayaja teken pangandikan nabin Idane teken nyama, sinah nyama lakar sida karya.”

21Sasampune ida matetimbangan ring rakyate, sang prabu raris ngandikayang, makudang-kudang juru kidunge mangda ngrangsuk panganggennyane, sane biasa anggen ipun rikala ngamargiang upacara sane suci, tur ipun kapangandikayang mamargi ring arepan bala waduane, sarwi makidung sapuniki: “Pujija Ida Sang Hyang Widi Wasa. Sih pasuecan Idane langgeng salami-laminipun!”

22Rikala ipun ngawitin makidung, Ida Sang Hyang Widi Wasa raris nedunang kabingungan ring wadua bala sane rauh magegebug punika.

23Wong Amon miwah wong Moabe tumuli ngebug wadua balan wong Edome, kantos ipun basmi kerta. Sasampune punika wong Amon miwah wong Moabe punika mayuda saling gebug, tur yudane punika rames pisan.

24Rikala wadua bala Yehudane rauh ring genah paninjoane sane wenten ring tegal melakange punika, ipun raris ninjo genah mesehe, tur panggihin ipun mesehe punika sami padem pajlempang ring tanahe. Adiriko nenten wenten sane luput.

25Ida Sang Prabu Yosapat kairing antuk pasukan idane raris mamargi nganampekin genah mesehe punika buat majejarah, tur ipun polih jejarahan akeh pisan, luire: banteng, bebekelan, pangangge miwah barang-barang maji sane lianan. Tigang rahina suennya ipun munduhang jejarahan, nanging jejarahane punika kalintang akeh, kantos ipun nenten mrasidayang ngambil makasami.

26Ring rahina sane kaping pat, ipun raris mapunduh ring Lebak Pujian, tur irika ipun muji Ida Sang Hyang Widi Wasa, malantaran sakancan paindikan sane sampun kardi Ida punika. Punika awinanipun lebake punika kawastanin: Lebak Pujian.

27Ida Sang Prabu Yosapat raris nuntun wadua balan idane mawali ka Yerusalem sajeroning jayengrana, santukan Ida Sang Hyang Widi Wasa sampun ngaonang meseh-meseh idane.

28Rikala ida rauh ring kota, ida mamargi ngungsi ka Perhyangan Agung saha kadulurin antuk suaran tetabuhan kecapi miwah trompet.

29Sakancan bangsa sane miragi indik Ida Sang Hyang Widi Wasa sampun ngaonang meseh-meseh wong Israele, ipun sami pada karesresan.

30Punika awinannya Ida Sang Prabu Yosapat mrentah sajeroning kerta raharja, tur Ida Sang Hyang Widi Wasa mapaica sutrepti ring ida, miwah ring sawewidangan jagat idane.

31Ida Sang Prabu Yosapat madeg ratu ring Yehuda, ritatkala ida mayusa pasasur taun, ida mrentah ring Yerusalem slae taun suenipun. Biang idane mapesengan Asuba, okan Dane Silhi.

32Pateh sakadi ajin idane Sang Prabu Asa sane riinan ring ida, ida nglaksanayang paindikan sane patut ring ayun Ida Sang Hyang Widi Wasa.

33Nanging genah-genahe nyungsung soroh dewa-dewane nenten sirnayang ida. Rakyate kantun nenten saking saguluking manah nyungsung Widin leluurnyane.

34Sapanglanturipun, sakancan pamargin Ida Sang Prabu Yosapat, saking pangawit ngantos ka pamuput pamrentahan idane, makasami sinurat ring Cakepan Babad Dane Yehu, Okan Dane Hanani, sane dados bagian saking Cakepan Babad Pararatun Israele.

35Sedek rahina anu, Ida Sang Prabu Yosapat ratune ring Yehuda makanti sraya sareng ring Ida Sang Prabu Ahasia saking Israel, sane akeh pisan nglaksanayang paindikan sane jaat.

36Ring pelabuhan Esion-Geber, sang kalih makarya kapal-kapal sane jaga malayar ring samudrane.

37Nanging Dane Elieser okan Dane Dodawa, sane saking kota Maresa, ngaturang pawungu ring Ida Sang Prabu Yosapat, kadi asapuniki: “Santukan palungguh iratu sampun makanti sraya ring Sang Prabu Ahasia, Ida Sang Hyang Widi Wasa jaga nyirnayang indik sane sampun karyanin palungguh iratu.” Irika kapal-kapale punika raris bencah, tur nenten naenin malayar.

← Chapter 19 Chapter 21 →