1 Samuel 16

balinese

1Ida Sang Hyang Widi Wasa raris masabda ring Dane Samuel, kadi asapuniki: “Buin amun apake makelonne kita lakar sedih mangenang unduk Saule? Tusingke ia suba tulak Ulun buat dadi ratun bangsa Israele? Ane jani isininja tanduk wadah lengis kitane aji lengis saitun tur kemaja kita luas ka Betlehem matemu teken anak ane madan Isai, wireh uli di pantaran pianak-pianakne Ulun suba nyelik adiri ane lakar adegang Ulun dadi prabu.”

2Nanging Dane Samuel matur sapuniki: “Sapunapiang titiang mamargi mrika? Yening Ida Sang Prabu Saul mireng indike puniki, sampun janten ida jaga ngamademang titiang.” Ida Sang Hyang Widi Wasa tumuli masabda: “Abaang iban kitane godel aukud, tur orahang mungguing kita lakar ngaturang aturan teken Ida Sang Hyang Widi Wasa.

3Suba keto, undang Isai apanga ia teka sig tongose ngaturang aturane ento. Ditu Ulun lakar ngorahin kita, apa ane patut laksanayang kita. Kita patut ngamanggehang anak ane patujuhang Ulun teken kita dadi sang prabu.”

4Dane Samuel raris ngamargiang sakadi sane kasabdayang antuk Ida Sang Hyang Widi Wasa tur dane lunga ka Betlehem. Irika parapanglingsir kota Betleheme pada rauh mendakin dane maduluran jejeh ngetor sarwi matur sapuniki: “Punapike rauh gurune puniki makta orti sane ngliangin manah?”

5Dane Samuel tumuli masaur sapuniki: “Inggih tiang rauh mriki buat jaga ngaturang aturan ring Ida Sang Hyang Widi Wasa. Suciangja ragan semetone, tur ngiring sareng-sareng ring tiang ring upacara puniki.” Sasampune punika taler dane ngandikayang mangda Dane Isai miwah oka-okan danene sane lanang-lanang nyuciang raga, tur ngundang dane sareng sami, mangda rauh ring upacara punika.

6Rikala Dane Isai miwah oka-okan danene rauh, Dane Samuel ngaksi Dane Eliab, okan Dane Isai, dane tumuli mapikayun asapuniki: “Sinah anake ane majujuk di ayun Ida Sang Hyang Widi Wasa ene ane selik Ida.”

7Nanging Ida Sang Hyang Widi Wasa raris masabda ring Dane Samuel sapuniki: “Eda kita ngiwasin goba ane bagus muah pangadeg ane ganggas, sawireh Ulun tuara ngarsayang ia. Sawireh Ulun nlektekang anak tusing patuh buka imanusa. Imanusa ngiwasin pangenahne ane di sisi dogen, nanging Ulun ngaksi atin manusane.”

8Sasampune punika Dane Isai ngandikain okan danene sane mapesengan Abinadab tumuli kapangandikayang tangkil. Nanging Dane Samuel mabaos sapuniki: “Icening puniki nenten kaselik antuk Ida Sang Hyang Widi Wasa.”

9Sasampune punika Dane Isai ngajak Dane Sama. Nanging Dane Samuel mabaos: “Icening puniki taler nenten kaselik antuk Ida Sang Hyang Widi Wasa.”

10Kadi asapunika Dane Isai ngedengang okan danene makapepitu nglintang ring ajeng Dane Samuel, nanging Dane Samuel mabaos sapuniki: “Ring pantarannyane nenten wenten sane kaselik antuk Ida Sang Hyang Widi Wasa.”

11Dane Samuel raris mataken ring Dane Isai sapuniki: “Punapike puniki kewanten okan semetone?” Dane Isai raris masaur sapuniki: “Kantun malih adiri sane pinih alit, nanging sane mangkin ipun sedekan ngangonang biri-biri ring tegale.” Dane Samuel mabaos malih: “Indayang nikain mangda ipun rauh mriki, santukan iraga nenten jaga ngaturang aturane sadurung ipun rauh.”

12Dane Isai ngutus anak ngaturin okan danene sane pinih alit punika. Okan danene punika bagus tur siteng, tur swabawannyane macaya. Ida Sang Hyang Widi Wasa raris masabda ring Dane Samuel sapuniki: “Manggehangja ia tur sriokinja ia baan lengis, sawireh ia ane selik Ulun.”

13Dane Samuel tumuli ngambil minyak saitun punika, tur kasriokang ring duur Dane Daude, ring ajeng parasemeton danene. Ngawitin saking dauh punika sapangraris ipun Roh Ida Sang Hyang Widi Wasa ngencegin tur nguasain Dane Daud. Sasampune punika Dane Samuel raris mawali ka Rama.

14Roh Ida Sang Hyang Widi Wasa sampun nilar Ida Sang Prabu Saul. Ida nedunang roh jaat buat nyangsaren ida.

15Paraparekan Ida Sang Prabu Saul raris matur ring ida sapuniki: “Inggih ratu, sauning titiang mungguing roh jaat saking Ida Sang Hyang Widi Wasa ngrangsukin tur nyangsaren iratu.

16Duaning punika, yen palungguh iratu ledang, titiang jaga ngrereh anak sane uning nyuarayang rebab. Kenginan yening roh jaate punika ngrangsukin iratu, anake punika jaga nyuarayang rebabipune, tur palungguh iratu jaga rumasa kenak.”

17Ida Sang Prabu Saul raris ngandika ring parekan idane sapuniki: “Nah kema alih anake ane dueg ngamunyiang rebab, laut ajak ia mai.”

18Salah tunggil parekan idane tumuli matur asapuniki: “Titiang sampun manggihin anak sane uning nyuarayang rebab, inggih punika okan Dane Isai, anak saking Betlehem punika. Okan danene punika anak sane prawira tur bagus, prajurit sane sura dira, miwah pascad mabaos. Samaliha dane punika anak sane kahyangin antuk Ida Sang Hyang Widi Wasa.”

19Ida Sang Prabu Saul raris ngutus utusan ngrauhin Dane Isai kadulurin pangandika asapuniki: “Ida sang prabu ngarsayang okan ragane Daud sane ngangonang biri-biri punika.”

20Dane Isai raris ngaturang Dane Daud ring Ida Sang Prabu Saul kadulurin antuk panak kambing asiki, keledae sane kapondongin roti miwah anggur aklukuh.

21Dane Daud raris tangkil ring Ida Sang Prabu Saul tur raris mamarekan irika. Ida Sang Prabu Saul kalintang seneng ring Dane Daud, tur dane kadadosang juru bakta sanjatan idane.

22Duaning punika Ida Sang Prabu Saul raris ngutus parekan ngrauhin Dane Isai maduluran pangandika asapuniki: “Depang suba Daud dadi parekan gelahe, sawireh gelahe sayang tekening ia.”

23Ngawit saking dauh punika, nyabran roh jaat sane saking Ida Sang Hyang Widi Wasa punika ngrangsukin Ida Sang Prabu Saul, digelis Dane Daud ngambil tur nyuarayang rebab, sane ngawinang roh jaate punika nilar Ida Sang Prabu Saul, tur ida raris rumasa kenak.

← Chapter 15 Chapter 17 →