1 Samuel 11

balinese

1Sawatara maletan asasih, Ida Sang Prabu Nahas ratun wong Amone mimpin wadua balan idane jaga ngaonang kota Yabes sane wenten ring wewidangan Gilead, tur ngurung kotane punika. Wong Yabes raris matur ring Ida Sang Prabu Nahas kadi asapuniki: “Ngiringja ngwentenang prajanjian tur titiang jaga ngaula ring palungguh iratu.”

2Nanging Ida Sang Prabu Nahas ratun wong Amone punika raris ngandika ring wong Yabese kadi asapuniki: “Tiang nyak ngae prajanjian teken jerone, sakewala sawatek paningalan jerone ane kenawan lakar luntik tiang, apanga makejang wong Israele nandang kimud.”

3Parapanglingsir wong Yabese raris matur malih kadi asapuniki: “Icenja titiang masangke pitung rahina suenipun, mangdane titiang nyidayang ngutus anak maranin wong Israele sami. Yening nenten wenten sane jaga nulungin titiang, inggih titiang jaga ngaturang dewek ring palungguh iratu.”

4Rikala utusan-utusane punika rauh ring Gibea genah Ida Sang Prabu Saule tur nguningayang indike punika, makasami anake pada nangis pagerong.

5Daweg punika Ida Sang Prabu Saul wau pisan rauh saking tegale ngatehang banteng idane. Ida raris mataken: “To ngudiang anake ento pada ngeling?” Anake sane wenten irika raris nguningayang ring ida atur utusane sane saking Yabes punika.

6Rikala Ida Sang Prabu Saul mireng indike punika, Roh Ida Sang Hyang Widi Wasa nedunin ida, mawinan ida raris merang pisan ring kayun.

7Ida raris ngambil banteng aakit, tumuli tampah tur pukang-pukang ida. Pukang-pukangane punika raris kabakta antuk utusan-utusane ka wewidangan wong Israele makasami kadulurin piteket asapuniki: “Sapasiraja sane nenten nyarengin Ida Sang Prabu Saul miwah Dane Samuel mayuda, bantengnyane jaga kapukang-pukang kadi asapuniki.” Ida Sang Hyang Widi Wasa ngawinang bangsane punika ajerih, mawinan makasami ketog semprong medal ka payudan.

8Ida Sang Prabu Saul munduhang prajurite ring Besek. Ketang wilanganipun wenten tigang atus tali diri wong Israel miwah tigang dasa tali wong Yehuda.

9Wong Israele mabesen ring utusane sane saking Yabes punika sapuniki: “Uningayang ring parasemetone sami mungguing benjang sadurung kalitepet, parasemeton pacang kabebasang.” Rikala wong Yabese sampun nampi pabesene punika, ipun sami kalintang liang,

10tur matur ring Ida Sang Prabu Nahas sapuniki: “Sane benjang titiang jaga medal ngaturang dewek ring iratu, rarisang iratu ngamargiang sapakayunan iratune.”

11Benjang semengannyane Ida Sang Prabu Saul ngepah prajurit idane dados tigang pasukan. Palimunan pisan prajurit Israele sampun mangseh ngungsi pakemahan mesehnyane tur ngebug wong Amone. Sadurung bajeg surya ipun sampun ngaonang mesehipune. Sane mrasidayang luput, malaib pablesat nyingidang deweknyane suang-suang.

12Sasampune punika bangsa Israel matur ring Dane Samuel kadi asapuniki: “Ring dijake jadmane sane mabaos mungguing Ida Sang Prabu Saul nenten patut dados prabu? Serahangja anake punika ring tiang, jaga pademang tiang.”

13Nanging Ida Sang Prabu Saul ngandika sapuniki: “Tusing dadi ada anak ane kamatiang di dinane jani, sawireh di dinane ene Ida Sang Hyang Widi Wasa suba ngrahayuang bangsa Israele.”

14Kadi asapunika taler Dane Samuel raris mabaos asapuniki: “Jalan iraga ka Gilgal tur jalan jumunin nyarwakang Ida Sang Prabu Saul madeg prabu.”

15Bangsane punika raris mamargi ka Gilgal tur ring genahe sane suci punika Ida Sang Prabu Saul kajarwakang dados prabu. Irika taler bangsane punika raris ngaturang aturan pasawitran, tur Ida Saul miwah bangsa Israel sami pada masuka rena ngluihang kamenangane punika.

← Chapter 10 Chapter 12 →