1 Kings 2 — balinese

1Rikala Ida Sang Prabu Daud sampun makire seda, ida ngandikain putran idane Sang Prabu Salomo, tur kicen bisama sane ka pamuput, sapuniki:

2“Panemayan ajine mati suba paek. Entegang tur kukuhangja keneh ceninge,

3tur laksanayangja sapatitah Ida Sang Hyang Widi Wasa, Widin ceninge. Tinutinja sakancan pidabdab muah titah Idane, buka ane sinurat di cakepan pidabdab Dane Musa, apanga cening sida labda karya sajeroning gegaen ceninge makejang muah saparilampah ceninge.

4Yening cening satinut teken Ida, Ida Sang Hyang Widi Wasa lakar ngamanggehang prajanjian ane suba kardi Ida, dugase Ida ngandikain aji, mungguing katurunan ajine lakar mrentah bangsa Israel, sanun iane teleb satia tuu ninutin titah Idane, aji panelah bayu sabda idepnyane.

5Ene ada buin abesik. Cening inget unduk laksanan I Yoabe marep teken aji, malantaran ia ngamatiang senapatin wadua balan Israele dadua nah ento Abner pianak Nere muah Amasa pianak Yetere. Ia ngamatiang senapatine makadadua ento dikalan masan damene, buat ngwales danda pati ane kalaksanayang baan senapatine ento dikalane masan perang. Ia ngamatiang anak ane tan padosa, tur ane jani aji ane negenang laksanan iane ento, tur aji ane ngemasin palannyane.

6Cening nawang apa ane patut laksanayang cening. Cening patut ngrencanayang apanga ia mati salah pati.

7Nanging padalemja pianak-pianak Barsilaine ane uli Gilead tur piaraja ia, sawireh ia suba madalem aji, dugase aji jerih malaib uli arepan belin ceninge Absalom.

8Ingetang masih Simei, pianak Gerane ane uli kota Bahurim daerah Benyamin. Ia sanget pesan nemah aji dugas ajine malaib ka Mahanaim. Nanging dugas iane mapag aji di Tukad Yordane, aji suba masumpah teken ia sajeroning parab Ida Sang Hyang Widi Wasa, mungguing aji tusing lakar ngamatiang ia.

9Nanging cening eda pesan mebasang ia uli ukuman. Cening nawang apa ane patut laksanayang cening. Cening patut ngawenang apanga ia kena danda pati.”

10Ida Sang Prabu Daud raris seda tur kapendem ring Kota Daud.

11Ida jumeneng ratu ring Israel petang dasa warsa suenipun. Pitung warsa suennya ida mrentah ring Hebron, miwah tigang dasa tiga taun ring Yerusalem.

12Sang Prabu Salomo nylediinin ajin idane Sang Prabu Daud jumeneng nata, tur kakuasan kaprabon idane kukuh bakuh.

13Sasampune punika Ida Adonia, okan Dane Hagit, raris tangkil ring Dane Batseba, biang Ida Sang Prabu Salomone. Dane Batseba tumuli nakenin Ida Adonia sapuniki: “Apa tekan cening ene saking rahayu?” Ida Adonia raris matur sapuniki: “Inggih titiang rauh saking rahayu.”

14Sapanglanturipun, ida matur sapuniki: “Wenten paindikan akidik sane jaga tunasang titiang ring ibu.” Dane Batseba raris mataken: “Apa mirib ento?”

15Pasaur idane sapuniki: “Ibu uning mungguing titiang sane patut ipun jumeneng nata, tur sawatek rakyate ring Israel sami pada ngajap-ajap indike punika. Nanging pamuputipun nenten kadi asapunika, tur adin titiange sane madeg ratu, santukan punika mula pakarsan Ida Sang Hyang Widi Wasa.

16Sane mangkin wenten pinunas titiange ring ibu asiki, sampunangja tulaka.”

17Dane Batseba raris mataken: “Apa mirib ento?” Pasaur danene, sapuniki: “Titiang uning mungguing Ida Sang Prabu Salomo nenten jaga nulak pinunas ibune. Rarisang tunasang ring ida, mangda ida ledang maicayang Abisag, daane sane saking Sunem punika, buat dados kurenan titiange.”

18Pasaur danene, sapuniki: “Nah, ibu lakar nunasang cening teken ida sang prabu.”

19Irika Dane Batseba raris tangkil ring ida sang prabu, buat ngaturang pinunas Ida Adoniane. Sang prabu tumuli ngadeg, nyapa biang idane saha sumungkem ring ajeng danene. Wusan punika ida raris malinggih ring singasanan idane. Sajaba punika ida taler ngandikayang mangda kasediaang palinggihan lianan buat biang idane. Biang idane tumuli malinggih ring tengen ida sang prabu.

20Dane tumuli matur sapuniki: “Ada ane lakar idih meme abedik teken cening, edaja tulaka pangidih memene ene.” Ida raris mataken: “Napi arsayang ibu, sinah nenten jaga tulak titiang.”

21Pasaur danene sapuniki: “Palilayangja Abisag teken belin ceninge Adonia buat lakar anggona kurenan.”

22Sang prabu raris mataken, sapuniki: “Napi awinan ibu ngandikayang tiang malilayang Abisag ring ida. Becikan ibu ngandikayang titiang nyerahang singasanane puniki taler ring ida. Sujatinipun ida punika belin tiange, tur Pandita Abyatar miwah Yoab ngroangin ida.”

23Sasampune punika Sang Prabu Salomo raris masumpah sajeroning parab Ida Sang Hyang Widi Wasa, sapuniki: “Dumadak Ida Sang Hyang Widi Wasa ngamademang titiang, yening titiang nenten ngepet patin Adoniane, malantaran pangidihnyane punika.

24Ida Sang Hyang Widi Wasa sampun ngamanggehang titiang saha kukuh bakuh ring singasanan ajin titiange Sang Prabu Daud. Ida sampun ngamanggehang janjin Idane tur maicayang kaprabone puniki ring titiang miwah ring katurunan titiange. Titiang masumpah sajeroning parab Ida Sang Hyang Widi Wasa sane nyeneng, mungguing Adonia jaga padem ring rahinane mangkin!”

25Irika Sang Prabu Salomo mapaica prentah ring Dane Benaya. Dane raris medal tur nyedayang Ida Adonia.

26Sasampune punika Sang Prabu Salomo raris ngandika ring Pandita Abyatar, sapuniki: “Mrikaja sang pandita mantuk ka desa uedan druene ring Anatot. Sang pandita patut ipun kasedayang, nanging sane mangkin tiang nenten jaga nyedayang sang pandita, santukan sang pandita dados pangancang Peti Prajanjian Ida Sang Hyang Widi Wasa duk sang pandita ngiring ajin tiange Sang Prabu Daud, samaliha sang pandita sareng-sareng nandang sakancan kamewehan idane.”

27Sasampune punika Sang Prabu Salomo raris nyurudang linggih kapanditan Dane Abyatare, saking linggih dados pandita druen Ida Sang Hyang Widi Wasa. Malantaran punika ida negepang sabdan Ida Sang Hyang Widi Wasa sane sampun sabdayang Ida ring Silo, ngeniang indik Pandita Eli miwah katurunan danene.

28Dane Yoab mireng paindikane punika. (Dane sampun sruron ring Ida Adonia, nanging nenten sruron ring Ida Absalom.) Duaning punika dane malaib ngranjing ka Kemah Linggih Ida Sang Hyang Widi Wasa, tumuli mlekuk bucun pamorboran aturane.

29Rikala ortine punika kapireng antuk Ida Sang Prabu Salomo, mungguing Dane Yoab sampun malaib ngranjing ring Kemah Linggih Ida Sang Hyang Widi Wasa, tur wenten ring pamorboran aturane, ida sang prabu tumuli ngutus anak nakenin dane napi awinannya dane malaib ka pamorboran aturane punika. Dane Yoab masaur mungguing sane dados awinan dane malaib ka ayun Ida Sang Hyang Widi Wasa, santukan dane ajerih ring Ida Sang Prabu Salomo. Duaning punika, Ida Sang Prabu Salomo tumuli ngutus Dane Benaya buat nyedayang Dane Yoab.

30Dane mamargi ka Kemah Linggih Ida Sang Hyang Widi Wasa, tur mabaos ring Dane Yoab sapuniki: “Ida sang prabu ngandikayang mangda semeton medal saking iriki.” Pasaur Dane Yoabe sapuniki: “Tiang nenten sairing. Tiang mamanah padem iriki.” Dane Benaya raris mawali tangkil ring ida sang prabu nguningayang baos Dane Yoabe punika.

31Ida Sang Prabu Salomo raris ngandika, sapuniki: “Jalanangja buka raos Yoabe ento. Matiangja ia tur lautang tanem. Sasubane keto tiang muah katurunan Ida Sang Prabu Daude ane lenan tusing enu buin negen kapelihan Yoabe, dugase ia ngamatiang anak ane tan padosa.

32Ida Sang Hyang Widi Wasa lakar nyisipang I Yoab, baane ia ngamatiang anake ento, ane laksanayanga tur tusing kuningin baan ajin tiange Sang Prabu Daud. I Yoab ngamatiang anak ane tan padosa duang diri, anak ane melahan teken ia, nah ento: Abner, senapatin wadua balan Israele muah Amasa, senapatin wadua balan Yehudane.

33Pasisip unduk matin anake dadua ento, lakar nibenin I Yoab muah katurunannyane kantos salawas-lawasne. Nanging Ida Sang Hyang Widi Wasa lakar setata mapaica labda karya teken katurunan Ida Sang Prabu Daud ane malinggih di singasana kaprabon idane.”

34Irika Dane Benaya raris ngranjing ka Kemah Linggih Ida Sang Hyang Widi Wasa, tumuli nyedayang Dane Yoab, tur layon danene kapendem ring jeroan danene, ring tanah pategalane.

35Ida sang prabu tumuli ngamanggehang Dane Benaya dados senapati ngentosin Dane Yoab, miwah ngamanggehang Pandita Sadok ngentosin Pandita Abyatar.

36Sasampune punika sang prabu raris ngutus anak ngrauhin Dane Simei, saha ngrauhang pangandikan idane ring dane, sapuniki: “Jujukangja umah bapane dini di Yerusalem, laut tongosin, tur eda pesan magedi uli di kota.

37Yen bapa taen kanti magedi ngliwatin Tukad Kidrone, sinah bapa lakar mati, tur bapa padidi ane lakar pelih.”

38Pasaur Dane Simei, sapuniki: “Inggih titiang sairing, ratu sang prabu! Titiang jaga nglaksanayang sapatitah palungguh iratu.” Duaning punika dane raris magenah ring Yerusalem sue pisan.

39Sasampune maletan tigang taun, yan asapunapi jua, wenten parekan Dane Simei kekalih malaib ka ajeng Sang Prabu Akis okan Ida Maaka, sane jumeneng ratu ring Gat. Rikala Dane Simei mireng mungguing parekan danene punika wenten ring Gat,

40dane raris nglinggihin keledaen danene, tumuli tangkil ring Sang Prabu Akis ring Gat buat ngrereh parekan danene. Parekan danene punika keniang dane, tur kajak budal.

41Rikala Sang Prabu Salomo mireng pamargin Dane Simei punika,

42ida raris ngesengin Dane Simei, saha ngandika kadi asapuniki: “Tiang suba majanji teken bapa sajeroning parab Ida Sang Hyang Widi Wasa, apang tusing pesu uli kota Yerusalem. Tur tiang suba matinget bapa, yening bapa mamurug, sinah bapa lakar mati. Tusingke bapa suba saadung teken unduke ento, tur bapa ngorahang mungguing bapa lakar satinut teken tiang?

43Ane jani apa krana bapa mamurug janjin bapane, tur tusing satinut teken titah tiange?

44Bapa suba nawang sakancan kapelihan ane suba laksanayang bapa marep teken ajin tiange Sang Prabu Daud. Ida Sang Hyang Widi Wasa lakar ngukum bapa malantaran kapelihane ento.

45Nanging Ida lakar ngamertanin tiang, tur Ida lakar ngawinang kaprabon Ida Sang Prabu Daud kukuh bakuh salawas-lawasne.”

46Sasampune punika ida sang prabu raris mapaica prentah ring Dane Benaya. Dane raris medal tur nyedayang Dane Simei. Sane mangkin Ida Sang Prabu Salomo raris kukuh bakuh anyakra werti.