1 Kings 14

balinese

1Duk punika putran Ida Sang Prabu Yerobeam, sane mapesengan Abia sungkan.

2Ida Sang Prabu Yerobeam tumuli ngandika ring rabin idane, sapuniki: “Kemaja adi ka Silo, ka tongos Nabi Ahiane, ane ipidan ngandika teken beli mungguing beli lakar dadi ratun wong Israel. Nanging samarang iban adine apang eda ada anak nawang.

3Aturin dane roti dasa bungkul muah jaja abedik makamuah madu abotol. Tunusang teken dane, kenken panadin pianak iragane, sinah dane lakar ngandikain adi.”

4Irika rabin idane raris lunga ka jeron Dane Ahia ring Silo. Dane Ahia sampun lingsir pisan, tur dane sampun buta.

5Ida Sang Hyang Widi Wasa sampun ngandika ring dane mungguing rabin Ida Sang Prabu Yerobeam jaga nunasang ring dane indik putran idane, sane sedekan sungkan. Ida Sang Hyang Widi Wasa sampun mawisik ring dane, napi sane patut nikayang dane. Rikala rabin Ida Sang Prabu Yerobeam rauh irika, dane mapi-mapi sakadi anak lianan.

6Nanging rikala Dane Ahia mireng klesegan danene ring jelanane, Dane Ahia tumuli ngandika, sapuniki: “Rarisangja ngranjing. Titiang uning mungguing iratu puniki rabin Ida Sang Prabu Yerobeam. Punapi awinannya iratu mapi-mapi sakadi anak lian? Titiang ngaturang gatra sane nenten becik pabuat iratu.

7Mrikaja rarisang mantuk, tur aturang ring Ida Sang Prabu Yerobeam, indik sane kasabdayang antuk Ida Sang Hyang Widi Wasa, Widin Israele ring ida, sapuniki: ‘Ulun nyelik kita uli pantaran rakyate, tur ngadegang kita dadi pamrentah kaulan Ulune Israel.

8Ulun mancut kaprabone ento uli sig katurunan Daude, laut paicayang Ulun teken kita. Nanging kita suba tuara buka parekan Ulune Daud, ane astiti bakti pesan teken Ulun, ninutin sapatitah Ulun muah nglaksanayang tuah paundukan ane ledangin Ulun dogen.

9Kita suba ngae dosa ane gedenan teken dosan anake ane mrentah malunan teken kita. Kita suba nulak Ulun muah mangunang pidukan Ulune, malantaran kita ngae arca muah togog malakar logam, ane sungsung kita.

10Uli krana unduke ento Ulun lakar nibakang bencana teken kulawargan kitane, tur lakar ngamatiang sakancan katurunan kitane ane muani-muani, cerik kelih. Ulun lakar nyirnayang kulawargan kitane. Ia lakar kasampatang tur kentungang buka taine.

11Asing-asing kulawargan kitane ane mati di kota, bangkenne lakar amah cicing, muah asing-asing ane mati di tegale, bangkenne lakar amah kedis guak. Ulun Sang Hyang Widi Wasa ane suba masabda buka keto.’ ”

12Nabi Ahia nglanturang pangandikan danene ring rabin Sang Prabu Yerobeame, sapuniki: “Sane mangkin rarisangja iratu mantuk. Sapangrauh iratune ring kota, putra druene jaga seda.

13Sawatek wong Israele jaga mangelingin tur mendem ida. Wantah ida kewanten, saking pantaran kulawargan Ida Sang Prabu Yerobeam, sane pacang kapendem sakadi patutipun, santukan wantah ida kewanten sane kaledangin antuk Ida Sang Hyang Widi Wasa, Widin Israele.

14Ida Sang Hyang Widi Wasa jaga ngadegang sang prabu sane jaga mrentah wong Israele, sane jaga mancut tur muputang kulawargan Sang Prabu Yerobeame.

15Ida Sang Hyang Widi Wasa jaga nyisipang wong Israele, tur Ida ngosok ipun sakadi glagahe ring tukade. Ida jaga mancut wong Israele saking tanahe sane becik puniki, sane sampun kapaicayang ring leluuripune, tur jaga nyambehang ipun kantos nglintangin Tukad Eprate, santukan ipun sampun ngawinang Ida duka, malantaran ipun makarya arca Dewi Aserane.

16Ida Sang Hyang Widi Wasa jaga ngutang wong Israele santukan Ida Sang Prabu Yerobeam sampun ngardi dosa tur nuntun bangsa Israele ngardi dosa.”

17Rabin Ida Sang Prabu Yerobeam tumuli mawali ka kota Tirsa. Riwau ida ngranjing ka puri, putran idane raris seda.

18Wong Israele sami pada mangelingin tur mendem ida, sakadi sane sampun kasabdayang antuk Ida Sang Hyang Widi Wasa, malantaran parekan Idane, Nabi Ahia.

19Sapanglanturipun, sakancan paindikan sane kalaksanayang antuk Ida Sang Prabu Yerobeam, minakadinipun indik idane mrentah, makasami kasuratang ring Cakepan Babad Pararatun Israele.

20Ida Sang Prabu Yerobeam jumeneng prabu kalih likur taun suenipun. Ida seda tur kapendem. Putran idane, Ida Nadab tumuli ngentosin ida jumeneng nata.

21Putran Ida Sang Prabu Salomo, Ida Sang Prabu Rehabeam sampun mayusa petang dasa siki taun, daweg idane jumeneng nata ring Yehuda. Pitulas taun suennya ida mrentah ring Yerusalem, inggih punika kota sane sampun kaselik antuk Ida Sang Hyang Widi Wasa, saking wewidangan wong Israele, buat dados genah panyungsungan Idane. Biang Ida Sang Prabu Rehabeam mapesengan Naama saking Amon.

22Wong Yehudane ngardi dosa pamantuka ring Ida Sang Hyang Widi Wasa, tur dosanipune punika agengan ring dosan leluuripune, sane ngawinang Ida Sang Hyang Widi Wasa duka ring ipun.

23Ipun pada makarya genah-genah panyungsungan buat widi-widi sane palsu. Ipun makarya tugu batu miwah palawatan Dewi Asera sane kasungsung ring duur bukite miwah ring sor tarune ageng.

24Paindikan sane pinih kaon, inggih punika wentenipun anak lanang miwah istri sane ngaturang dewek dados penayang ring genah-genah panyungsungane punika. Wong Yehudane pada nglaksanayang sakancan paindikan sane ngawinang kimud, inggih punika paindikan sane biasa kalaksanayang antuk jadma sane sampun kakaonang saking jagate punika antuk Ida Sang Hyang Widi Wasa, rikala bangsa Israele ngaug jagate punika.

25Ring taun sane kaping lima, sapanyeneng Ida Sang Prabu Rehabeam, Ida Sang Prabu Sisak saking Mesir, rauh ngebug kota Yerusaleme.

26Ida ngrampas sakancan arta branane sane wenten ring Perhyangan Agung miwah sane ring puri, kadi asapunika taler tameng-tameng mas sane kakardi antuk Ida Sang Prabu Salomo.

27Makadados silurnyane, Sang Prabu Rehabeam raris makarya tameng-tameng temaga, sane kapisarayang ring paraprakanggene sane nyaga gapuran purine.

28Nyabran Ida Sang Prabu lunga ka Perhyangan Agung, parapajagane punika makta tameng-tamenge punika, tur sasampune punika raris malih kagenahang ring bale pajagaane.

29Sapanglanturipun, sakancan paindikan sane kalaksanayang antuk Ida Sang Prabu Rehabeam, makasami kasuratang ring Cakepan Babad Pararatun Yehudane.

30Sapanyeneng idane, Sang Prabu Rehabeam tan mari mayuda nglawan Ida Sang Prabu Yerobeam.

31Ida Sang Prabu Rehabeam raris seda, tur kapendem ring pamendeman pararatune ring Kota Daud, tur putran idane Ida Abia raris ngentosin ida jumeneng nata.

← Chapter 13 Chapter 15 →