1 Kings 11 — balinese

1Ida Sang Prabu Salomo akeh pisan nresnain anak istri wong sunantara. Sajawining okan ratune ring Mesir, ida taler ngambil rabi wong Moab, Amon, Edom, Sidon miwah Het.

2Ida ngambil pararabine punika, yadiastun Ida Sang Hyang Widi Wasa sampun masabda ring wong Israel, mangda ipun sampunang saling juang kajuang ngajak bangsa-bangsane punika, duaning jaga ngawinang bangsa Israele kuduan manahnya nyungsung widi-widi sane lianan.

3Ida Sang Prabu Salomo madue rabi prami pitung atus akehipun, miwah selir tigang atus diri. Pararabine punika ngawinang ida nilar Ida Sang Hyang Widi Wasa.

4Santukan sasampune ida lingsir pararabine punika ngajak ida nyungsung widi sane lianan, kantos ida nenten kantun malih satia tuu ring Ida Sang Hyang Widi Wasa, Widin idane, sakadi ajin idane Sang Prabu Daud.

5Ida raris nyungsung Dewi Astoret, dewin wong Sidone, miwah Molok, dewan wong Amone sane ngawinang seneb.

6Ida madosa pamantuka ring Ida Sang Hyang Widi Wasa, tur nenten satia ring Ida sakadi ajin idane Sang Prabu Daud.

7Ring gununge dangin kota Yerusaleme, ida ngwangun panyungsungan buat Dewa Kamos, dewan wong Moabe sane cemer, miwah genah panyungsungan Dewa Molok, dewan wong Amone sane makasami ngawinang seneb.

8Ida makarya genah panyungsungan, buat genah rabin idane sane kawitnyane wong sunantara punika pada morbor kastanggi miwah ngaturang aturan ring dewannyane suang-suang.

9Yadiastun Ida Sang Hyang Widi Wasa, Widin Israele, sampun pingkalih mapakantenang raga ring Sang Prabu Salomo, tur sampun nitahang ida mangda sampunang nyungsung widin wong sunantara, nanging Ida Sang Prabu Salomo nenten sairing ring Ida Sang Hyang Widi Wasa, malahan ida ninggal Ida Sang Hyang Widi Wasa. Punika awinanipun Ida Sang Hyang Widi Wasa duka ring Ida Sang Prabu Salomo,

11sarwi masabda ring ida sapuniki: “Sawireh kita suba nguug prajanjian kitane ngajak Ulun, buina tempal teken titah-titah Ulune, Ulun majanji mungguing Ulun lakar mancut kaprabone ene uli sig kitane, tur lakar paicayang Ulun teken salah tunggal prakanggon kitane.

12Sakewala ulihan bapan kitane I Daud, Ulun tusing nyalanang unduke ene sanun kitane idup, nanging di masan pamrentahan pianak kitane lakar jalanang Ulun.

13Buina tusingja makejang kaprabone ene lakar bancut Ulun, nanging lakar sisaang Ulun suku bangsa abesik, uli krana parekan Ulune Daud muah uli krana kota Yerusaleme ane suba selik Ulun.”

14Sasampune punika Ida Sang Hyang Widi Wasa raris nyelik Ida Hadad, katurunan sang prabu ring Edom, mabalik nglawan Ida Sang Prabu Salomo.

15Sane nguni, ritatkala Sang Prabu Daud ngaonang jagat Edome, Dane Yoab, senapatin wadua balan idane, lunga ka Edom, buat nanem sawan jadmane sane padem-padem. Dane miwah prajurit danene malinggih ring Edom nem sasih suenipun. Tur sajeroning nem sasih punika sakancan anake lanang ring Edom, pademang dane.

17Nanging Ida Hadad miwah makudang-kudang wong Edom parekan ajin idane, polih malaib rarud ka Mesir. (Duk punika Ida Hadad kantun alit.)

18Ida Hadad miwah pangiring-pangiring idane kesah saking Midian, lunga ka Paran. Irika wenten makudang-kudang anak malih nyarengin ida. Sasampune punika ida raris mamargi ka Mesir, tur tangkil ring sang prabu ring Mesir. Ida Hadad raris kicen tanah, puri miwah pangan kinum sategepipun antuk sang prabu ring Mesir.

19Ida Hadad kasayangang pisan antuk sang prabu Mesire kantos ida kicen rabi, inggih punika ipen ida sang prabu, arin ida sang pramesuari Tahpenes.

20Rabin Ida Hadad raris ngembasang putra lanang adiri, kaparabin Genubat. Anake alit punika tumuli kajak ka puri antuk ida sang pramesuari tur kapatiningin irika sareng-sareng ring paraputran ida sang prabu.

21Ritatkala Ida Hadad mireng gatra ring Mesir, mungguing Sang Prabu Daud sampun seda, miwah Dane Yoab, senapatin wadua balan idane taler sampun seda, ida raris matur ring ida sang prabu ring Mesir, sapuniki: “Lugrainja titiang mawali ka panegaran titiange.”

22Sang prabu ring Mesir mataken sapuniki: “Ngudiang dadi keto? Apa adi kuangan? Ngudiang dadi adi nagih mulih?” Pasaur Ida Hadad, sapuniki: “Titiang nenten kakirangan punapa-punapi. Sakewanten lugrainja titiang mapamit budal.” Ida Hadad tumuli mamargi mantuk ka panegaran idane.

23Ida Sang Hyang Widi Wasa taler ngawinang Dane Reson, okan Dane Elyada mabalik nglawan Ida Sang Prabu Salomo. Dane Reson pecak malaib saking gustinnyane, Sang Prabu Hadadeser ratune ring Soba.

24Tur dane dados pamimpin grombolan pangaco. (Indike punika mamargi, sasampun Sang Prabu Daud ngaonang Sang Prabu Hadadeser, tur nyedayang kantin idane sane saking Siria.) Dane Reson miwah pangiring-pangiring danene tumuli lunga ka Damsik tur jenek malinggih irika. Irika dane kadegang dados sang prabun wong Siriane antuk pangiring-pangiring danene.

25Sapanyeneng Ida Sang Prabu Salomo, Dane Reson dados meseh wong Israel sane sering ngrauhang bencana, pateh sakadi Ida Hadad.

26Anak lianan sane mabalik nglawan Ida Sang Prabu Salomo, inggih punika salah tunggil prakanggen idane, sane mapesengan Yerobeam, okan Dane Nebat, suku Epraim saking Sereda. Biang danene sampun balu, mapesengan Serua.

27Kadi asapuniki katuturan pembrontakane punika. Ida Sang Prabu Salomo nuju ngwangun Milo, miwah ngamecikang tembok panyengker kotan Ida Sang Prabu Daud, ajin idane.

28Dane Yerobeam punika anak truna sane dueg makarya. Rikala Ida Sang Prabu Salomo nyingak dane anteng seleg makarya, ida raris ngamanggehang dane dados pangenter pangayah rodi ring wewidangan suku Manase miwah Epraim.

29Sedek rahina anu rikala Dane Yerobeam mamargi saking Yerusalem, ring margi dane raris karauhin antuk Nabi Ahia, sane saking Silo.

30Nabi Ahia raris ngembus jubah danene sane anyar, sane anggen dane tur nyetset jubahe punika kadadosang roras kesetan,

31kadulurin baos asapuniki ring Dane Yerobeam: “Juangja jubahe ene dasa kesetan, sawireh Ida Sang Hyang Widi Wasa, Widin Israele masabda teken cening kene: ‘Ulun lakar mancut kaprabone uli sig Salomone, tur lakar paicayang Ulun teken kita dasa suku bangsa.

32Salomo lakar ngisiang asuku bangsa dogen, uli krana parekan Ulune Daud, muah uli krana Yerusalem, kota ane suba selik Ulun uli sakuub tanah Israele, buat dadi druen Ulune.

33Ulun lakar nglaksanayang unduke ene, sawireh Salomo suba nulak Ulun, tur suba nyungsung dewa-dewa sunantara, luire Dewi Astoret, dewan wong Sidone, Kamos, dewan wong Moabe, muah Molok dewan wong Amone. Salomo suba tusing satinut teken Ulun. Ia suba malaksana pelih, tur suba tusing ngamanggehang pidabdab muah titah-titah Ulune, buka laksanan bapanne Daud.

34Nangingke Ulun tusing lakar mancut kaprabone ento makejang uli sig Salomone tur Ulun lakar nglugrain ia enu mrentah, sanun iane idup. Unduke ene laksanayang Ulun, uli krana parekan Ulune Daud, ane suba selik Ulun, ane satinut teken pidabdab muah sapatitah Ulune.

35Ulun lakar mancut kaprabone ento uli sig pianak Salomone, tur lakar paicayang Ulun teken kita dasa suku bangsa.

36Nanging Ulun lakar ngenuang asuku bangsa pabuat pianak Salomone, apanga Ulun setata ngelah katurunan parekan Ulune Daud buat mrentah di Yerusalem, kota ane suba selik Ulun dadi tongos panyungsungan Ulune.

37Kita Yerobeam, Ulun lakar nadiang kita ratun wong Israele, tur kita lakar mrentah sakancan wewidangan ane edotang kita.

38Yening kita saking sujati satinut teken Ulun, idup madasar pidabdab-pidabdab Ulune, muah tansah ngae ledang pakayun Ulune, malantaran nglaksanayang sapatitah Ulune, buka ane laksanayanga baan parekan Ulune Daud, Ulun lakar tansah ngiangin kita. Ulun lakar ngamanggehang kita dadi ratun Israele, tur ngamastiang mungguing katurunan kitane lakar mrentah sasuban kitane buka ane suba laksanayang Ulun marep teken Daud.

39Malantaran dosan Salomone, Ulun lakar nyisipang katurunan Daude, nanging tusing kanti sakayang-kayang.’ ”

40Duaning punika Ida Sang Prabu Salomo tumuli mapakayunan jaga nyedayang Dane Yerobeam, nanging dane malaib ka Mesir ngluputang raga ring ajeng Ida Sang Prabu Sisak. Irika dane jenek malinggih, kantos Ida Sang Prabu Salomo seda.

41Sapanglanturipun saluiring pakaryan Ida Sang Prabu Salomo miwah kawicaksanaan idane, makasami kasuratang ring Cakepan Babad Ida Sang Prabu Salomo.

42Ida jumeneng nata ring Yerusalem, ngwengku jagat Israele petang dasa taun suenipun.

43Ida raris seda tur kaperemang ring Kota Daud, tur putran idane sane mapesengan Ida Rehabeam ngentosin ida jumeneng nata.