1 Chronicles 26

balinese

1Puniki duman pakaryan wong Lewi sane dados pajagaan Perhyangan Agunge. Saking palingsehan Dane Korah, inggih punika: Dane Meselemia okan Dane Kore, saking kulawargan Dane Ebyasap.

2Dane madue oka lanang pepitu manut urutan yusannyane, inggih punika: Dane Sakaria, Dane Yediael, Dane Sebaja, Dane Yatniel,

3Dane Elam, Dane Yohanan miwah Dane Elyoenai.

4Taler Dane Obed sane kamertanin antuk Ida Sang Hyang Widi Wasa malantaran kicen oka kutus diri manut urutan yusannyane inggih punika: Dane Semaya, Dane Yosabad, Dane Yoah, Dane Sakar, Dane Netaneel,

5Dane Amiel, Dane Isakar miwah Dane Peuletai.

6Dane Semaya okan Dane Obed-Edom sane pinih duura, madue oka nemnem, inggih punika: Dane Otni, Dane Repael, Dane Obed, Dane Elsabad, Dane Elihu miwah Dane Semakia. Ring palingsehan danene, dane makasami dados pamucuk santukan dane sareng sami anak sane sura dira, minakadinipun pisan Dane Elihu miwah Dane Semakia.

8Kulawargan Dane Obed-Edom ngamedalang pajagaan nem dasa kalih diri, anak sane pascad ring pakaryane punika.

9Kulawargan Dane Meselemia ngamedalang anak sura dira plekutus diri akehipun.

10Dane Hosa saking palingsehan Dane Merari madue oka lanang-lanang patpat, inggih punika: Dane Simri, (ajin danene netepang dane dados pamimpin, yadiastun dane punika boyaja oka sane pinih duur),

11Dane Hilkia, Dane Tebalia miwah Dane Sakaria. Makasami wenten sareng telulas, anggota saking kulawargan Dane Hosa sane dados pajagaan Perhyangan Agunge.

12Parapajagaan Perhyangan Agunge punika kaepah dados klompok-klompok manut kulawargannyane tur dane polih giliran makarya ring Perhyangan Agung sakadi wong Lewi sane lianan.

13Asing-asing kulawarga, ageng wiadin alit patut kaundi buat mastiang gapura sane encen sane patut jaga dane.

14Dane Selemia polih tugas ring gapura sane bedangin. Dane Sakaria okan Dane Selemia, sane dados penasehat sane wicaksana, polih tugas ring gapura sane baler.

15Dane Obed-Edom polih tugas ring gapura sane bedelod, tur oka-okan danene polih tugas nyaga gudang prabot.

16Dane Supim miwah Dane Hosa, polih tugas ring gapura sane bedauh, miwah Gapura Saleket sane ring margine ngamunggahang. Parapajagaane patut kagilirang manut gilirannyane suang-suang.

17Bedangin, nyabran rahina wenten pajagaan sareng nemnem, baler sareng patpat miwah bedelod sareng patpat. Ring gudang prabote wenten pajagaan sane tetep petang diri, inggih punika sabilang gudang kalih diri.

18Nampek ring papiliune sane bedauh, wenten pajagaan sareng patpat sane majaga ring sisin margine ageng, tur kekalih ring papiliune punika.

19Punika makasami klompok pajagaan sane saking palingsehan Dane Korah miwah Dane Merari.

20Wong Lewi sane lianan kapisara ngenterang arta branan Perhyangan Agunge miwah gudang-gudang panyimpenan barang-barang sane katur ring Ida Sang Hyang Widi Wasa.

21Dane Ladan salah tunggal okan Dane Gerson, dados leluur makudang-kudang klompok kulawarga, minakadinipun kulawargan Dane Yehiel okan danene.

22Okan Dane Ladan sane tiosan inggih punika: Dane Setam miwah Dane Yoel polih tetegenan ngetangang arta brana miwah gudang-gudang Perhyangan Agunge.

23Tetegenane punika taler kapisara ring katurunan Dane Amram, Dane Yisar, Dane Hebron miwah Dane Usiel.

24Dane Sebuel, palingsehan Dane Gersom, okan Dane Musa dados kepalan prakangge sane ngetangang arta branan Perhyangan Agunge.

25Ulihan Dane Elieser semeton danene, dane kantun masemetonan ring Dane Selomit. Dane Elieser punika ajin Dane Rehabya, Dane Rehabya ajin Dane Yesaya ajin Dane Yoram, Dane Yoram ajin Dane Sikri, Dane Sikri ajin Dane Selomit.

26Dane Selomit miwah anggota kulawargan danene kapisara ngetangang barang-barang aturan ring Ida Sang Hyang Widi Wasa sane katurang antuk Ida Sang Prabu Daud, antuk kepala-kepala kulawargane, antuk pamimpin-pamimpin klompok palingsehane miwah antuk komandan-komandan wadua balane.

27Ida sane ngambil apahan saking barang jarahan sane keniang dane ring payudan, tur punika katurang buat kagunayang ring Perhyangan Agung.

28Dane Selomit miwah kulawargan danene kapisara ngetangang saluiring barang-barang sane sampun katurang buat kagunayang ring Perhyangan Agung. Minakadinipun aturan sane katurang antuk Nabi Samuel, antuk Sang Prabu Saul, antuk Dane Abner okan Dane Ner, miwah antuk Dane Yoab okan Dane Seruya.

29Saking katurunan Dane Yisar, Dane Kenanya miwah oka-okan danene kapisarayang dados prakangge miwah hakim buat wong Israele.

30Saking katurunan Dane Hebron, Dane Hasabya miwah pasemetonan danene sareng siu pitung atus diri, sane sami sura dira, kapisara ngenterang pamrentahan miwah nabdab pailehan agama ring Israel sane dauh Tukad Yordane.

31Dane Yeria dados pamimpin katurunan Dane Hebron. Ring taun sane kaping petang dasa sapanyeneng Ida Sang Prabu Daud, kawentenang panureksan ngeniang indik silsilah katurunan kulawargan Dane Hebron, tur kapanggih wenten prajurit-prajurit sane sura dira saking kulawargane puniki magenah ring Yaeser ring wewidangan Gilead.

32Ida Sang Prabu Daud nyelik kulawarga sane sura dira kalih tali pitung atus diri saking pasemetonan Dane Yeria tur kapisara ngenterang pamrentahan miwah nabdab paileh agama ring Israel, dangin Tukad Yordane, inggih punika ring wewidangan suku Ruben, Gad miwah Manase dangin tukad.

← Chapter 25 Chapter 27 →