1 Chronicles 17

balinese

1Sane mangkin Ida Sang Prabu Daud sampun jenek malinggih ring purin idane. Risedek rahina anu ida ngutus utusan nangkilin Nabi Natan kadulurin pangandika sapuniki: “Tiang magenah ring umahe sane malakar antuk taru aras, nanging Peti Prajanjian Ida Sang Hyang Widi Wasa kantun magenah ring kemahe.”

2Atur Dane Nabi Natan sapuniki: “Rarisang margiang napi sane mantuk ring kayun iratune santukan Ida Sang Hyang Widi Wasa ngiangin iratu.”

3Nanging ring wengi punika Ida Sang Hyang Widi Wasa ngandika ring Dane Natan sapuniki:

4“Kema orahin parekan Ulune Daud, kene pangandikan Ulune teken ia: ‘Tidongja kita ane patut ngwangun Perhyangan ane lakar dadi linggih Ulune.

5Ngawit uli Ulun ngrahayuang wong Israele uli Mesir kanti kayang jani, Ulun tonden taen malinggih di Perhyangane. Ulun setata malinggih di tengah kemahe tur makisid-kisid uli tongose abesik ka tongose ane lenan.

6Di sajeroning pangumbaran Ulune ngajak rakyat Israele, Ulun tusing taen matakon teken parapamimpin ane manggehang Ulun unduk apa krana ia tusing ngaenang Ulun Perhyangan ane malakar aji kayu aras.’

7Ento krana, kema orahang teken Daud, parekan Ulune, mungguing Ulun Sang Hyang Widi Wasa Ane Maha Kuasa ngandika teken ia kene: ‘Ulun suba nyemak kita uli sig tongose dadi pangangon kambing tur ngamanggehang kita dadi pamrentah bangsa Israel kaulan Ulune.

8Ulun suba ngiangin kita saparilampah kitane tur Ulun suba ngalahang musuh kitane makejang, dikalane kita maperang. Ulun lakar nadiang kita kabinawa buka pamimpin-pamimpine ane paling agunga di gumine.

9Ulun suba nyelik tongos buat bangsa Israel kaulan Ulune tur suba ngejang ia ditu. Ditu ia lakar nongos ditu tur tusing ada buin anak ane nindes ia. Ngawit uli ia ngaug tanahe ento, ia suba kagebug baan bangsane ane angkara murka, nanging unduke ento tusing ada buin. Ulun majanji ngalahang musuh-musuh kitane tur mapaica katurunan teken kita.

11Yening kita mati tur katanem bareng-bareng teken leluur kitane, Ulun lakar ngamanggehang salah tunggal pianak kitane buat madeg ratu, tur lakar ngukuhang kaprabonnyane.

12Ia ane lakar ngwangun Perhyangan buat Ulun, tur Ulun lakar ngamanggehang kaprabonnyane turun-temurun.

13Ulun lakar dadi ajinnyane tur ia lakar dadi putran Ulune. Ulun tusing lakar mancut pitulungan Ulune uli sig iane, buka uli sig Saule ane kutang Ulun, apanga kita prasida jumeneng ratu.

14Ulun lakar netepang ia dadi pamimpin kaula muah kaprabon Ulune salawas-lawasne. Kaprabonnyane lakar langgeng salawas-lawasne.’ ”

15Nabi Natan raris ngaturang ring Ida Sang Prabu Daud saluiring sane sampun kasabdayang antuk Ida Sang Hyang Widi Wasa ring dane.

16Sasampune punika Ida Sang Prabu Daud raris ngranjing ka Kemah Linggih Ida Sang Hyang Widi Wasa. Irika ida malinggih tur ngastawa sapuniki: “Duh Ratu Sang Hyang Widi Wasa, Widin titiange, titiang wiadin kulawargan titiange, sayuaktinipun nentenja pantes molih paindikan sakadi sane sampun kardi Palungguh IRatu ring titiang.

17Nanging sane mangkin Palungguh IRatu ngardi paindikan sane langkungan ring punika. Palungguh IRatu sampun ledang ngwentenang prajanjian ngeniang ring katurunan titiange, ring masa-masa sane jaga rauh. Samaliha sane mangkin Palungguh IRatu sampun ngaksi titiang waluya sakadi anak sane agung.

18Napi malih sane patut aturang titiang ring Palungguh IRatu! Palungguh IRatu sampun wikan ring sikian titiange, tur Palungguh IRatu nginggilang titiang, parekan Palungguh IRatu.

19Punika mula wantah pakayunan miwah pakarsan Palungguh IRatu buat nibakang paindikan punika ring titiang tur Palungguh IRatu ngedengang ring titiang indik kaluihan titiange benjang pungkur.

20Duh Ratu Sang Hyang Widi Wasa, nenten wenten sane nyamenin Palungguh IRatu. Titiang uning mungguing wantah Palungguh IRatu sane maraga Widi.

21Ring jagate nenten wenten bangsa tiosan sane sakadi bangsa Israel sane bebasang Palungguh IRatu saking genahipune dados panjak tur manggehang Palungguh IRatu dados kaulan Palungguh IRatu. Palungguh IRatu sampun ngardi paindikan sane agung tur ngangobin pabuat ipun, tur paindikane punika nyebar kabinawan Palungguh IRatu ring sakuubing jagate. Palungguh IRatu ngrahayuang kaulan Palungguh IRatu saking Mesir, tur ngaonang bangsa-bangsa sane tiosan rikala kaulan Palungguh IRatune mayuda.

22Palungguh IRatu sampun nadosang bangsa Israel kaula druen Palungguh IRatu kantos salami-laminipun, tur Palungguh IRatu Sang Hyang Widi Wasa sampun dados Widinipune.

23Sane mangkin, duh Ratu Sang Hyang Widi Wasa, Widin titiange, ledang Palungguh IRatu nagingin janjin Palungguh IRatu sane kardi Palungguh IRatu ring titiang, miwah katurunan titiange. Samaliha ledang Palungguh IRatu ngamargiang sakadi sane sampun sabdayang Palungguh IRatu.

24Kabinawan Palungguh IRatu sayan ageng, tur rakyate salami-laminipun jaga mabaos sapuniki: ‘Ida Sang Hyang Widi Wasa Sane Maha Wisesa, Ida punika Widi sane ngwengku Israel.’ Samaliha Palungguh IRatu jaga miara kaprabon titiange salami-laminipun.

25Titiang purun ngaturang pangastawan titiange puniki ring ayun Palungguh IRatu, Widin titiang, duaning Palungguh IRatu sampun ledang nyinahang indike punika makasami ring titiang, parekan Palungguh IRatu, tur sampun ngandikayang ring titiang mungguing Palungguh IRatu pacang nadosang katurunan titiange pararatu.

26Palungguh IRatu, Sang Hyang Widi Wasa sane maraga Widi, tur Palungguh IRatu sampun ngardi prajanjian sane kalintang becik puniki ring titiang.

27Titiang nglungsur ledang Palungguh IRatu ngamertanin katurunan titiange, mangda ipun prasida nglantur ngrasayang sih pasuecan Palungguh IRatu. Palungguh IRatu, Sang Hyang Widi Wasa sampun ngamertanin ipun, tur mertan Palungguh IRatu pacang manggeh ring ipun kantos salami-laminipun.”

← Chapter 16 Chapter 18 →